လုၵ်ႈႁဵၼ်းၸၼ်ႉငဝ်ႈ မေႃသွၼ်ၸၢႆးမူး ႁူမ်ႈၵၼ်ၵႂႃႇ တီႇၽဵဝ်ႈဝၢင်းႁူင်းႁဵၼ်း တီႈဝၢၼ်ႈႁူၺ်ႈၸွႆး ၼႂ်းၸႄႈဝဵင်းမိူင်းပၼ်ႇ ဝႃႈၼႆ။

ဝၼ်းတီႈ 17/05/2018 လုၵ်ႈႁဵၼ်းၸၼ်ႉငဝ်ႈ မေႃသွၼ်ၸၢႆးမူး ႁူမ်ႈၵၼ်သေ ၵႂႃႇလုမ်းလႃး တီႇၽဵဝ်ႈ၊ လွမ်ႉႁူဝ်ႉ တီႈဝၢင်းႁူင်းႁဵၼ်း ဝၢၼ်ႈႁူၺ်ႈၸွႆး ဢိူင်ႇၼႃးဝွၼ် ၸႄႈဝဵင်းမိူင်ပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။ ၼင်ႇႁိုဝ် ပေႃးတေပဵၼ်တီႈဢၼ်ၵိုၵ်းပိုၼ်းၵႂႃႇတၢင်းၼႃႈလႄႈ လွင်ႈဢၼ်မေႃသွၼ်ၸၢႆးမူး ဢွၼ်ႁူဝ်တႄႇတင်ႈ ႁူင်းႁဵၼ်းမႃး ဝႃႈၼႆ။

လုၵ်ႈႁဵၼ်းၸၼ်ႉငဝ်ႈ ၵေႃႉၼိုင်ႈ ဢမ်ႇၶႂ်ႈဢွၵ်ႇၸိုဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ လၢႆလၢႆၵေႃႉ ႁူမ်ႈၵၼ် မႃးတူၺ်းလုမ်းလႃး မႃးလွမ်ႉႁူဝ်ႉပၼ်ဝႆႉ။ ယွၼ်ႉဝႃႈ ပီႈၼွင်ႉတၢင်ႇၶိူဝ်းၶဝ်သမ်ႉ ၶႂ်ႈၽိုတ်ႉၶဝ်ႈၸူး မႄႇဢဝ်ၵႂႃႇ ၵမ်းဢိတ်းဢိတ်းၵေႃႈမီး။ သင်ႁဝ်းၶႃႈ ပွႆႇပႅတ်ႈဝႆႉ ဢမ်ႇဢွၼ်ၵၼ်မႃးတူၺ်းလုမ်းလႃးၸိုင် ဝၼ်းၼိုင်ႈမႃး ပိူၼ်ႈတေ ဢဝ်ၵႂႃႇ မူတ်းယဝ်ႉ တီႈလိၼ်ဝၢင်းႁူင်းႁဵၼ်းၼႆႉ။ ၾၢႆႇၼိုင်ႈၵေႃႈ တီႈလိၼ်ဝၢင်းၼႆႉ ပဵၼ်တီႈလိၼ် ဢၼ်ၶူးမူးႁဝ်း ၵေႃႇတင်ႈ ႁူင်းႁဵၼ်း သၢင်ႈႁူင်းႁဵၼ်းမႃး တႃႇသွၼ်ပၼ် လုၵ်ႈဢွၼ်ႇပေႃးတေႁူႉမေႃလိၵ်ႈလၢႆးၵေႃႈၸႂ်ႈ။ ၼွၵ်ႈလိူဝ် ၼၼ်ႉ ၼႂ်းဝၢင်းႁူင်းႁဵၼ်းၼႆႉ ၶူးမူး ဢဝ်တူၼ်ႈမႆႉ ၵူၵ်ႉၵူဝ်ႇ၊ မႆႉသၢမ်သႃလႄႈ မႆႉၺွင်ႇ ၽုၵ်ႇဝႆႉၼႂ်းမၼ်း တေႃႇထိုင် မိူဝ်ႈလဵဝ် တူၼ်ႈမႆႉၸိူဝ်းၼႆႉတိုၵ်ႉၵိုၵ်း မီးဝႆႉယူႇ” ဝႃႈၼႆ။

သိုပ်ႇလၢတ်ႈဝႃႈ ဢွင်ႈတီႈၼႆႉ ႁဝ်းၶႃႈ ၸိူဝ်းပဵၼ်လုၵ်ႈႁဵၼ်း ၶူးမူး ႁူမ်ႈၵၼ်သေ တေလုမ်းလႃးပႂ်ႉပႃး တီႈလိၼ်ၼႆႉ ၼင်ႇႁိုဝ် ပေႃးတေပဵၼ်ဢၼ်ၵိုၵ်းပိုၼ်း ၶူးမူးႁဝ်းၶႃႈလႄႈ ႁႂ်ႈလုၵ်ႈလၢၼ်ႁုၼ်ႈသႅၼ်းမႂ်ႇၶဝ် ပေႃးတေလႆႈ လဵပ်ႈႁဵၼ်း ႁူႉၸၵ်း လွင်ႈပိုၼ်းၶူးမူးၵႂႃႇ” ဝႃႈၼႆ။

ဝၢၼ်ႈႁူၺ်ႈၸွႆးၼႆႉ ယူႇၼႂ်းဢိူင်ႇၼႃးဝွၼ် မီးၾၢႆႇၸၢၼ်းဝဵင်းမိူင်းပၼ်ႇ။ တေႃႈလဵဝ် လင်ႁိူၼ်းၵူၼ်း ယူႇသဝ်း မီး 32 လင် ဝႃႈၼႆ။

မေႃသွၼ် ႁူၺ်ႈၸွႆး ၶူးမူးၼႆႉ ပဵၼ်မေႃသွၼ် ဝၢၼ်ႈႁူၺ်ႈၸွႆးသေ ဢမ်ႇၵႃး ပဵၼ်ၵူၼ်းၵေႃႉဢၼ်ၵေႃႇတင်ႈ ဝူင်းၸိူင်း လႅဝ်း ၵေႃႈၸႂ်ႈ။ ၼွၵ်ႈလိူဝ်ၼၼ်ႉ ပဵၼ်ၵူၼ်းၵေႃႉႁၢပ်ႇၵၢၼ် ၼႂ်းၵၢၼ်သိုၵ်းၵေႃႈပဵၼ်။ မေႃသွၼ် ႁူၺ်ႈၸွႆး ၶူးမူးၼႆႉ လႆႈလူႉတၢႆၵႂႃႇ မိူဝ်ႈပီ 1994 လိူၼ်ၻီႊသႅမ်ႊပိူဝ်ႊ ဝၼ်းတီႈ 26 တီႈဝၢၼ်ႈလၵ်းတႅင်ႇ ဢိူင်ႇပဵင်းလူင် ၸႄႈဝဵင်း ဝဵင်းႁႅင် ၸႄႈတွၼ်ႈ ၵဵင်းမႆႇ ၸိုင်ႈထႆး ဝႃႈၼႆ။