ၸုမ်းပႃႇတီႇၵၢၼ်မိူင်း တင်း ၸုမ်းတူင်ႉၼိုင်တူင်ႇဝူင်းတႆး လၢႆမူႇၸုမ်း ႁူမ်ႈၵၼ် ၸတ်းႁဵတ်းပၢင်သွၼ်ယုၵ်ႉ မုၼ်းၼမ်ႉ ၵတ်ႉၵူၼ်းၼုမ်ႇတႆးလႄႈ ပိုၼ်ႉႁူႉသုၼ်ႇလႆႈသုၼ်ႇပဵၼ်ၵူၼ်း တီႈထုင်ႉမိူင်းယေႃ တင်းမူတ်း ၵူၼ်းၼုမ်ႇၶဝ်ႈႁူမ်ႈ လဵပ်ႈႁဵၼ်း ႁိမ်း 100 ဝႃႈၼႆ။

ဝၼ်းတီႈ 16-18/05/2018 ပႃႇတီႇႁူဝ်သိူဝ် မိူင်းယေႃ၊ Tai Youth Network (TYN) မိူင်းယေႃလႄႈ ၵေႃပူၵ်းပွင် ၵူၼ်းၼုမ်ႇၸိုင်ႈတႆး (SSYCBC) ႁူမ်ႈၵၼ် ၸတ်းႁဵတ်းပၢင်သွၼ်ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇလႄႈ ပၢင်ပၼ် ပိုၼ်ႉႁူႉသုၼ်ႇလႆႈသုၼ်ႇပဵၼ်ၵူၼ်း တီႈႁူင်းႁဵၼ်းၸၼ်ႉဢွၼ် မိူင်းယေႃ ၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ။

ၸၢႆးၵွင် ၵေႃႁူမ်ႈသၢင်ႈၵူၼ်းၼုမ်ႇတႆး TYN မိူင်းယေႃ လၢတ်ႈဝႃႈ “ ႁဝ်းၶႃႈ ႁူမ်ႈၵၼ် 3 ၸုမ်းသေ ၸတ်းႁဵတ်း ပၢင်ယုၵ်ႉမုၼ်းၼမ်ႉၵတ်ႉ ၵူၼ်းၼုမ်ႇတီႈမိူင်းယေႃမႃး တင်းမူတ်း ၵူၼ်းၼုမ်ႇၶဝ်ႈႁူမ်ႈ 83 ၵေႃႉ။ ႁဝ်းၶႃႈ ၸတ်း ႁဵတ်းပၢင်သွၼ်ၼႆႉ ၼင်ႇႁိုဝ် ၵူၼ်းၼုမ်ႇႁဝ်း ပေႃးတေမီးၼမ်ႉၵတ်ႉၶိုၼ်ႈမႃးထႅင်ႈ။ လိူဝ်ၼၼ်ႉ ႁႂ်ႈၵူၼ်းၼုမ်ႇႁဝ်း မေႃၵပ်းသိုပ်ႇသိုဝ်ႇၶၢဝ်ႇ၊ ႁႂ်ႈႁူႉလွင်ႈသုၼ်ႇလႆႈၵူၼ်းလႄႈ ဢိၵ်ႇထႅင်ႈလၢႆလၢႆလွင်ႈ” ဝႃႈၼႆ။

ၼႂ်းပၢင်ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇၼႆႉ မီးၽူႈလူင်ႉလႅၼ်ႇ လၢႆလၢႆၵေႃႉ မႃးပူင်သွၼ်ပၼ်ပိုၼ်ႉႁူႉၵူၼ်းၼုမ်ႇ မိူၼ်ၼင်ႇ ပိုၼ်ႉႁူႉသုၼ်ႇလႆႈသုၼ်ႇပဵၼ် ၵူၼ်း၊ ပၢင်ႁိမ်ၼမ်ႉၵႂၢမ်းၵၼ်၊ လွင်ႈၵပ်းသိုပ်ႇသိုဝ်ႇၶၢဝ်ႇ၊ လွင်ႈၽွတ်ႈတင်ႈ ၸုမ်း ၵူၼ်းၼုမ်ႇလႄႈ လွင်ႈၵၢၼ်တူင်ႉ ၼိုင် သုၼ်ႇလႆႈသုၼ်ႇပဵၼ် ၸဝ်ႈႁႆႈၸဝ်ႈၼႃး ၸဵမ်ၸိူဝ်းၼႆႉ ဝႃႈၼႆ။

ၼၢင်းႁွမ်ငိုၼ်း ၵူၼ်းၼုမ်ႇ မိူင်းယေႃ လၢတ်ႈဝႃႈ “ မိူဝ်ႈဢွၼ်တၢင်းတႄႉ ႁဝ်းၶႃႈဢမ်ႇႁူႉ ပိူၼ်ႈမႃးပိုၼ်ႉတီႈႁဝ်း မႃး ပေႉၵိၼ်ႁဝ်းသေတႃႉၵေႃႈ ႁဝ်းၶႃႈယဵၼ်ယူႇ ဢမ်ႇႁတ်းလၢတ်ႈ တေႃႈလဵဝ်ၼႆႉတႄႉ ဢိင်ၼိူဝ်ပၢင်သွၼ် ဢၼ် ႁဝ်းၶႃႈ မႃးၶိုၼ်ႈ 3 ဝၼ်း ႁဝ်းၸင်ႇႁူႉလႆႈဝႃႈ ပေႃးပိူၼ်ႈမႃးတဵၵ်းတဵင်ႁဝ်း ႁဝ်းၶႃႈသမ်ႉတေႁဵတ်းႁိုဝ်တၢင်ႇ ယဝ်ႉၵေႃႈ ႁဝ်း သမ်ႉတေလႆႈဢဝ်ၶၢဝ်ႇၸိူင်ႉႁိုဝ် ႁႂ်ႈမၼ်းတႅတ်ႈၼႅတ်ႈ ႁႂ်ႈပိူၼ်ႈပွင်ႇၸႂ် ဢိင်ၼိူဝ်ပၢင်သွၼ်ၼႆႉ ႁဝ်းၶႃႈ လႆႈမႃး တၢင်းႁူႉၼမ်ၼႃႇၶႃႈ” ဝႃႈၼႆ။

ၼႂ်းပၢင်သွၼ်ၼႆႉ မီးၵူၼ်းၼုမ်ႇ 83 ၵေႃႉ မႃးၶဝ်ႈႁူမ်ႈ မိူၼ်ၼင်ႇ ဢိူင်ႇမိူင်းယၢင်း၊ မိူင်းယေႃ၊ မိူင်းၵႅတ်ႈ၊ မိူင်းႁႅတ်ႈ လႄႈ ပၢင်ႇထူဝ်ႇလိၼ် ၸိူဝ်းၼႆႉ ဝႃႈၼႆ။