ပၢင်တိုၵ်း တီႈမိူင်းမိတ်ႈ တုမ်ႉတိူဝ်ႉ ၵူၼ်းမိူင်းမၢတ်ႇတၢႆ ၸွမ်းၼမ်

ပၢင်တိုၵ်း တီႈဝဵင်းမိူင်းမိတ်ႈ ပဵၼ်ႁႅင်း တုမ်ႉတိူဝ်ႉႁိူၼ်းယေး ဝတ်ႉဝႃးၽႃသိူဝ်ႇလႄႈ ၵူၼ်းမိူင်း မၢတ်ႇၸဵပ်းလူႉတၢႆၸွမ်းၼမ်။  

တႄႇဢဝ် ဝၼ်းတီႈ 18/1/2024 ယၢမ်းၵၢင်ၼႂ် 5:45 မူင်း သိုၵ်းၶၢင် KIA သိုၵ်းတဢၢင်း TNLA လႄႈ ၸုမ်းၵႅတ်ႇၶႄ ၵူၼ်းမိူင်း PDF ႁူမ်ႈၵၼ် လေႃႇတိုၵ်းတပ်ႉသိုၵ်းမၢၼ်ႈ – ႁူင်းပလိၵ်ႈမၢၼ်ႈ ၼႂ်းဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ် ယိုဝ်းၸွႆႈထႅင်ႈ ႁၢဝ်ႈႁႅင်း။

ၵူၼ်းပိုၼ်ႉတီႈ ဝဵင်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး ဝၼ်းတီႈ 18 ၼႆႉ သိုၵ်းမၢၼ်ႈ မႃးပွႆႇမၢၵ်ႇ ၸွမ်းဝၢၼ်ႈ ၸွမ်းဝဵင်းၼႆႉ တင်းၼမ်။ သိုၵ်းမၢၼ်ႈထွႆၵေႃႈ သိုၵ်း KIA , TNLA , PDF လမ်းသိုၵ်းမၢၼ်ႈ ၽႅဝ်ၼႂ်းဝဵင်းဢေႃႈ။ မိူဝ်ႈၼႆႉ ၸဵမ်ၸဝ်ႉ သဵင်ၵွင်ႈတႄႇတႅၵ်ႇထႅင်ႈယဝ်ႉ”- ဝႃႈၼႆ။

ဢိင်ၼိူဝ် လွင်ႈပၢင်တိုၵ်း တီႈဝဵင်းမိူင်းမိတ်ႈၼႆႉသေ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်မႅင်းမီႈ ထႅမ်ႁႅင်းသိုၵ်း မႃးတၢင်းဝဵင်းမိူင်း မိတ်ႈၼႆႉ ထႅင်ႈလၢႆလမ်း။ ယွၼ်ႉပၢင်တိုၵ်းၼႆႉသေ တုမ်ႉတိူဝ်ႉၵူၼ်းမိူင်းမၢတ်ႇၸဵပ်းလူႉတၢႆ ၸွမ်းၼမ်။

“ဝတ်ႉမုၼ်ၸဝ်ႈ၊ ႁိူၼ်းယေး ၵူၼ်းမိူင်းမိတ်ႈၼႆႉ လူႉၵွႆထုၵ်ႇၾႆးမႆႈၼမ်။ ၵူၼ်းမိူင်းမၢတ်ႇၸဵပ်းလူႉတၢႆၸွမ်းတႄႉ ဢမ်ႇယွမ်း 10 ။ သိုၵ်းတင်းသွင်ၾၢႆႇၵေႃႈ မၢတ်ႇၸဵပ်းလူႉတၢႆၼမ်ဢေႃႈ တူဝ်တၢႆ သိုၵ်းၸိူဝ်းၼၼ်ႉ ပႆႇၶၢႆႉတီႈၶႃႈ ပွႆႇဝႆႉၸိူင်ႉ ၼၼ်ဢေႃႈ ယွၼ်ႉဢမ်ႇမီးၵူၼ်းၽဵဝ်ႈ။ တီႈၵျွင်းဢႃႇသၢမ်ႇၵေႃႈ သိုၵ်းမၢၼ်ႈတၢႆဝႆႉ 2 ၵေႃႉ လင်ၵွင်းမူးထႅင်ႈလၢႆၵေႃႉ ၼၼ်ႉၵေႃႈ ပႆႇမီးၵူၼ်းၽဵဝ်ႈ တူဝ်တၢႆၶဝ်”- ၵူၼ်းပိုၼ်ႉတီႈ ဝဵင်း မိူင်းမိတ်ႈ သိုပ်ႇလၢတ်ႈၼင်ႇၼႆ။

ယွၼ်ႉပၢင်တိုၵ်းၼႆႉသေ ဢၼ်တုမ်ႉတိူဝ်ႉဝတ်ႉမုၼ်ၸဝ်ႈလႄႈ ႁိူၼ်းယေးၵူၼ်းဝၢၼ်ႈ လူႉၵွႆၼမ်ႁႅင်း ပဵၼ်ဝၢၼ်ႈသူၺ်ႇၸႃႇလီႇလႄႈ ဝၢၼ်ႈဢႃႇသၢမ်ႇ ၸိူဝ်းၼႆႉ။ ယၢမ်းလဵဝ် ၸဵမ်ၵူၼ်းမိူင်းလႄႈ သင်ၶၸဝ်ႈ ဢွၼ်ၵၼ်ပၢႆႈဢွၵ်ႇဝၢၼ်ႈမူတ်းယဝ်ႉ ဝႃႈၼႆ။

တင်ႈတႄႇ ဝၼ်းတီႈ 18 ၼႆႉမႃး ႁၢၼ်ႉတေႃႇထိုင် ဝၼ်းတီႈ 19 ယၢမ်းၵၢင်ၼႂ်ၼႆႉ သိုၵ်း KIA ၊ သိုၵ်း TNLA လႄႈ PDF ႁူမ်ႈၵၼ် လေႃႇတိုၵ်း တပ်ႉသိုၵ်းမၢၼ်ႈ မႃးႁၢဝ်ႈႁႅင်း တီႈဝဵင်းမိူင်းမိတ်ႈၼႆႉ ထိုင်ယၢမ်လဵဝ် ပႆႇၵုမ်းလႆႈဝဵင်း ဝႃႈၼႆ။