ၽွင်းလူင်ထႆး ၾၢႆႇၽဵင်ႇပဵင်းပဵၼ်ထမ်းလႄႈ ၸုမ်းၸိူဝ်း ဢွၵ်ႇၶၢဝ်းတၢင်းၵႂႃႇမိူင်းႁူမ်ႈတုမ်မၢၼ်ႈ ဢုပ်ႇဢူဝ်းၵၼ်   လွင်ႈႁူမ်ႈမိုဝ်း ၵႄႈလိတ်ႈပၼ်ႁႃယႃႈမဝ်းၵမ်လႄႈ ႁူမ်ႈပူၵ်းပွင်ၸွမ်းလႅၼ်လိၼ်။

ဝၼ်းတီႈ 21/05/2018 သိုဝ်ႇၶၢဝ်ႇၵဵင်းမႆႇ ပိုၼ်ၽၢဝ်ႇဝႃႈ ၸွမ်သိုၵ်းလူင် ပရႃႊၸိၼ်ႊ ၸၼ်ႊတွင်ႊ ၽွင်းလူင်ၾၢႆႇၽဵင်ႇပဵင်းပဵၼ်ထမ်း ႁူမ်ႈၸုမ်း ၸိူဝ်း ဢွၵ်ႇၶၢဝ်းတၢင်းၵႂႃႇႁူပ်ႉထူပ်း ၸွမ်သိုၵ်းၵျေႃႇသူၺ်ႇ ၽွင်းလူင်ၾၢႆႇၼႂ်းမိူင်း မိူင်းမၢၼ်ႈ ဢိၵ်ႇၸုမ်းၸိူဝ်းႁူပ်ႉထူပ်းၵၼ် တီႈႁွင်ႈႁပ်ႉႁွင်းၽွင်းလူင်ၾၢႆႇၼႂ်းမိူင်း တီႈၼေႇပျီႇတေႃႇ ။

ၼႂ်းပၢင်ၼႆႉသွင်ၾၢႆႇဢုပ်ႇဢူဝ်းၵၼ်လၢႆလွင်ႈ မိူၼ်ၼင်ႇတႃႇႁူမ်ႈၵၼ်ၵႄႈလိတ်ႈပၼ်ႁႃယႃႈမဝ်းၵမ်၊ တႃႇႁူမ်ႈၵၼ်ပူၵ်းပွင်ၸွမ်းလႅၼ်လိၼ်လႄႈ ႁႂ်ႈမီးလွင်ႈမိုတ်ႈၵိုဝ်းၸမ်ၸႂ်ၵၼ်ၸဵမ်ၸိူဝ်းၼႆႉ။

ၾၢႆႇထႆးဢုပ်ႇလၢတ်ႈဝႃႈ – ယိၼ်းၸူမ်းထိုင်ၾၢႆႇမၢၼ်ႈဢၼ်ပၼ်တၢင်းႁူမ်ႈမိုဝ်း မိူဝ်းၼႃႈမႃးၼႆၵေႃႈ ၸွမ်းသၢမ်   ၸဵင်ႇၶမ်းလႄႈ ၸွမ်းသၢပ်ႇမႄႈၼမ်ႉၶူင်၊ ၸွမ်လႅၼ်လိၼ်ၸိူဝ်းၼႆႉ ႁႂ်ႈၶဵင်ႈၶႅင်ၵူတ်ႇထတ်း တီႉၺွပ်းတီႈတူၼ်ႈတေႃမၼ်း ၵူၺ်းဢမ်ႇၵႃး ႁႂ်ႈတင်ႈႁူင်းတိုတ်းယႃႈ ပၼ်ၵူၼ်းၸိူဝ်းဢၼ်တိတ်းၸပ်းယႃႈၸိူဝ်းၼႆႉဝႃႈၼႆ။

ၾၢႆႇမၢၼ်ႈသမ်ႉ ဢုပ်ႇလၢတ်ႈဝႃႈ တေႁိပ်ႈၼႅတ်ႈ ဢဝ်လွင်ႈငမ်းယဵၼ် တင်းၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းႁႂ်ႈယဝ်ႉတူဝ်ႈ ယုမ်ႇယမ်ဝႃႈ ပေႃးလွင်ႈၸိူဝ်းၼႆႉယဝ်ႉယဝ်ႈတႄႉ တေၸၢင်ႈ ႁူမ်ႈမိုဝ်း ၵႄႈလိတ်ႈပၼ်ႁႃယႃႈမဝ်းၵမ်ၵႂႃႇလႄႈ ယိၼ်းလီႁူမ်ႈမိုဝ်းၸွမ်းမိူင်းထႆးတဵမ်တီႈ ဝႃႈၼႆ။

မိူဝ်ႈဝၼ်းတီႈ 04 – 06 /02/2018 ၼၼ်ႉၵေႃႈ ၸွမ်သိုၵ်းလူင် ထၢရ်ႊၶျႆႊယၼ်ႊ သီႊသူႊဝၼ်ႊ ၽူႈၵွၼ်းသိုၵ်း  သုင်သုတ်း လႆႈဢွၵ်ႇၶၢဝ်းတၢင်းၵႂႃႇ မိူင်းႁူမ်ႈ တုမ်မျၢၼ်ႇမႃႇ ႁူပ်ႉထူပ်းတင်း ၸွမ်သိုၵ်းလူင် မိၼ်းဢွင်ႇလၢႆႇ ပိူဝ်ႈႁႂ်ႈတပ်ႉသိုၵ်းသွင်ၸိုင်ႈမိူင်း မီးလွင်ႈမိုတ်ႈၵိုဝ်းၸမ်ၸႂ်ၵၼ်။