ၽူႈၸၢႆး ၵေႃႉၼိုင်ႈ ႁေႃႈရူတ်ႉဝႆးသေ ဢဝ်ပဵၼ်ၽေးၵိုင်ႉၵၢင်ႉ လူမ်ႉရူတ်ႉၶိူင်ႈ ႁိမ်းၶၢင်ႈတၢင်း ထိုင်တီႈမၢတ်ႇၸဵပ်းႁႅင်းသေ လႆႈသူင်ႇယူတ်းယႃတူဝ် တီႈႁူင်းယႃဝၢၼ်ႈႁႆး။
ဝၼ်းတီႈ 3/3/2024 ယၢမ်းႁူဝ်ၶမ်ႈ 5 မူင်းၶိုင်ႈ ၽူႈၸၢႆး ၵေႃႉၼိုင်ႈ မဝ်းလဝ်ႈသေ ႁေႃႈရူတ်ႉၶိူင်ႈဝႆး ဢဝ် ပဵၼ်ၽေးၵိုင်ႉၵၢင်ႉ လူမ်ႉရူတ်ႉၶိူင်ႈ ႁိမ်းၵဵၵ်ႉဝၢၼ်ႈၵၢင် ၼႂ်းၵႄႈဝၢၼ်ႈႁႆး – ဝၢၼ်ႈတိုင်းလဵင်း ၸႄႈဝဵင်းၵေး သီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။
ၵူၼ်းပိုၼ်ႉတီႈ ၼႂ်းၸႄႈဝဵင်းၵေးသီး လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းလူမ်ႉရူတ်ႉၶိူင်ႈၼၼ်ႉ ပဵၼ်ၵူၼ်း ႁဵတ်းတၢင်း (သဵၼ်ႈတၢင်း) မၼ်းၸၢႆးမဝ်းလဝ်ႈသေ ႁေႃႈရူတ်ႉဝႆး ဢဝ်ပဵၼ်ၽေးၵိုင်ႉၵၢင်ႉ လူမ်ႉရူတ်ႉၵႂႃႇ ႁိမ်းၶၢင်းသေ ဢဝ်တီႈသီႇသူပ်းၾၢႆႇတႂ်ႈ ၸဵင်ႇၾၢႆႇၶႂႃသိၵ်ႇသေ လိူတ်ႈဢွၵ်ႇၼမ် ယဝ်ႉၵေႃႈ သူပ်းလူၺ်ႈ ဝႆႉၶႃႈဢေႃႈ။ ယၢမ်းလဵဝ် လႆႈသူင်ႇယူတ်းယႃတူဝ် ဝႆႉတီႈဝၢၼ်ႈပၢင်ႇလေႃႉယဝ်ႉ”- ဝႃႈၼႆ။
ၽူႈၸၢႆး ဢၼ်လူမ်ႉရူတ်ႉၶိူင်ႈၼႆႉ လုၵ်ႉတၢင်းဝၢၼ်ႈႁႆးသေ တေဢွၵ်ႇၵႂႃႇတၢင်းဝၢၼ်ႈတိုင်းလဵင်း ဝၢႆးလူမ်ႉ ရူတ်ႉၶိူင်ႈယဝ်ႉ ယူႇတီႈ ၵူၼ်းပိုၼ်ႉတီႈ လႆႈသူင်ႇယူတ်းယႃတူဝ် တီႈႁူင်းယႃၵူၼ်းမိူင်း ၶွင် SSPP တီႈဝၢၼ်ႈပၢင်ႇလေႃႉ ၼႆယဝ်ႉ။
