ၸုမ်းယိပ်းၵွင်ႈၵၢင်ႇၶျၢင်း ဢၼ်ၵုမ်း ၽႅၼ်လိၼ်မိူင်းၶျၢင်းလႆႈဝႆႉ ႁူဝ်ပၢၵ်ႇ 75 % ၼၼ့် ၸတ်းႁဵတ်း ပၢင်ၵုမ် Chinland ၶွင်ႇသီႇ ပွၵ်ႈၵမ်း 2 သေ ၶွတ်ႇၽွတ်ႈ လူင်ပွင်ၸိုင်ႈမိူင်းၶျၢင်း – ဝႃႈၼႆ ။
ပၢင်ၵုမ်ၼႆ့ လႆႈၸတ်းႁဵတ်းၵႂႃႇ ၼႂ်းဝၼ်းထီ့ 22-23 လိူၼ် January တီႈဝဵင်း ၶျိၼ်းလူင်ႇ ၊ ငဝ်ႈငုၼ်း CNF မိူင်းၶျၢင်း ။
တွၼ်ႈတႃႇတေၶွတ်ႇၽွတ်ႈ ၸုမ်းၽွင်းလူင် ၊ ၽူႈၶဝ်ႈၸုမ်း လူင်ပွင်ၸိုင်ႈ ၊ ၽူႈထတ်းသိၼ် ၾၢႆႇလုမ်းတြႃး လႄႈ ၽူႈၶဝ်ႈၸုမ်း ၾၢႆႇႁဵတ်းၵၢၼ် ၼႂ်းလုမ်းတြႃး ၸိူဝ်းၼႆ့ၵေႃႈ တေလိူၵ်ႈသေ ၶွတ်ႇၽွတ်ႈႁဵတ်းသၢင်ႈၵႂႃႇ ႁႂ်ႈယဝ့်တူဝ်ႈ ၼႂ်းဝူင်ႈၼႆ့ ၼႆ – ၶွင်ႇသီႇ Chinland ပိုၼ်ၽၢဝ်ႇဝႆ့ မိူဝ်ႈဝၼ်းထီ့ 23 ၼင်ႇၼႆ ။
တီႈၼႂ်းပၢင်ၵုမ်ၼၼ့် လႆႈဢုပ်ႇၵုမ်ၵၼ် ပႃး တွၼ်ႈတႃႇ တေမွပ်ႈဢၢပ်ႈ ၸၼ့်ၼႃႈ တီႈ ပုၼ်ႈၽွၼ်း မိူၼ်ၼင်ႇ ၸွမ်ၽွင်းလူင် ၼႂ်းၸုမ်းလူင်ပွင်ၸိုင်ႈ ၶျိၼ်းလႅၼ်း ၊ ၸၼ့်ၽွင်းလူင် ၊ ၸွမ်ၽူႈတၢင် လၢတ်ႈ ၊ ၸွမ်ၽူႈထတ်းသဵၼ်ႈမၢႆ ၊ ၸွမ်ၽူႈထတ်းသိၼ် ၼႂ်းလုမ်းတႅပ်းတတ်း တြႃး Supreme Court of Chinland လႄႈ ၸၼ့်ၽူႈထတ်းသိၼ် ၸိူဝ်းၼႆ့ – ဝႃႈၼႆ ။
တွၼ်ႈတႃႇ ၸၼ့်ၼႃႈၵၢၼ် ၸိူဝ်းၼႆ့ လႆႈတႄႇလိူၵ်ႈဢဝ်ၵႂႃႇ ၸွမ်းၼင်ႇ တီႈၼႂ်းသဵၼ်ႈမၢႆ ဢၼ်ၵူႈမူႇ ၵူႈၸုမ်း သူင်ႇယိုၼ်ႈ မႃးပၼ်ၼၼ့်ယဝ့် – ဝႃႈၼႆ ။
မိူဝ်ႈဝၼ်းထီ့ 16 လိူၼ် January ပီ 2024 ၼႆ့ ၸုမ်း ၶျိၼ်းလႅၼ်း ၶွင်ႇသီႇ ဢွၼ်ႁူဝ်သေ လႆႈဢုပ်ႇဢူဝ်းၵၼ်တင်း တပ့်သိုၵ်း ၸိူဝ့်ၸၢတ်ႈၶျၢင်း (CNF/CAN) လႄႈ ၽူႈမီးပုၼ်ႈၽွၼ်း ၾၢႆႇၵႅတ်ႇၶႄ ၼႂ်းပိုၼ့်တီႈ ။ ဝၢႆးလင် ပၢင်ဢုပ်ႇၵုမ်ၼၼ့်ယဝ့် ၸင်ႇလႆႈတႄႇ ဢုပ်ႇၵုမ် တႃႇတေၶွတ်ႇၽွတ်ႈ ႁွင်ႈၵၢၼ်ၽွင်းလူင် ၾၢႆႇၵႅတ်ႇၶႄႇ လႄႈ ၸုမ်းလူင်ပွင်ၸိုင်း ၶျိၼ်းလႅၼ်း ထႅင်ႈ – ဝႃႈၼႆ။
ၼႂ်းၸုမ်း ၶျိၼ်းလႅၼ်း ၶွင်ႇသီႇ ယၢမ်းလဵဝ်ၼႆ့ မီး ၸုမ်းၵႅတ်ႇၶႄ မိူင်းၶျၢင်း 14 ၸုမ်း ၊ CNF/CAN လႄႈ တႅၼ်းၽွင်းၶျၢင်း ၵမ်ႈၽွင်ႈသေ ၶွတ်ႇၽွတ်ႈဝႆ့ – ဝႃႈၼႆ ။
