ၼႃႈလိၼ်သိုၵ်းတႆးမၢႆ 2 လႅၼ်လိၼ်တႆး-ထႆး ပၢင်းဢဝ်ႁုၼ်ႇႁၢင်ႈၸဝ်ႈၼရေးသူၼ်ၵႂႃႇတင်ႈဝႆႉ တႃႇၵႃရဝပူးၸႃး တူၼ်ၼိုင်ႈ ဝႃႈၼႆ။

ဝၼ်းတီႈ 19/05/2018 ယၢမ်းၵၢင်ၼႂ် 9 မူင်း ပီႈၼွင်ႉတႆး-ထႆး ၽူႈမီးၼမ်ႉၸႂ်ၸေႇတၼႃႇ ႁူမ်ႈၵၼ်ႁဵတ်းႁုၼ်ႇႁၢင်ႈ ၸဝ်ႈၼရေႊသူၼ်တူၼ်ၼိုင်ႈ ပၢင်းၵႂႃႇဝႆႉတီႈၼႃႈလိၼ်သိုၵ်းတႆးမၢႆ 2 တီႈလွႆသၢမ်သိပ်း/လွႆသၼ်ၸူႉ လႅၼ်လိၼ်တႆး-ထႆး ၼႂ်းၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇ ဝႃႈၼႆ။

ၸၢႆးၶႂၼ်မိူင်း ၵႅမ်ႁူဝ်ပဝ်ႈ သမႃးၶူမ်းပၢႆးပၺ်ၺႃလႄႈ ၾိင်ႈငႄႈတႆး ၵဵင်းမႆႇ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ လၢႆ လၢႆၵေႃႉ ႁူမ်ႈၵၼ်သေ လေႃႇႁုၼ်ႇႁၢင်ႈၸဝ်ႈၼရေႊသူၼ် တူၼ်ၼိုင်ႈ။ ဢၼ်ႁဝ်းၶႃႈ ဢဝ်ၵႂႃႇဝႆႉတီႈ လွႆသၢမ်သိပ်းၼႆႉ ႁႂ်ႈပေႃးပဵၼ်တီႈမၢႆတွင်း တႃႇၵေႃႉသိုၵ်းၵေႃႉႁၢၼ်ၼပ်ႉထိုဝ်သေ ႁႂ်းပေႃႈမီးႁႅင်းၸႂ်။ ထႅင်ႈၾၢႆႇၼိုင်ႈၵေႃႈ ဢၼ်ႁဝ်းၶႃႈ ဢဝ်ႁုၼ်ႇႁၢင်ႈၸဝ်ႈၼရေႊသူၼ် ၵႂႃႇဝႆႉတီႈၼၼ်ႈၵေႃႈ ယွၼ်ႉဝႃႈ ၸမ်ၵွင်းမူးၸဝ်ႈၼရေႊသူၼ် တီႈမိူင်းႁၢင် ၵေႃႈၸႂ်ႈ” ဝႃႈၼႆ။

ႁုၼ်ႇႁၢင်ႈၸဝ်ႈၼရေႊသူၼ်ၼႆႉ ဢဝ်ပုၼ်သေလေႃႇဝႆႉ တၢင်းသုင်မီး 2.50 မဵတ်ႉ(6 ထတ်းပၢႆ)။ လွင်ႈၵေႃႇ သၢင်ႈ ၶိုၼ်ႈမႃးႁုၼ်ႇႁၢင်ႈၽရႃႉရေႊသူၼ်ၼႆႉ ယူႇတီႈၽူႈမီးၸမ်ၸႂ်ၸေႇတၼႃႇ ၵူၼ်းတႆး-ထႆး ႁူမ်ႈၵၼ် ႁဵတ်းလူႇဝႆႉ တီႈ ၼႃႈလိၼ်သိုၵ်းမၢႆ 2 တီႈလွႆသၢမ်သိပ်း တႃႇပဵၼ်တီႈမၢႆတွင်းလႄႈ ႁႂ်ႈလႆႈပဵၼ်တီႈတွၼ်ႈတႃႇ ၵေႃႉသိုၵ်းၵေႃႉႁၢၼ် တႆး ဢွၼ်ၵၼ်ၼပ်ႉယမ် ပၼ်ႁႅင်းၸႂ် ဝႃႈၼႆ။

ၸၢႆးၶႂၼ်မိူင်း လၢတ်ႈဝႃႈ တီႈၼႃႈလိၼ်သိုၵ်းတႆး မၢႆ 2 တီႈလွႆသၼ်ၸူႉ တင်း မိူင်းႁၢင်ၼႆႉ ယၢၼ်ၵႆၵၼ် မွၵ်ႈ 20 ၵီႊလူဝ်ႊ။ ပေႃးၼင်ႈလူတ်ႉၵႃးၵႂႃႇၸိုင် တေၵႆ 1 ၸူဝ်ႈမူင်းပၢႆ ဝႃႈၼႆ။

မိူဝ်ႈပၢၼ်ၸဝ်ႈၶမ်းၵၢႆႇၼွႆႉ ၸဝ်ႈၾႃႉသႅၼ်ဝီၼၼ်ႉ ၸဝ်ႈၼရေႊသူၼ်တင်း ၸဝ်ႈၶမ်းၵၢႆႇၼွႆႉ ပဵၼ်ဢူၺ်းၵေႃႉၵၼ်။ မိူဝ်ႈ ၽွင်းတေတိုၵ်းမၢၼ်ႈၼၼ်ႉ ၸဝ်ႈၼရေႊသူၼ် ဢဝ်ဢဵၼ်ႁႅင်းသိုၵ်းသေ တေၶိုၼ်ႈမိူဝ်းၸွႆႈၸဝ်ႈၶမ်းၵၢႆႇၼွႆႉ။ ၵူၺ်းၵႃႈ မိူဝ်ႈၽွင်းဢွၵ်ႇတၢင်းယူႇၼၼ်ႉ ယွၼ်ႉတၢင်းပဵၼ်ဢမ်ႇယူႇလီသေ လႆႈၵႂႃႇလူႉသဵင်ႈတီႈမိူင်းႁၢင် ၼႂ်းၸႄႈ ဝဵင်းမိူင်းတူၼ် ၸိုင်ႈတႆးပွတ်းဢွၵ်ႇ။ ၸဝ်ႈၼရေႊသူၼ်ၼႆႉ ယၢမ်ႈၵဵဝ်ႇၶွင်ႈၸွမ်းတႆး ဝႃႈၼႆ။