ပီႈၼွင်ႉတႆး ဝၢၼ်ႈမႂ်ႇမွၵ်ႇၸၢမ် ႁူမ်ႈၵၼ် မႄးၵုမ်းလုမ်းလႃး ႁေႃၸဝ်ႈၶူးမေႃလိၵ်ႈတႆး ယွၼ်ႉပုၼ်လိၼ်သိူဝ်ႇႁိမ်းၶၢင်ႈ ႁေႃလႄႈ ဢၼ်မုင်း ၸဵမ်ၸိူဝ်းၼႆႉ လူႉလႅဝ်ဝႆႉၵမ်ႈၽွင်ႈ ဝႃႈၼႆ။

တႄႇဢဝ် ဝၼ်းတီႈ 15/05/2018 ပီႈၼွင်ႉတႆး ဝၢၼ်ႈမႂ်ႇမွၵ်ႇၸၢမ် ႁူမ်ႈၵၼ်သေ မႄးၵုမ်းလုမ်းလႃး ႁေႃၸဝ်ႈၶူး မေႃ လိၵ်ႈတႆး ဢၼ်မီးၼႂ်းဝၢင်းဝတ်ႉ ဝၢၼ်ႈမႂ်ႇမွၵ်ႇၸၢမ် ဢိူင်ႇတႃႈတွၼ်း ၸႄႈဝဵင်းမႄႈဢၢႆး ၸႄႈတွၼ်ႈၵဵင်းမႆႇ ၸိုင်ႈထႆး။ ႁူမ်ႈၵၼ်သေ ၶိုၼ်းမႄးၵေႃႇၵုမ်းလုမ်းလႃးၵႂႃႇ ဝႃႈၼႆ။

ၼၢင်းသႅင် မိူင်းလီ ၽူႈၼမ်းၼႂ်း ၶွမ်ႊမတီႊ ပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆး ဝၢၼ်ႈမႂ်ႇမွၵ်ႇၸၢမ် လၢတ်ႈတီႈၽူႈ တွႆႇ ႁွၵ်ႈဝႃႈ “ လၢႆပီပူၼ်ႉမႃးၼႆႉ ၸွမ်းႁိမ်းႁေႃၸဝ်ႈၶူးမေႃႁဝ်း ဢၼ်သိူဝ်ႇဝႆႉၼၼ်ႉ မၼ်းတႅၵ်ႇၶၢပ်ႇသဵင်ႈယဝ်ႉ။ ဢၼ်မုင်း တၢင်းၼိူဝ်မၼ်း ပဵၼ်ပုၼ် ပဵၼ်ယၢင်မၼ်းၼၼ်ႉ ၼမ်ႉယႃမၼ်းၵေႃႈၸၢင်ယဝ်ႉ။ ပေႃး ၾူၼ်တူၵ်းမႃး ၼမ်ႉႁူဝ်ႈတူၵ်း သႂ်ႇတီႈၸဝ်ႈၽြႃး၊ ယွႆႉသႂ်ႇတီႈၶႅပ်းႁၢင်ႈၸဝ်ႈၶူးမေႃၸိူဝ်းၼၼ်ႉ မၼ်းဢမ်ႇ ႁၢင်ႈလီ။ တေႃႈလဵဝ်တႄႉ ဢွၼ်ၵၼ်မႄး ၵုမ်းလုမ်းလႃႈမူတ်းယဝ်ႉ တီႈဢၼ်မုင်းတင်းၼိူဝ်မၼ်းသေ၊ သီမၼ်းၵေႃႈ တႃးယဝ်ႉ” ဝႃႈၼႆ။

ႁေႃၸဝ်ႈၶူးမေႃလိၵ်ႈတႆး တီႈဝၢၼ်ႈမႂ်ႇမွၵ်ႇၸၢမ်ၼႆႉ ၵေႃႇတင်ႈႁဵတ်းမႃး မီး 20 ပီပၢႆ။ ယွၼ်ႉဝႃႈ ဢမ်ႇလႆႈမႄးၵုမ်း လုမ်းလႃးသေပွၵ်ႈ။ ပွၵ်ႈၼႆႉ တေလႆႈဝႃႈ မႄးၵုမ်းလုမ်းလႃး ပဵၼ်ပွၵ်ႈၵမ်းႁႅၵ်ႈ ဝႃႈၼႆ။

ၼၢင်းသႅင် မိူင်းလီ လၢတ်ႈဝႃႈ “ တင်ႈတႄႇၵေႃႇသၢင်ႈၶိုၼ်ႈမႃးၼႆႉ ႁဝ်းၶႃႈ ဢမ်ႇတွၼ်ႉလႆႈလုမ်းလႃးမႄးၵုမ်း ဢၼ်ယႂ်ႇဢၼ်လူင်။ ၵူၺ်းၵႃႈ မႄးၵမ်းဢိတ်းၵမ်းဢွတ်းတႄႉမီးယူႇ။ ပွၵ်ႈၼႆႉ တေလႆႈဝႃႈ မႄးၵုမ်းလုမ်းလႃး ဢၼ်ယႂ်ႇလူင် ပဵၼ်ပွၵ်ႈၵမ်းႁႅၵ်ႈၶႃႈယဝ်ႉ။ တင်းမူတ်း တေတူၵ်းမႅၼ်ႈငိုၼ်း မွၵ်ႈ 80,000 ဝၢတ်ႇၶႃႈ” ဝႃႈၼႆ။

ႁေႃၸဝ်ႈၶူးမေႃလိၵ်ႈတႆး တီႈဝၢၼ်ႈမႂ်ႇမွၵ်ႇၸၢမ်ၼႆႉ ႁဵတ်းမိူဝ်ႈပီ 1986 ပၢၼ်ၸဝ်ႈသေႃးၽီႇတ ပဵၼ်ၸဝ်ႈၵွၼ်းဝတ်ႉ ဝၢၼ်ႈမႂ်ႇမွၵ်ႇၸၢမ်ၼၼ်ႉ တင်းၸၢဝ်းဝၢၼ်ႈမႂ်ႇမွၵ်ႇၸၢမ် ဢိၵ်ႇၽူႈယႂ်ႇၵူၼ်းလူင်တႆး လၢႆၸဝ်ႈ လႆႈၸႂ်ၵၼ်သေ ၵေႃႇ သၢင်ႈႁေႃၸဝ်ႈၶူးမေႃလိၵ်ႈတႆးမႃး ဝႃႈၼႆ။