လုၵ်ႈႁဵၼ်းတႆး ဢၼ်ၵႂႃႇႁဵၼ်းယဝ်ႉ တီႈၵုင်းထဵပ်ႈ လႄႈ ၵဵင်းမႆႇၸိူဝ်းၼၼ်ႉ ႁူမ်ႈၵၼ်ႁပ်ႉၸုမ်ႈၶူး တီႈၸၼ်ႉ ၸွမ်မႁႃၸုလႃးလူင်းၵွၼ်း ဝင်းၼွႆႉ မိူင်းၵဝ်ႇ ဢႃယုတ်ႉထယႃး မိူဝ်ႈႁူဝ်လိူၼ်မေႊၼႆႉ ဝႃႈၼႆ။
ဝၼ်းတီႈ 12-13/05/2018 ၶၢဝ်းတၢင်း 2 ဝၼ်း ယူႇတီႈၸၼ်ႉၸွမ်မႁႃၸုလႃးလူင်းၵွၼ်း ဢယုတ်ႉထယႃး ဝင်းၼွႆႉ ၸိုင်ႈထႆး မွပ်ႈယိုၼ်ႈၸုမ်းၶူး ပၼ်လုၵ်ႈႁဵၼ်း တင်းမူတ်း ႁိမ်း 5000 ၵေႃႉ ၼႂ်းၼၼ်ႉ ပႃးလုၵ်ႈႁဵၼ်းၵူၼ်းႁိူၼ်း/ သင်ၶတႆး တင်းၼမ် ဢၼ်ယူႇတီႈၵုင်းထဵပ်ႈ(မိူင်းၵွၵ်ႇ)၊ ၵဵင်းမႆႇလႄႈ ထႅင်ႈလၢႆတီႈသေ ၶိုၼ်ႈႁဵၼ်းယဝ်ႉၵႂႃႇၼၼ်ႉ ဝႃႈၼႆ။
ၸဝ်ႈၶူးၶမ်းလႅင်း ၶေႇမိၼ်ႇတ ဢၼ်ႁဵၼ်းယဝ်ႉၸၼ်ႉ B.A လၢတ်ႈတီႈၽူႈတွႆႇႁွၵ်ႈဝႃႈ “ တီႈၵုင်းထဵပ်ႈတႄႉ သင်ၶ/ ၵူၼ်းႁဵၼ်းၸိူဝ်းႁဵၼ်းယဝ်ႉၸုပ်ႈၼႆႉ မီး 28 ၵေႃႉ။ မီးလုၵ်ႈႁဵၼ်းတႆးႁဝ်း ဢၼ်ၶိုၼ်ႈႁဵၼ်းၸၼ်ႉၸွမ် မႁႃၸုလႃးလူင်း ၵွၼ်း ၵူႈတီႈတီႈမႃးႁပ်ႉ။ ပႃးတင်းၵဵင်းမႆႇၵေႃႈ မႃးႁပ်ႉ။ ပီၼႆႉ တေလႆႈဝႃႈ တၵ်ႉၵႃႇသတ်ႉထႃး ပီႈၼွင်ႉတႆး မႃးႁူမ် ၸူမ်းၸွမ်းၵေႃႈမီးတင်းၼမ်။ ယူႇတီႈလုၵ်ႈႁဵၼ်းသင်ၶတႆးႁဝ်းၶႃႈ လႆႈႁပ်ႉၸုမ်ႈၶူးတီႈ ၸၼ်ႉၸွမ်မႁႃၸုလႃး ဝင်းၼွႆႉ ပီၼႆႉ ပဵၼ်ၸုပ်ႈတီႈ 9 ” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈလုၵ်ႈႁဵၼ်းတႆး ၸိူဝ်းဢၼ်ႁဵၼ်းယဝ်ႉတီႈ ၸၼ်ႉၸွမ်မႃႁႃၸုလႃး လူင်းၵွၼ်း တီႈၵဵင်းမႆႇ ၵေႃႈမီးတင်းၼမ်၊ ဢၼ်ၵႂႃႇႁပ်ႉ တီႈဝဵင်းဢယုတ်ႉထယႃးတႄႉ မီး 3 ၵေႃႉ ဝႃႈၼႆ။
ယိင်းႁွမ်ႁၵ်ႉၶိူဝ်း ဢၼ်ႁဵၼ်းယဝ်ႉၸၼ်ႉ B.A တီႈၵဵင်းမႆႇ လၢတ်ႈတီႈၽူႈတွႆႇႁွၵ်ႈဝႃႈ “ တၢင်းၵဵင်းမႆႇႁဝ်းၶႃႈတႄႉ ၵႂႃႇၵၼ် 3 ၵေႃႉ။ ၸၢႆး 2 ၵေႃႉ၊ ယိင်း ၵေႃႉၼိုင်ႈ။ တင်းမူတ်းဢၼ်ႁဵၼ်းယဝ်ႉၵႂႃႇတႄႉ မီးႁိမ်း 20 ၵေႃႉ ဢၼ်လႆႈ ႁပ်ႉႁူႉ။ လိူဝ်ၼၼ်ႉ သင်ၶၸဝ်ႈဢၼ်ၵႂႃႇႁပ်ႉၵေႃႈမီးယူႇ ၵူၺ်းၵႃႈ ဢမ်ႇလႆႈႁူႉသဵၼ်ႈသၢႆမၢႆ။ လွင်ႈလႆႈၵႂႃႇႁပ်ႉၸုမ်ႈ ၶူးၼႆႉ တေလႆႈဝႃႈ ပဵၼ်ဢၼ်လၢၵ်ႇလၢႆးလိူဝ်သေ ဢၼ်ႁဝ်းၶႃႈၾိုၵ်းႁပ်ႉတီႈၵဵင်းမႆႇ။ တီႈၸၼ်ႉၸွမ် ဝင်းၼွႆႉၼၼ်ႉ မီးပၵ်းပိူင်ၶႅမ်ႉလႅပ်ႈလီသေ မိူဝ်ႈႁဝ်းၾိုၵ်း” ဝႃႈၼႆ။
လုၵ်ႈႁဵၼ်းသင်ၶတႆး 28 တူၼ်/ ၵေႃႉ တီႈၵုင်းထဵပ်ႈ ဢၼ်ႁပ်ႉၸုမ်ႈၶူး ပီ 2018 ႁူဝ်လိူၼ်မေႊၼႆႉ ၸၼ်ႉ Ph.D 1 တူၼ်၊ ၸၼ်ႉ M.A 3 တူၼ်လႄႈ ၸၼ်ႉ B.A 24 တူၼ်။ ဢၼ်လႆႈပႃးလၢဝ်ၸွင်ႈ သမ်ႉမီး 10 တူၼ် ဝႃႈၼႆ။
ယူႇတီႈၸၼ်ႉၸွမ်မႁႃၸုလႃးလူင်းၵွၼ်းၼႆႉ မွပ်ႈယိုၼ်ႈၸုမ်ႈၶူးလုၵ်ႈႁဵၼ်း တင်းမူတ်း ႁိမ်း 5000 ၵေႃ ။ မွပ်ႈယိုၼ်ႈပၼ်ပႃး လုၵ်ႈႁဵၼ်းဢၼ်ၶိုၼ်ႈၸၼ်ႉၸွမ်မႁႃၸုလႃးလူင်းၵွၼ်းလႄႈႁူမ်ႈလူၺ်ႈ ၵိင်ႇၽႄ ထႅင်ႈ 11 ၸၼ်ႉၸွမ် ၼႂ်းမိူင်း/ ၼွၵ်ႈမိူင်း ဝႃႈၼႆ။
ၸၼ်ႉၸွမ်မႁႃၸုလႃးလူင်းၵွၼ်းၼႆႉ ပဵၼ်ၸၼ်ႉၸွမ်ၸဝ်ႈမုၼ်ယႂ်ႇၶုၼ်ႁေႃၶမ်းထႆးတင်ႈဝႆႉ။ ပိူင်လူင်ပူင်သွၼ်ပၼ် ၵဵဝ်ႇၵပ်းသႃသၼႃၼႆသေတႃႉ တၢင်ႇပၢႆးၵေႃႈမီး၊ ၵူၼ်းႁိူၼ်းၵေႃႈၶဝ်ႈႁဵၼ်းမႃးၼမ်။
