တပ်ႉသိုၵ်းမၢၼ်ႈလႃႈသဵဝ်ႈ ဢၼ်ႁုပ်ႈယိုတ်းဢဝ်ဝႆႉတီႈလိၼ်ၵူၼ်းမိူင်း 200 ဢေႊၶိူဝ်ႊပၢႆ တၢင်းၾၢႆႇတူၵ်း ၼမ်ႉယၢဝ် ၼၼ်ႉ ပွႆႇပၼ်ၵူၼ်းမိူင်းၶိုၼ်း ဝႃႈၼႆ။

ဝၼ်းတီႈ 15/05/2018 ၶွမ်ႊမတီႊၾၢႆႇၵူတ်ႇထတ်းတီႈလိၼ်ၵူၼ်းမိူင်းဢၼ်ၺႃးယိုတ်းၼၼ်ႉ လူင်းပိုၼ်ႉတီႈၵူတ်ႇ ထတ်းတီႈလိၼ် ဢၼ်တပ်ႉသိုၵ်းမၢၼ်ႈ မၢႆတပ်ႉ 11 ႁူင်းႁဵၼ်းၾိုၵ်းသွၼ်ၵၢၼ်သိုၵ်းမၢၼ်ႈ ႁုပ်ႈယိုတ်းဝႆႉ ၶွင်ၵူၼ်း မိူင်း ၼႂ်းဝၢၼ်ႈၶၢႆးတူၺ် ဢိူင်ႇဝၢၼ်ႈပွႆး ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ တႃႇတီႈလိၼ် 200 ဢေႊၶိူဝ်ႊ ပၢႆ ၾၢႆႇတူၵ်းၼမ်ႉယၢဝ်တႄႉ တေၶိုၼ်းပၼ်ၵူၼ်းမိူင်းႁဵတ်းၵၢၼ်ၶိုၼ်း ဝႃႈၼႆ။

ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈ မၢႆ(3) ၸႄႈတွၼ်ႈလႃႈသဵဝ်ႈ လၢတ်ႈတီႈ ၽူႈတွႆႇႁွၵ်ႈဝႃႈ “ မၼ်းပဵၼ်မီးဝႆႉသွင်တွၼ်ႈ တွၼ်ႈၼိုင်ႈၼၼ်ႉ မီးၾၢႆႇတၢင်းဢွၵ်ႇၼမ်ႉယၢဝ်။ ထႅင်ႈတွၼ်ႈၼိုင်ႈသမ်ႉ မီးၾၢႆႇတူၵ်းၼမ်ႉယၢဝ်။ ဢၼ်ၶဝ်တေပၼ်ၵူၼ်းမိူင်းၶိုၼ်းၼၼ်ႉ တေပဵၼ်ၾၢႆႇတူၵ်းၼမ်ႉယၢဝ် တႃႇ 200 ဢေႊၶိူဝ်ႊ ပၢႆ။ တၢင်းၾၢႆႇဢွၵ်ႇၼမ်ႉယၢဝ် တႃႇ 1000 ဢေႊၶိူဝ်ႊပၢႆၼၼ်ႉ ၶဝ်တေဢမ်ႇပၼ်ၵူၼ်းမိူင်းယဝ်ႉ။ ယွၼ်ႉဝႃႈ မိူဝ်ႈၵူႈ ပွၵ်ႈ ဢၼ်ၶဝ်မႃးႁုပ်ႈယိုဝ်းဢဝ် တၢင်းၾၢႆႇဢွၵ်ႇၼမ်ႉယၢဝ် 1000 ဢေႊၶိူဝ်ႊပၢႆၼၼ်ႉ မၼ်းပဵၼ် တီႈ လိၼ်ပဝ်ႇ ႁၢမ်းဝႆႉဝႃႈၼႆ။ ဝၢႆးၼၼ်ႉ ၶဝ်ၵေႃႈမႃးတင်ႈတပ်ႉၶဝ်သေ ၵမ်းလွႆးလွႆးမႃးသမ်ႉၶႂၢၵ်ႈ ဢဝ်ၶဝ်ပႃးတီႈ လိၼ်ၵူၼ်း မိူင်းၵမ်ႈၽွင်ႈ ႁိူၼ်းၵူၼ်းဝၢၼ်ႈသၢမ်လင် လႆႈယႃႉ” ဝႃႈၼႆ။

သိုပ်ႇလၢတ်ႈဝႃႈ တၢင်းၾၢႆႇတူၵ်းၼမ်ႉယၢဝ် 200 ဢေႊၶိူဝ်ႊၼၼ်ႉတႄႉ ၶဝ်ပၼ်ၵူၼ်းမိူင်းႁဵတ်းၵိၼ်ၶိုၼ်း။ ၵူၺ်း ၵႃႈ တေႃႈလဵဝ်သမ်ႉ မီးပၼ်ႁႃသုၵ်ႉယုင်ႈၵၼ်ဝႆႉ တီႈလိၼ် 200 ဢေႊၶိူဝ်ႊၼၼ်ႉ ၽႂ်ၵေႃႈၶႂ်ႈလႆႈ ၽႂ်ၵေႃႈဝႃႈ ပဵၼ် တီႈလိၼ်ၵဝ်လိၼ်မႂ်း ႁဵတ်းၼၼ်သေ ႁိမ်ၵၼ်ဝႆႉ။ မၢင်ၵေႃႉသမ်ႉ ၶႂ်ႈလႆႈ လၢႆ သမ်ႉလႅၼ်ဝႃႈ ပဵၼ်တီႈလိၼ်ၶဝ်ၵေႃႈ ပႃးၵမ်ႈၽွင်ႈႁဵတ်းၼၼ်။ မၢင်ၵေႃႉသမ်ႉ ပဵၼ်တီႈလိၼ်ၶဝ် ထုၵ်ႇၺႃး ယိုတ်းတႄႉႁဵတ်းၼၼ်။ တေႃႈလဵဝ် တေယူႇတီႈၾၢႆႇၽူႈၵွၼ်းၸႄႈဝဵင်းတင်း ၾၢႆႇတႅၵ်ႈၼႃႈလိၼ်ၶဝ် တေၸတ်းၵၢၼ် သေ ႁဵတ်းသၢင်ႈပၼ်ၵႂႃႇ လွင်ႈ တီႈလိၼ် 200 ဢေႊၶိူဝ်ႊပၢႆၼႆႉ” ဝႃႈၼႆ။

တပ်ႉသိုၵ်းမၢၼ်ႈ မၢႆတပ်ႉ 11 ႁူင်းႁဵၼ်းၾိုၵ်းသွၼ်ၵၢၼ်သိုၵ်းၼႆႉ မိူဝ်ႈၵူႈပွၵ်ႈ ဢၼ်ၶဝ်မႃးႁုပ်ႈယိုတ်းဢဝ်တီႈလိၼ် ၼႆႉ ပဵၼ်ဝႆႉတပ်ႉၵွင်။ ၽိူဝ်ႇထိုင် ပီ 2014 မႃး ၸင်ႇလႅၵ်ႈပဵၼ် တပ်ႉသိုၵ်းႁူင်းႁဵၼ်းၾိုၵ်းသွၼ်ၵၢၼ်သိုၵ်းၵႂႃႇ။ မိူဝ်ႈၶဝ် မႃးယိုတ်းဢဝ်တီႈလိၼ်ၼႆႉ ပီ 1990 ပၢႆ ဝႃႈၼႆ။

တၢင်းပွတ်းတွၼ်ႈဝၢၼ်ႈၶၢႆးတူၺ်ၼႆႉ ပဵၼ်တီႈလိၼ် ဢၼ်မီးၵႃႈၶၼ် ယွၼ်ႉၸမ်တၢင်းလူတ်ႉၾႆး ဢၼ်လုၵ်ႉတၢင်း ဝဵင်းလိူဝ်ႇၶိုၼ်ႈ မႃးတၢင်းလႃႈသဵဝ်ႈၵေႃႈၸႂ်ႈ၊ ၸမ်သဵၼ်ႈတၢင်းလူင်ၵေႃႈၸႂ်ႈ။ လိူဝ်ၼၼ်ႉ ၵူၼ်းၸၢဝ်းၶိူဝ်း မိူၼ်ၼင်ႇ တႆး၊ ၶႄႇ၊ ၵလႃး၊ မၢၼ်ႈ ဢိၵ်ႇထႅင်ႈလၢႆၸၢဝ်းၶိူဝ်း ၸဵမ်ၸိူဝ်းၼႆႉ ယူႇသဝ်းၵေႃႈၼမ် ဝႃႈၼႆ။