ၶမ်ႈၶိုၼ်း ဝၼ်းတီႈ 19 လႄႈ 20 ၵျႅၼ်ႊၼိဝ်ႊရီႊၼႆႉ ဢိင်ၼိူဝ်ၸဝ်ႈပၢႆးမၢၵ်ႈမီးဢၼ်ၼိုင်ႈ ၼႂ်းမိူင်းထႆးဢွၼ်ၶိုင်ပွင်ၸတ်းႁဵတ်းပၢင်မူၼ်ႈသိူဝ်းႁွင်ႉၽဵင်းၵႂၢမ်းတႆး သႂ်ႇၸိုဝ်ႈဝႃႈ – “ไทใหญ่ เฟสติวัล ออนทัวร์” (ထႆးယႆႇ ၾႅတ်ႉသ်တီႊဝိူဝ်ႊလ် ဢွၼ်ႊထူဝ်ႊ) ၼႆသေ ၽူႈႁွင်ႉၵႂၢမ်းတႆးၸိုဝ်ႈသဵင်ယႂ်ႇ 10 ၵေႃႉ တေမူၼ်ႈၸႂ်ပၼ်တီႈ Central Airport Plaza (ၵၢတ်ႇ ဢႄးၽွတ်ႇ) ဝဵင်းၵဵင်းမႂ်ႇ ၸိုင်ႈထႆး။
တေမီးၽူႈႁွင်ႉၵႂၢမ်းတႆး ၸၢႆးႁၢၼ်လႅင်း ၸၢႆးလွမ်ႉဝုၼ်း ၸၢႆးဢွင်ႇမိူင်း The Sai ၸၢႆးသၢႆလိူၼ် ၸၢႆးၸွမ်လိူၼ် ၼၢင်းမူၺ်သႂ် ၼၢင်းၼွင်ႉၼူၼ်း ၼၢင်းသႅင်ဢွၼ်ႇ လၢဝ်ၼုမ်ႇႁွမ် ၸိူဝ်းၼႆႉ ႁွင်ႉၵႂၢမ်းမူၼ်ႈၸႂ်။
ၵႃႈၶဝ်ႈတူၺ်းပၼ်ႁႅင်း ၵေႃႉ 150 ဝၢတ်ႇ တေႃႇၶမ်ႈ။
ၾၢႆႇတၢင်းၸဝ်ႈပၢႆးမၢၵ်ႈမီးဢွၼ်ၸတ်းပၢင်ပွႆး ပိုၼ်ၽၢဝ်ႇဝႆႉတီႈ ၶၢဝ်ႇၵဵင်းမႂ်ႇၼိဝ်းသ် ဝႃႈ – ၵူၼ်းမႃးၶဝ်ႈႁူမ်ႈတူၺ်းပွႆး တၵ်းတေလႆႈမီးဢႃယု 20 ပီၶိုၼ်ႈၼိူဝ်။ တေဢမ်ႇလႆႈၽိတ်းမေႃးပေႃႉႁႅမ်ၵၼ်ၼႂ်းပွႆးလႄႈႁိမ်းႁွမ်းပွႆး။ သင်ၸိူဝ်ႉပူၼ်ႉပႅၼ်ၶေႃႈႁၢမ်ႈၸိုင် တေဢဝ်လိူင်ႈပၼ်တူတ်ႈတၢမ်ႇမႂ်ငိုၼ်း 2 လၢၼ်ႉဝၢတ်ႇ – ဝႃႈၼႆဝႆႉ။
ၼႂ်း2-3 လိူၼ်မႃးၼႆႉ တီႈဝဵင်းၵဵင်းမႂ်ႇၸိုင်ႈထႆးမီးၶၢဝ်ႇလိုဝ်းလင်မႃးၶိုၼ်းဝႃႈ – ၸုမ်းလုၵ်ႈဢွၼ်ႇၵူၼ်းၼုမ်ႇသႅၼ်းပၢၼ်သိၵ်းႁိၵ်း ၶီႇရူတ်ႉၶိူင်ႈၸွမ်းၵၼ် 2 ၵေႃႉၼိုင်ႈလမ်း၊ တႃႇရူတ်ႉၶိူင်ႈႁူဝ် 20 လမ်း ပၼ်ႇႁွၼ်ႈၼႂ်းတူဝ်ဝဵင်းၵဵင်းမႂ်ႇ ဢႅဝ်ႇ ႁႃၽိတ်းမေႃးပေႃႉထုပ်ႉၵူၼ်းၼိူဝ်တၢင်း၊ သူင်ႇသဵင်လင်မေႃးမႄးႁဵတ်းႁႂ်ႈၵူၼ်းမိူင်းၼႂ်းပွၵ်ႉၼႂ်းယွမ်ႇဢမ်ႇၸၢင်ႈလပ်း ဢမ်ႇၸၢင်ႈၼွၼ်း။ လွင်ႈၼႆႉသိုဝ်ႇၶၢဝ်ႇၼႂ်းမိူင်းၵဵင်းမႂ်ႇလႄႈ ပလိၵ်ႈထႆးတႄႉၼႄးဝႆႉဝႃႈပဵၼ်ၵူၼ်းၼုမ်ႇႁႅင်းၵၢၼ်တႆး။ ဢၼ်တီႉၺွပ်းလႆႈ မၢင်ပွၵ်ႈၵေႃႈပဵၼ်လုၵ်ႈဢွၼ်ႇတႆး မၢင်ပွၵ်ႈၵေႃႈဢမ်ႇၸႂ်ႈလုၵ်ႈဢွၼ်ႇတႆး။
