ႁွင်ႈၵၢၼ်ၾၢႆႇပၢႆးပၺ်ၺႃလူင်ပွင်ၸိုင်ႈ ပိုၼ်ၽၢဝ်ႇပၼ်ၾၢင်ႉဝႃႈ ၽွင်းၶၢဝ်းပိုတ်ႇႁပ်ႉ လုၵ်ႈႁဵၼ်းၼၼ်ႉ ၸိူဝ်းပဵၼ် ပေႃႈမႄႈလုၵ်ႈဢွၼ်ႇ ယႃႇပေပၼ်ငိုၼ်းလႄႈၶူဝ်းတွၼ်ႈ တီႈမေႃသွၼ်/ ၶူးသွၼ်။ ယူႇတီႈမေႃသွၼ်ၶဝ်ၵေႃႈ တေ ဢမ်ႇလႆႈၵဵပ်းငိုၼ်းတေဢမ်ႇလႆႈ ဢဝ်ၶူဝ်းတွၼ်ႈသင် တီႈပေႃႈမႄႈလုၵ်ႈဢွၼ်ႇ ဝႃႈၼႆ။
ႁူင်းႁဵၼ်းလူင်ပွင်ၸိုင်ႈ မိူင်းႁူမ်ႈတုမ် တေပိုတ်ႇႁပ်ႉသဵၼ်ႈၸိုဝ်ႈလုၵ်ႈႁဵၼ်း တင်ႈဢဝ်ဝၼ်းတီႈ 25-31/05/2018 လႄႈ တိုၵ်းသူၼ်းပႃးပေႃႈမႄႈလုၵ်ႈႁဵၼ်းႁႂ်ႈဢဝ်လုၵ်ႈလၢင်းၸဝ်ႈၵဝ်ႇၵႂႃႇၾၢၵ်ႇႁူင်းႁဵၼ်း ဝႃႈၼႆ။
လိူဝ်ၼၼ်ႉ ၼႂ်းၶေႃႈပိုၼ်ၽၢဝ်ႇပႃးဝႆႉဝႃႈ ၽူႈၵွၼ်းႁူင်းႁဵၼ်း၊ ၶူးသွၼ်/မေႃသွၼ် တေဢမ်ႇလႆႈၵဵပ်းငိုၼ်း၊ ႁပ်ႉငိုၼ်း တီႈလုၵ်ႈဢွၼ်ႇ ႁဵၼ်းလႄႈ ၶူဝ်းတွၼ်ႈ ၸိူဝ်းၼႆႉ။ ၼွၵ်ႈလိူဝ်ၼၼ်ႉ ယူႇတီႈလုၵ်ႈႁဵၼ်း သေ ႁႂ်ႈသႂ်ႇၶူဝ်းႁူင်းႁဵၼ်း မႃးတဵမ်ထူၼ်ႈ ႁႂ်ႈပႃးမိၵ်ႈမၢႆႁွင်ႈႁဵၼ်းလႄႈ မိၵ်ႈမၢႆႁူင်းႁဵၼ်းၵၼ်။ ၾၢႆႇၼိုင်ႈ ၵေႃႈ တေဢမ်ႇလႆႈၶၢႆၶူဝ်းၶွင်သင်ပၼ် လုၵ်ႈႁဵၼ်း” ဝႃႈၼႆ။
သင်ဝႃႈ လုၵ်ႈဢွၼ်ႇဢႃယု လႆႈ 5 ပီတဵမ်ၸိုင် ႁႂ်ႈလႆႈၶိုၼ်ႈၸၼ်ႉငဝ်ႈ(မူလ)၊ သင်လႆႈ 6 ပီၸိုင် ႁႂ်ႈၶိုၼ်ႈၸၼ်ႉ ၼိုင်ႈ ၵမ်းလဵဝ်။ ၼင်ႇႁိုဝ် လုၵ်ႈဢွၼ်ႇပေႃးလႆႈၶိုၼ်ႈႁူင်းႁဵၼ်းမူတ်းၼၼ်ႉ ယူႇတီႈၶူးသွၼ်တင်း ပေႃႈမႄႈလုၵ်ႈဢွၼ်ႇ ႁႂ်ႈႁူမ်ႈမိုဝ်းၵၼ်သေ တိုၵ်းသူၼ်းဢီးသူၼ်းႁႂ်ႈလုၵ်ႈဢွၼ်ႇမႃးၶိုၼ်ႈႁူင်းႁဵၼ်း ဝႃႈၼႆ။
ၵၢၼ်သွၼ်ႁဵၼ်း ၼႂ်းႁူင်းႁဵၼ်းလူင်ပွင်ၸိုင်ႈၼႆႉ တေတွပ်ႇလိၵ်ႈထတ်းထွင်ၼမ်ႉၵတ်ႉလုၵ်ႈႁဵၼ်း ၼိုင်ႈပီ 4 ပွၵ်ႈ။ လိူၼ်ၵျူႊလၢႆႊၵမ်းၼိုင်ႈ။ လိူၼ်ၻီႊသႅမ်ႊၿိူဝ်ႊၵမ်းၼိုင်ႈ။ ဢၼ်တွပ်ႇႁူမ်ႈၵၼ်တင်းမူတ်းသမ်ႉ ၼႂ်းလိူၼ်ဢွၵ်ႊထူဝ်ႊ ၿိူဝ်ႊ 2018 ၵမ်းၼိုင်ႈလႄႈ လိူၼ်ၾႅပ်ႊၿိဝ်ႊရီႊ 2019 ၵမ်းၼိုင်ႈ ဝႃႈၼႆ။
လုၵ်ႈႁဵၼ်းၸၼ်ႉငဝ်ႈၼႆႉ ဢမ်ႇဝႃႈ ၵူၼ်းၸၢႆး၊ ၼၢင်းယိင်း ၵူႈၵေႃႉ တေလႆႈဢၢၼ်ႇလႆႈ လူလႆႈ၊ တေလႆႈမေႃၼပ်ႉ သွၼ်ႇၸၼ်ႉပိုၼ်ႉထၢၼ် လွင်ႈၼႆႉ တေလႆႈဝႆႉပဵၼ်လွင်ႈယႂ်ႇဝႆႉၼၵ်းၼႃသေ ပူင်သွၼ်ၵႂႃႇ ၼင်ႇႁိုဝ် လုၵ်ႈႁဵၼ်း ပေႃးတေလႆႈၶိုၼ်ႈၵႂႃႇ ပဵၼ်ၸၼ်ႉတေႃႇထိုင်ပေႃးသုတ်း။ လိူဝ်ၼၼ်ႉ ၶူးသွၼ်တင်း ပေႃႈမႄႈလုၵ်ႈဢွၼ်ႇ တေလႆႈႁူမ်ႈမိုဝ်းၵၼ် ဢီးသူၼ်းႁႂ်ႈလုၵ်ႈဢွၼ်ႇမႃးၶိုၼ်ႈႁူင်းႁဵၼ်း၊ လွင်ႈဝႃႈ လုၵ်ႈဢွၼ်ႇဢွၵ်ႇႁူင်းႁဵၼ်း ၶၢတ်ႇႁူင်း ႁဵၼ်း ၸိူဝ်းၼႆႉ ယႃႇႁႂ်ႈလႆႈမီး ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ