RCSS/SSA ဢွၼ်ႁူဝ်သေ ၸတ်းႁဵတ်းပၢင်သွၼ်ၽိူမ်ႉထႅမ်ၼမ်ႉၵတ်ႉ ၼႂ်းၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း မီးၶူးသွၼ် ၶဝ်ႈႁူမ်ႈလဵပ်ႈႁဵၼ်း ႁိမ်း 50 ၵေႃႉ ဝႃႈၼႆ။
ပၢင်ၾိုၵ်းၽွၼ်ႉၽိူမ်ႉထႅမ်ၼမ်ႉၵတ်ႉ ၶူးသွၼ်ၼႃႈလိၼ်သိုၵ်းမၢႆ 3 ၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်းၼႆႉ တႄႇဢဝ် ဝၼ်းတီႈ 21-27/05/2018 တႃႇၶၢဝ်းတၢင်း 7 ဝၼ်း။ ပၢင်သွၼ်ၼႆႉ ယူႇတီႈ သင်ၶၸဝ်ႈ တူင်ႇဝဵင်းၼမ်ႉၸၢင်တင်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ႁူမ်ႈၵၼ်သေ ဢွၼ်ႁူဝ် ၸတ်းႁဵတ်းၵႂႃႇ ဝႃႈၼႆ။
ၽူႈမီးပုၼ်ႈၽွၼ်းၼႃႈလိၼ်သိုၵ်းမၢႆ 3 ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပၢင်ၾိုၵ်းၽွၼ်ႉၼႆႉ ႁဝ်းၶႃႈ ၸတ်း ႁဵတ်းမႃး ပဵၼ်ပွၵ်ႈၵမ်း 5 ပႃးပွၵ်ႈၼႆႉယဝ်ႉၶႃႈ။ ၶၢဝ်းတၢင်းပူင်သွၼ်တႄႉ တႃႇ 7 ဝၼ်း/ ၼိုင်ႈဝူင်ႈ။ ယူႇတီႈသင်ၶ ၸဝ်ႈတူင်ႇဝဵင်းၼမ်ႉၸၢင်လႄႈ RCSS ႁူမ်ႈၵၼ်သေ လူင်းပူင်သွၼ်ၾိုၵ်းၽွၼ်ႉပၼ်ၵႂႃႇၶႃႈ။ ထႅင်ႈလွင်ႈၼႆႉၵေႃႈ ၼင်ႇ ႁိုဝ် ၶူးသွၼ်ၼႂ်းပိုၼ်ႉတီႈႁဝ်း ပေႃးတေၽိူမ်ႉၼမ်ႉၵတ်ႉၶိုၼ်ႈမႃးထႅင်ႈ” ဝႃႈၼႆ။
ၼႂ်းပၢင်ၾိုၵ်းၽွၼ်ႉ ဢၼ်လႆႈပူင်သွၼ်ၵႂႃႇသမ်ႉ မိူၼ်ၼင်ႇ ၽႃသႃ ဢင်းၵိတ်ႉ၊ ပၢႆးၼပ်ႉ၊ ပပ်ႉပိူင်ၵၢၼ်သွၼ်ၶူး၊ ၼႃႈၵၢၼ်ပုၼ်ႈၽွၼ်းၶူးသွၼ်ၵူႈၸၼ်ႉၸၼ်ႉ၊ ၵၢၼ်ဢွၼ်ႁူဝ်၊ ၵၢၼ်လုမ်း၊ Social Cooperative၊ RCSS Education Policy လႄႈ ႁဵတ်းၵၢၼ်တူဝ်ထူပ်းၼႃႈတီႈၽႂ်မၼ်း ၸိူဝ်းၼႆႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ