ပၢင်ၵုမ်လူင် ပၢင်လူင်ႁူဝ်ပၢၵ်ႇ ပီ 21 ပွၵ်ႈၵမ်း 3 ဢၼ်တေၸတ်းႁဵတ်း ၼႂ်းလိူၼ်မေႊၼႆႉ ၶၢႆႉလိူၼ်ႈၵႂႃႇ ၸတ်းႁဵတ်း ၼႂ်းလိူၼ်ၵျုၼ်ႊ ဝႃႈၼႆ။
ၵဵဝ်ႇၵပ်းလူၺ်ႈပၢင်ၵုမ်ၼႆႉ မိူဝ်ႈတႄႇမၼ်း ႁၢင်ႈႁႅၼ်းတေၸတ်းႁဵတ်းၼႂ်းလိူၼ်မေႊၼႆႉဝႃႈၼႆသေတႃႉ ၵူၺ်းၵႃႈ ဢမ်ႇ ပဵၼ်ၸတ်းသေ တေၶၢႆႉလိူၼ်ႈၵႂႃႇ ၼႂ်းလိူၼ်ၵျုၼ်ႊ ဝႃႈၼႆ။
မိူဝ်ႈပွၵ်ႈၵမ်းဢွၼ်တၢင်း ဢၼ်လႆႈၶၢႆႉလိူၼ်ႈၵႂႃႇၼၼ်ႉ ယွၼ်ႉဢမ်ႇလႆႈၸတ်းပၢင်ၵုမ်ၵၢၼ်မိူင်းၸၼ်ႉၸိူဝ်ႉၸၢတ်ႈ ၼႆသေၶၢႆႉၵႂႃႇၵမ်းၼိုင်ႈ။ ပွၵ်ႈၵမ်းၼႆႉသမ်ႉ ၵၢၼ်ႁၢင်ႈႁႅၼ်းၶွမ်ႊမတီႊတႃႇတေဢုပ်ႇဢူဝ်းၼႂ်းပၢင်ၵုမ်လူင် ပႆႇယဝ်ႉတူဝ်ႈလီလႄႈ ၸင်ႇလႆႈၶၢႆႉလိူၼ်ႈထႅင်ႈၵမ်းၼိုင်ႈ ဝႃႈၼႆ။
ၸဝ်ႈသိုၵ်းလူင် ၶုၼ်ႇဢူၵ်ႉၵႃႇ ၽူႈၼမ်းၼႃႈ PNLO လၢတ်ႈဝႃႈ “ ၵဵဝ်ႇလူၺ်ႈ ပၼ်ႁႃသေဢၼ်ဢၼ် ၼႂ်းပၢင်ၵုမ်သေ လႆႈၶၢႆႉလိူၼ်ႈၵႂႃႇဢၼ်ဝႃႈၼၼ်ႉ ဢမ်ႇၸႂ်ႈ။ ယွၼ်ႉၶွမ်ႊမတီႊၾၢႆႇႁၢင်ႈႁႅၼ်းၵၢၼ်ငၢၼ်း ႁၢင်ႈႁႅၼ်းဢမ်ႇတၼ်းယဝ်ႉ လႄႈၸင်ႇလႆႈၶႆႉလိူၼ်ႈဝၼ်းပၢင်ၵုမ်လူင်ၵႂႃႇ” ဝႃႈၼႆ။
လိူဝ်ၼၼ်ႉ ၼႂ်းၼႃႈလိၼ်ၸုမ်းဢၼ်လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA မိူၼ်ၼင်ႇ ၸႄႈမိူင်းတႆး တင်း ၸႄႈမိူင်းရၶႅင်ႇၼႆႉ သွင်တီႈၼႆႉ ဢမ်ႇပႆႇလႆႈၸတ်းႁဵတ်းပၢင်ၵုမ်ၵၢၼ်မိူင်းၸၼ်ႉၸိူဝ်ႉၸၢတ်ႈ ဝႃႈၼႆ။
ၽူႈၶဝ်ႈၸုမ်း လွင်ႈငမ်းယဵၼ်ၵေႃႉၼိုင်ႈ လၢတ်ႈဝႃႈ “ ပေႃးႁဝ်းမႃးတူၺ်းၸိုင် တႆးတင်း ရၶႅင်ႇ ဢၼ်တေၸတ်းႁဵတ်း ပၢင်ၵုမ်ၵၢၼ်မိူင်းၸၼ်ႉၸိူဝ်ႉၸၢတ်ႈ ၵွၼ်ႇပၢင်ၵုမ်လူင် ပၢင်လူင် ႁူဝ်ပၢၵ်ႇပီ 21 ၼႆႉ လႅပ်ႈဢမ်ႇပေႃးတႅတ်ႈၼႅတ်ႈ။ တေႃႇထိုင်ယၢမ်းလဵဝ် ငူပ်ႉငီႉဢုပ်ႇဢူဝ်းၵၼ် ပႆႇလႆႈ” ဝႃႈၼႆ။
ပူၼ်ႉမႃးၼၼ်ႉ ၸုမ်းလူင်းလၢႆးမိုဝ်း NCA တင်း 8 ၸုမ်းၶဝ်ႁူမ်ႈပၢင်ၵုမ်။ တေႃႈလဵဝ်သမ်ႉ ၽိူမ်ႉမႃးထႅင်ႈ 2 ၸုမ်း ၸုမ်းမွၼ်းတင်း ၸုမ်းလႃးႁူႇ ဝႃႈၼႆ။
ၶေႃႈမုလ်း – The Voice
