ၸုမ်းၽွမ်ႉႁူမ်ႈလုၵ်ႈႁဵၼ်းတႆး TSU တုၵ်းယွၼ်းႁႂ်ႈသိုၵ်းၵဝ်ႉၵၢင်ႉ MNDAA ပွႆႇပၼ်ၶိုၼ်း လုၵ်ႈၸုမ်း ဢၼ်ၶဝ်တီႉၺွပ်း ဢဝ်ၵႂႃႇႁဵတ်းသိုၵ်းဝႆႉၼၼ်ႉ ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 24/11/2023 ၼၼ်ႉ ၸၢႆးၺုၼ်ႉ ဢႃယု 24 ပီ ၽူႈၶဝ်ႈၸုမ်းၽွမ်ႉႁူမ်ႈလုၵ်ႈႁဵၼ်းတႆး (Tai Students’ Union) ထုၵ်ႇသိုၵ်းၵဝ်ႈၵၢင်ႉ တီႉၺွပ်းဢဝ်ၵႂႃႇႁဵတ်းသိုၵ်း ႁၢၼ်ႉတေႃႇထိုင်ယၢမ်းလဵဝ် ပႆႇပွႆႇတူဝ်မႃး မီး ၶၢဝ်းတၢင်းၸမ် 3 လိူၼ်ယဝ်ႉ။  

ၽူႈၶဝ်ႈၸုမ်း TSU ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၸၢႆး တိုၵ်ႉဢွင်ႉပူၼ်ႉၸၼ်ႉသိပ်း ပႆႇႁိုင်ၶႃႈ တိုၵ်ႉတေ သိုပ်ႇၶိုၼ်ႈႁဵၼ်းထႅင်ႈယူႇ။ ၵူၺ်းၵႃႈ ယွၼ်ႉငဝ်းလၢႆးလၢႆလွင်ႈသေ မၼ်းပႆႇၸၢင်ႈၶိုၼ်ႈႁဵၼ်း ၵႂႃႇၵိၼ်ၸၢင်ႈႁေႃႈၵႃးတၢင်း လၢဝ်ႇၵၢႆးၼၼ်ႉ။ ၽွင်းၼၼ်ႉ မႅၼ်ႈမိူဝ်ႈၽႅၼ်ၵၢၼ်ယၼ်ႇသိုၵ်း 1027 ၸုမ်းဢူၺ်းလီ 3 ၸုမ်း လေႃႇတိုၵ်းသိုၵ်းမၢၼ်ႈ ႁၢဝ်ႈႁႅင်းလႄႈ ဢဝ်မၼ်းၸၢႆးၶမ်ဝႆႉတီႈလၢဝ်ႇၵၢႆးၼၼ်ႉ မွၵ်ႈလိူၼ်ၼိုင်ႈၼႆႉ ဝၢႆးပၢင်တိုၵ်းယဵၼ်လူင်းယဝ်ႉ မၼ်းၸၢႆးလႄႈ ဢူၺ်းၵေႃႉ ဢွၼ်ၵၼ်ပွၵ်ႈၶိုၼ်း မႃးႁိုၵ်ႉၺႃး သိုၵ်းၵဝ်ႈၵၢင်ႇ ၸွမ်းတၢင်းသေ ထုၵ်ႇတီႉၺွပ်း မိူဝ်ႈလဵဝ် မီးၶၢဝ်းတၢင်းမွၵ်ႈ 3 လိူၼ်ယဝ်ႉ ပႆႇပွႆႇမႃး”- ဝႃႈၼႆ။

လိူဝ်သေ ၸၢႆးၺုၼ်ႉ ၽူႈၶဝ်ႈၸုမ်း TSU ၺႃးတီႉယဝ်ႉ ဢူၺ်းၵေႃႉမၼ်းၸၢႆး ဢၼ်ပွၵ်ႈမႃးၸွမ်းၼၼ်ႉၵေႃႈ ၺႃးတီႉၸွမ်း ထႅင်ႈ 4 ၵေႃႉ ၼႂ်းၶဝ်တင်းမူတ်းၼၼ်ႉ ထုၵ်ႇသိုၵ်းၵဝ်ႈၵၢင်ႇ သူင်ႇၵႂႃႇဝႆႉဢွင်ႉတီႈပၢင်သဝ်း ၵဵပ်းသိုၵ်းမႂ်ႇၶဝ် ဝႃႈၼႆ။

“ၼႂ်းဢူၺ်းၵေႃႉ ၸၢႆးၺုၼ်ႉ ဢၼ်ထုၵ်ႇတီႉၺွပ်းၵႂႃႇၼၼ်ႉ လွတ်ႈဢွၵ်ႇမႃးၵေႃႉၼိုင်ႈသေ လၢတ်ႈၼႄဝႃႈ ၵူႈၵေႃႉ ဢၼ် ၺႃးၺွပ်းၼႆႉ သိုၵ်းၶဝ် ဢဝ်ၵႂႃႇဝႆႉဢွင်ႈတီႈၵဵပ်းသိုၵ်းမႂ်ႇ။ ၵဵဝ်ႇၵပ်းလွင်ႈၼႆႉသေ ယူႇတီႈ ၸုမ်း TSU ႁဝ်းၶႃႈ တုၵ်းယွၼ်း လၢတ်ႈထိုင်ၽူႈၵဵဝ်ႇၶွင်ႈလႄႈ ၽူႈမီးပုၼ်ႈၽွၼ်း ၼႂ်းတပ်ႉသိုၵ်းၵဝ်ႈၵၢင်ႉၶဝ် ႁႂ်ႈတူၺ်းထိုင်တႃႇၵၢၼ်လုၵ်ႉၽိုၼ်ႉ ၶၢဝ်း ယၢဝ်း။ ႁႂ်ႈတူၺ်းပၼ်သုၼ်ႇလႆႈၵူၼ်းၼုမ်ႇႁဝ်း ႁႂ်ႈပွႆႇလွတ်ႈပၼ်ၶိုၼ်းၵူႈၵေႃႉ။ ၸၢႆးၺုၼ်ႉၼႆႉၵေႃႈ ပဵၼ်ၵူၼ်းၼုမ်ႇ ဢၼ် ႁဵတ်းၵၢၼ်တႃႇပုၼ်ႈၵူၼ်းၼမ်လႄႈ ႁႂ်ႈပွႆႇပၼ်ၶိုၼ်းဝႆးဝႆးသေၵမ်း”- ၽူႈၶဝ်ႈၸုမ်း TSU သိုပ်ႇလၢတ်ႈၼႄၼင်ႇၼႆ။

ၵဵဝ်ႇလူၺ်ႈ လွင်ႈၵူၼ်းၼုမ်ႇ ထုၵ်ႇသိုၵ်းၵဝ်ႈၵၢင်ႉ တီႉၺွပ်းၼႆႉသေ ယူႇတီႈ ၸုမ်း TSU ၵပ်းသိုပ်ႇ ယိုၼ်လိၵ်ႈတုၵ်း ယွၼ်းလၢႆပႃႈလၢႆၾၢႆႇသေတႃႉ တေႃႇထိုင်မိူဝ်ႈလဵဝ် ပႆႇမီးၸုမ်းလႂ် ၶဝ်ႈၵႄႈလိတ်ႈပၼ်။ လွင်ႈသိုၵ်းၵဝ်ႈၵၢင်ႉ MNDAA ဢထမ်ႇမၵဵပ်းသိုၵ်းမႂ်ႇၼႆႉၵေႃႈ ယူႇတီႈ ၸုမ်း TSU ဢမ်ႇႁၼ်လီၸွမ်းၼႆ ၼႂ်းလိၵ်ႈပိုၼ်ၽၢဝ်ႇသၢၼ်ၶတ်းၼၼ်ႉ ပႃးဝႆႉ ၼင်ႇၼႆ။

ၼႂ်းဝၼ်းတီႈ 10/2/2024 ၼႆႉၵေႃႈ ၶွင်ႇသီႇသိုၵ်းမၢၼ်ႈ ယိုတ်းမိူင်း ပိုၼ်ၽၢဝ်ႇၵဵပ်းသိုၵ်းမႂ်ႇ လွင်ႈၼႆႉ ႁဵတ်းႁႂ်ႈၵူၼ်းၼုမ်ႇ ၼႂ်းမိူင်းႁူမ်ႈတုမ် ပတ်းပိုၼ်ႉ ၵိၼ်းၸႂ်ႁႅင်း ဢွၼ်ၵၼ်ႁႃတၢင်းပၢႆႈ ဢွၵ်ႇမိူင်းၼမ်။ ထႅင်ႈၾၢႆႇၼိုင်ႈၵေႃႈ သိုၵ်း RCSS တင်း SSPP ၵေႃႈ ပိုၼ်ၽၢဝ်ႇ ႁပ်ႉၵူၼ်းသိုၵ်းမႂ်ႇ မိူၼ်ၵၼ် ယိုင်ႈၶႅၼ်း ႁဵတ်းႁႂ်ႈၵူၼ်းၼုမ်ႇၼႂ်းမိူင်းတႆး ဢွၼ်ၵၼ်ဝူၼ်ႉ ၵႂင်မႆႈၸႂ် ၵူဝ်လႆႈႁၢပ်ႇထၢမ်းၵၢၼ်သိုၵ်း – ၵူၼ်းၼုမ်ႇတႆး ပွတ်းၸၢၼ်း ၵေႃႉၼိုင်ႈလၢတ်ႈ။