ၶႄႇ ဢီးသူၼ်း ႁႂ်ႈၸုမ်းဢူၺ်းလီ ပွတ်းႁွင်ႇ ဢၼ်ပႃးၸုမ်းဝႃႉၼၼ်ႉ လူင်းလၢႆးမိုဝ်းၵိုတ်းတိုၵ်း ပတ်းပိုၼ်ႉတူဝ်ႈ မိူင်း NCA ဝႃႈၼႆ။
ဝၼ်းတီႈ 18 ဢမ်ႇၼၼ် 19 ၼႆႉ တူဝ်တႅၼ်းၸုမ်းဢူၺ်းလီ ပွတ်းႁွင်ႇတေႁူပ်ႉလူင်ပွင်ၸိုင်ႈၶႄႇ၊ လူင်ပွင်ၸိုင်ႈ ၶႄႇ ၶပ်းၶိုင်ပၼ်တႃႇႁႂ်ႈႁူပ်ႉထူပ်းတူဝ်တႅၼ်းလူင်ပွင်ၸိုင်ႈမၢၼ်ႈ သိုၵ်းမၢၼ်ႈ ဝႆႉဝႃႈၼႆ။
ၽူႈၼင်ႈလုမ်းၵပ်းသၢၼ်ဝႃႉ တီႈလႃႈသဵဝ်ႈ လၢတ်ႈတီႈသိုဝ်ႇၶၢဝ်ႇ The Ladies News ဝႃႈ “ ယူႇတီႈၶႄႇ ယူႇၼႂ်း ဝူင်ႈၵၢင်သေ ၵပ်းသိုပ်ႇၸတ်းပၼ် ၸုမ်းဢူၺ်းလီပွတ်းႁွင်ႇ ဢၼ်ဝႃႉ ဢွၼ်ႁူဝ်လႄႈလူင်ပွင်ၸိုင်ႈမၢၼ်ႈ၊ တပ်ႉ သိုၵ်းမၢၼ်ႈ သူၼ်းဢီးႁႂ်ႈၵႂႃႇ ၸွမ်းၶၵ်ႉၵၢၼ်လွင်ႈငမ်းယဵၼ်။ ယွၼ်ႉၼၼ် ယူႇတီႈတၢင်းႁၼ်ထိုင်ၶႄႇတႄႉ ၶႂ်ႈ ႁႂ်ႈၸုမ်းဢူၺ်းလီပွတ်းႁွင်ႇ လူင်းလၢႆးမိုဝ်း NCA” ဝႃႈၼႆ။
သိုပ်ႇလၢတ်ႈထႅင်ႈဝႃႈ “ ယူႇတီႈၶဝ်တႄႉ ၶႂ်ႈႁႂ်ႈလူင်းလၢႆးမိုဝ်းၼၼ်ႉယဝ်ႉ။ ဢၼ်ငူပ်ႉငီႉၵၼ် ႁဵတ်းသၢင်ႈတႃႇတေ လူင်းလၢႆးမိုဝ်းၼၼ်ႉၵေႃႈ ယူႇတီႈၶႄႇ ၶႂ်ႈႁႂ်ႈပဵၼ်ၼၼ်ႉယဝ်ႉ။ ဢၼ်ၶဝ်ၶဝ်ႈၼႂ်းၵႄႈၵၢင်သေ ၸတ်းႁဵတ်းၸွႆႈၼၼ်ႉ ၵေႃႈ တင်းၼမ်တေႁူႉၵၼ်မူတ်းယူႇ။ ၵွပ်ႈသင်လႄႈၼႆ ၼင်ႇႁိုဝ် ၸွမ်းလႅၼ်လိၼ် ပေႃးတေၵတ်းယဵၼ်။ ယဝ်ႉၵေႃႈ ၼႂ်းမိူင်းၶႄႇၶဝ်ၵေႃႈ တေလႆႈၵတ်းယဵၼ်။ သင်ဝႃႈ ၸွမ်းလႅၼ်လိၼ် ဢမ်ႇၼိမ်သဝ်းၵေႃႈ ဝၢႆးမႃး ၵူၼ်းမိူင်း တေတုၵ်ႉၶ ဢွၼ်ၵၼ်ပၢႆႈ ၶဝ်ႈၼႂ်းမိူင်းၶႄႇ ယူႇတီႈၶႄႇၶဝ်ၵေႃႈ တေလႆႈႁူဝ်ၶႆႈ လွင်ႈၼႆႉ တေဢွၼ်ၵၼ်ႁူႉ တင်းၼမ်” ဝႃႈၼႆ။
ပူၼ်ႉမႃး မိူဝ်ႈပၢင်ၵုမ်လူင် ပၢင်လူင်ပွၵ်ႈၵမ်း 2 ၼၼ်ႉၵေႃႈ ယူႇတီႈၶႄႇ ယူႇၼႂ်းဝူင်ႈၵၢင်မၼ်းသေ ၸွႆႈၶပ်းၶိုင်ပၼ် လႄႈ ၸုမ်းဢူၺ်းလီပွတ်းႁွင်ႇ 7 ၸုမ်း ၸင်ႇလႆႈၶဝ်ႈႁူမ်ႈလဵပ်ႈႁဵၼ်း ၼႂ်းပၢင်ၵုမ်ၵႂႃႇ ဝႃႈၼႆ။
