သိုၵ်းမၢၼ်ႈ ယိုတ်းမိူင်း ဢွၵ်ႇၶေႃႈပူင်ၸူး ၼႂ်းတပ်ႉသိုၵ်းၶဝ်ဝႃႈ ၵူၼ်းသိုၵ်းၵူႈၵေႃႉ တၵ်းတေလႆႈၵႂႃႇဝႆႈ ၽြႃး တီႈၼေႇပျီႇတေႃႇ ဝႃႈၼႆ။

ၵူၼ်းသိုၵ်း ၸိူဝ်းတေဢွၵ်ႇၼႃႈသိုၵ်းလႄႈသင် ၸိူဝ်းတေၶဝ်ႈပႃးၼႂ်းပၢင်ၼႄၾၢင်ႁၢင်ႈသိုၵ်း ၼႂ်းဝၼ်း တပ်ႉသိုၵ်း ဢၼ်တေထိုင်ၼႆႉလႄႈသင် တၵ်းတေလႆႈၵႂႃႇဝႆႈၽြႃး မႃႇရဝိၸယ ဢၼ်ၸွမ်ၸိၵ်း သိုၵ်း မၢၼ်ႈ ဢွၼ်ႁူဝ်ၵေႃႇသၢင်ႈ လူႇတၢၼ်းဝႆႉ တီႈၸႄႈဝဵင်းတႅၵ်ႉၶိၼႃႉသီႇရိ တိူင်းၼေႇပျီႇတေႃႇၼၼ်ႉ ဝႃႈၼႆ။

ဢိင်ၼိူဝ်လွင်ႈၼႆႉသေ မိူဝ်ႈဝၼ်းတီႈ 10 မၢတ်ႊၶျ်ၼႆႉ ၵူၼ်းသိုၵ်းၼႂ်းတပ်ႉတိူင်းတီႈၼေႇပျီႇတေႃႇ ဢွၼ်ၵၼ်ၵႂႃႇဝႆႈ ၽြႃး ပေႃးတဵမ်ၵႂႃႇမူတ်း ဝႃႈၼႆ။

ၵူၼ်းပိုၼ်ႉတီႈ လၢတ်ႈတီႈသိုဝ်ႇၶၢဝ်ႇ DVB ဝႃႈ -“တီႈၽြႃးၵေႃႇမႂ်ႇၼႆႉ ၸိူဝ်းပဵၼ်ၵူၼ်းမိူင်း ဢမ်ႇမႃးဝႆႈ။ ၵႆႉ ႁၼ်ၵူၼ်း ၼႂ်းၶႃႈႁၢပ်ႇၵၢၼ် ၶုၼ်ဢိတ်းဢွတ်းၵူၺ်း ဢၼ်မႃးဝႆႈ။ ၼႂ်းႁူဝ်လိူၼ်မၢတ်ႊၶျ်ၼႆႉ သိုၵ်းမၢၼ်ႈ ၸင်ႇဢွၵ်ႇလိၵ်ႈႁွင်ႉ ၶႃႈႁၢပ်ႇၵၢၼ်ၶုၼ် ၸိူဝ်းလိုဝ်ႈၵၢၼ် (ဢငဵင်းၸႃး) ၊ ၵေႃးပၵ ၵူႈၸႄႈဝဵင်း ၸိူဝ်းၼႆႉ ႁႂ်ႈဢွၼ်ၵၼ်မႃးဝႆႉၽြႃး”- ဝႃႈၼႆ။

ဢၼ်သိုၵ်းမၢၼ်ႈ ပိုၼ်ၽၢဝ်ႇႁွင်ႉ ၵူၼ်းမႃးဝႆႈၽြႃးမႃႇရဝိၸယၼႆႉၵေႃႈ ပဵၼ်လၢႆးတၢင်းလွႆးၶေႃႉ လွႆးၵဵဝ်ႇ ႁဵတ်းႁႂ်ႈၵူၼ်းသိုၵ်း ၸိူဝ်းဢွၵ်ႇၼႃႈသိုၵ်း ၸိူဝ်းၼၼ်ႉ ဢွင်ႇပေႉသိုၵ်းသေ လွင်ႈမၢတ်ႇၸဵပ်းလူႉတၢႆ ႁႂ်ႈ လူတ်းယွမ်းလူင်းၵူၺ်း – ၵူၼ်းၼႂ်းတပ်ႉလႄႈ ၵူၼ်းမိူင်း တီႈၼေႇပျီႇတေႃႇ ဢွၼ်ၵၼ်ထတ်းသၢင်ၼင်ႇ ၼႆ။

ၽြႃးႁိၼ်ၶၢဝ် မႃႇရဝိၸယၼႆႉ ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ ဢွၼ်ၼမ်းလူႇတၢၼ်းၵေႃႇသၢင်ႈဝႆႉ မိူဝ်ႈႁူဝ်ပီ 2023 ။ ပိုၼ်ၽၢဝ်ႇဝႃႈ ပဵၼ်ႁုၼ်ႇႁၢင်ႈဢၼ်မီးၼႃႈယုမ်ႉၼႆသေ ႁႂ်ႈၵူၼ်းမိူင်းမႃးဝႆႈ။ မီးၶႅၵ်ႇၼွၵ်ႈ မိူင်းၼႂ်းမိူင်းလႄႈ ၶႅၵ်ႇၸိုင်ႈမိူင်း ၸိူဝ်းၼၼ်ႉမႃးၵေႃႈ သိုၵ်းမၢၼ်ႈ ၸူဝ်းၵႂႃႇဝႆႈယူႇသေတႃႉ ၵူၼ်းမိူင်းတႄႉ ဢမ်ႇသူင်ႇၵႂႃႇဝႆႈ ဝႃႈၼႆ။