ပၢင်တိုၵ်း တီႈမူႇၸေႊ မိူဝ်ႈဝၼ်းသဝ်ပူၼ်ႉမႃးၼၼ်ႉ ၵူၼ်းၸၢဝ်းၶႄႇ 3 ၵေႃႉ ထုၵ်ႇၺႃးယိုဝ်းတၢႆသေ လႆႈၽဝ်ႇ ၶၢပ်ႈတူဝ် ဢဝ်တဝ်ႈလုပ်ႇသူင်ႇထိုင် ပီႈၼွင်ႉၸၢဝ်းၶိူဝ်းၶႄႇၶဝ် တၢင်းပွတ်းမိူင်းၶႄႇ ဝႃႈၼႆ။
ဝၼ်းတီႈ 14/05/2018 ၽူႈမီးပုၼ်ႈၽွၼ်းပလိၵ်ႈ ၸႄႈဝဵင်းမူႇၸေႊ လႆႈဢဝ်ၽဝ်ႇၶၢပ်ႈတူဝ်ၵူၼ်းမိူင်းၶႄႇ 3 ၵေႃႉ သႂ်ႇၼႂ်း မေႃႈလိၼ် 3 ဢုမ်သေ သူင်ႇၸူးၽူႈမီးပုၼ်ႈၽွၼ်းၸဝ်ႈၼႃႈတီႈပလိၵ်ႈၶႄႇလႄႈ ၸိူဝ်ႉၶိူဝ်းပီႈၼွင်ႉၵူၼ်း ၸိူဝ်းလူႉ တၢႆ။ မိူဝ်ႈဝၼ်းတီႈ 13 သမ်ႉ ၽူႈမီးပုၼ်ႈၽွၼ်းၶဝ် လႆႈၽဝ်ၶၢပ်ႈတူဝ် တီႈပႃႇႁဵဝ်ႈၸႄႈဝဵင်းမူႇၸေႊၵႂႃႇ” ဝႃႈၼႆ။
ဢူးဢေးမိၼ်ႉ ၵႅမ်ၽူႈၵွၼ်းပလိၵ်ႈၸႄႈဝဵင်းမူႇၸေႊ လၢတ်ႈတီႈသိုဝ်ႇၶၢဝ်ႇ 7Day ဝႃႈ “ မိူဝ်ႈဝႃး လႆႈဢွၼ်ၵၼ် ၽဝ်ၶၢပ်ႈတူဝ်ၶဝ်သေ ၵဵပ်းတဝ်ႈလုပ်ႇသႂ်ႇၼႂ်းမေႃႈလိၼ် သူင်ႇပၼ်ၵႂႃႇတၢင်းမိူင်းၶႄႇယဝ်ႉ။ ၵူၼ်းဢၼ်တၢႆၼႆႉ ယူႇတၢင်းမိူင်းၶႄႇသေ ၶဝ်ႈမႃးႁဵတ်းၵၢၼ်တၢင်း ၼႆႉ”ဝႃႈၼႆ။
ၵူၼ်းၸၢဝ်းၶႄႇ 3 ၵေႃႉ ဢၼ်လႆႈလူႉတၢႆ ၼႂ်းပၢင်တိုၵ်းၼၼ်ႉ ပဵၼ်ၽူႈၸၢႆးဢႃယု 28 ပီ ၵေႃႉၼိုင်ႈ၊ ၽူႈၸၢႆးဢႃယု 29 ပီ ၵေႃႉၼိုင်ႈလႄႈ ၽူႈယိင်းဢႃယု 19 ပီ ၵေႃႉၼိုင်ႈ။ ၶဝ် 3 ၵေႃႉၼႆႉ ပဵၼ်ၵူၼ်းမိူင်းမၢဝ်း ၼႃႈ လိၼ်ၽွင်းငမ်း တူဝ်ၵဝ်ႇ တႆးတႂ်ႈၶူင်း မိူင်းၶႄႇ ဝႃႈၼႆ။
မိူဝ်ႈဝၼ်းတီႈ 12/05/2018 ယၢမ်းၵၢင်ၼႂ် မွၵ်ႈ 5 မူင်း ၼၼ်ႉ သိုၵ်းတဢၢင်း TNLA ၶဝ်ႈယိုဝ်း သိုၵ်းလူင်ပွင် ၸိုင်ႈမၢၼ်ႈ ၊ ပလိၵ်ႈမၢၼ်ႈလႄႈ ၸုမ်းပျီႇတူႉၸိတ်ႉ တီႈၶူဝ်ၼမ်ႉပေႃႈ၊ တႃႈႁိူဝ်းၼွင်ယၢင်း၊ ၸႄႈလၢၼ်ႉလႄႈ ၼႂ်းၸႄႈဝဵင်းမူႇၸေႊ လၢႆတီႈ။ ၼႂ်းဝၼ်းလဵဝ်ၵူၺ်း ၵူၼ်းမိူင်းၺႃးၸၢၵ်ႇလူႉတၢႆ 19 ၵေႃႉ၊ မၢတ်ႇၸဵပ်း 27 ၵေႃႉ။ ထိုင်မႃး ဝၼ်းတီႈ 13 သမ်ႉ ၼႂ်းၵူၼ်းမၢတ်ႇၸဵပ်း 27 ၼၼ်ႉ လႆႈလူႉတၢႆ ထႅင်ႈၵေႃႉၼိုင်ႈ တီႈႁူင်းယႃၵူၼ်းမိူင်း ဝဵင်းလိူဝ်ႇ တေႃႈလဵဝ် ၵူၼ်းဢၼ်လႆႈလူႉတၢႆၵႂႃႇ တင်းမူတ်း မီး 20 ၵေႃႉ မၢတ်ႇၸဵပ်း 26 ၵေႃႉ ဝႃႈၼႆ။
