လူတ်ႉၶိူင်ႈ 3 လေႃႉ လမ်းၼိုင်ႈ ဢၼ်လုၵ်ႉတၢင်း ၼႂ်းဝဵင်းမိူင်းၽျၢၵ်ႈ ၵႂႃႇတင်းဢိူင်ႇမိူင်းႁႆးၼၼ်ႉ ပိၼ်ႈၶႂမ်ႈ တူၵ်း တၢင်း ၵူၼ်းမႃးၸွမ်းလူတ်ႉ 3 လေႃႉၼၼ်ႉ လႆႈမၢတ်ႇၸဵပ်း 3 ၵေႃႉ လူႉတၢႆထင်တီႈ 3 ၵေႃႉ ဝႃႈၼႆ။
ဝၼ်းတီႈ 22/05/2018 ယၢမ်းႁူဝ်ၶမ်ႈ မွၵ်ႈ 5 မူင်းၼၼ်ႉ လူတ်ႉ 3 လေႃႉ လုၵ်ႉတၢင်းၼႂ်းဝဵင်းမိူင်းၽျၢၵ်ႈသေ တေၵႂႃႇ တၢင်းဢိူင်ႇမိူင်းႁႆးၼၼ်ႉ ပိၼ်ႈၶႂမ်ႈတူၵ်းတၢင်း တီႈတၢင်းလူင်းလွႆ ႁိမ်းဝၢၼ်ႈၵွင်းမူး ၼိူဝ်သဵၼ်ႈတၢင်း မိူင်းၽျၢၵ်ႈ – မိူင်းၵူၵ်း ၼႂ်းၸႄႈဝဵင်းမိူင်းၽျၢၵ်ႈ ၸိုင်ႈတႆးပွတ်းဢွၵ်ႇ။
ၸၢႆးၶမ်းၸၼ် ႁူဝ်ပဝ်ႈပႃႇတီႇသိူဝ်ၽိူၵ်ႇ SNDP ၸႄႈဝဵင်းမိူင်းၽျၢၵ်ႈ လၢတ်ႈတီႈၽူႈတွႆႇႁွၵ်ႈဝႃႈ “ လူတ်ႉၶိူင်ႈ 3 လေႃႉ ဢၼ်မႃးပိၼ်ႈၶႂမ်ႈတူၵ်းတၢင်းၼၼ်ႉ ပဵၼ်ၵူၼ်းဢိူင်ႇမိူင်းႁႆး ဝၢၼ်ႈတူင်ႈလူင် ပဵၼ်ပီႈၼွင်ႉတႆးႁဝ်းၶႃႈ။ ၶဝ်မႃးလူႇ တၢၼ်းတီႈၼႂ်းဝဵင်းမိူင်းၽျၢၵ်ႈ တေပွၵ်ႈမိူဝ်း။ ယွၼ်ႉၵူၼ်း ႁေႃႈလူတ်ႉၶိူင်ႈ 3 လေႃႉၼၼ်ႉ သမ်ႉတေႁေႃႈ ဝႆးသေ ဢမ်ႇၵုမ်းလႆႈႁႅင်းလူတ်ႉ လေႃႈလူင်းတူၵ်းတၢင်းၵႂႃႇ ႁဵတ်းၼၼ်” ဝႃႈၼႆ။
ၵူၼ်းဢၼ်မႃးၸွမ်းၼႂ်းလူတ်ႉ 3 လေႃႉၼၼ်ႉ တႃႇၽူႈယိင်း 3 ၵေႃႉ လႆႈလူႉတၢႆထင်တီႈၵမ်းလဵဝ်၊ တႃႇၽူႈယိင်း ထႅင်ႈ 2 ၵေႃႉသမ်ႉ လႆႈမၢတ်ႇၸဵပ်းႁၢဝ်ႈႁႅင်းသေ လႆႈသူင်ႇယူတ်းယႃတူဝ်တီႈႁူင်းယႃ ၵူၼ်းမိူင်းတႃႈၶီႈလဵၵ်း။ တႃႇၽူႈ ၸၢႆး ထႅင်ႈၵေႃႉၼိုင်ႈတႄႉ လႆႈမၢတ်ႇၸဵပ်းဢိတ်းဢွတ်း။ ၽူႈယိင်းဢၼ်မႃးၸွမ်းထႅင်ႈၵေႃႉၼိုင်ႈၼၼ်ႉတႄႉ ဢမ်ႇ လႆႈမၢတ်ႇၸဵပ်းသင် ဝႃႈၼႆ။
ၵဵဝ်ႇၵပ်းလွင်ႈၵူၼ်းလူႉတၢႆ 3 ၵေႃႉၼၼ်ႉ ယူႇတီႈၸိူဝ်ႉၶိူဝ်းပီႈၼွင်ႉၶဝ်သေ လႆႈမႃးႁပ်ႉဢဝ်တူဝ်တၢႆတီႈႁူင်းယႃ ၵူၼ်း မိူင်းၸႄႈဝဵင်းမိူင်းၽျၢၵ်ႈသေ ဢဝ်မိူဝ်းလုမ်းလႃးသၢင်းၵျူဝ်ႇပၼ် ၸွမ်းၼင်ႇၾိင်ႈထုင်းတႆးမီးၼၼ်ႉ ဝႃႈၼႆ။
ၵူၼ်းႁေႃႈလူတ်ႉ 3 လေႃႉၼၼ်ႉ ၸိုဝ်ႈႁွင်ႉၸၢႆးဢွၵ်ႉ။ ၵူၺ်းၵႃႈ တူဝ်ၵူၼ်းႁေႃႈလူတ်ႉလၵ်ႉလႅၼ်ႈပၢႆႈဝႆႉ။ ၼႂ်းၵူၼ်း လူႉတၢႆ 3 ၵေႃႉ ပႃးမေးၼၢင်းၵူၼ်းႁေႃႈလူတ်ႉၵေႃႉၼိုင်ႈ ဝႃႈၼႆ။
ဓါတ်ပုံ – သင်္ဂဟလူမှူကူညီရေးအသင်း
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ