ၼႂ်းဝူင်ႈဝၢင်ႈၼႆႉ သိုၵ်းမၢၼ်ႈၵူႈၸႄႈဝဵင်းၸီႉသင်ႇ ၵူၼ်းမိူင်းလႄႈသင်ႇၶႃႇၸဝ်ႈၼႂ်းပိုၼ်ႉတီႈ ႁႂ်ႈလွတ်ႈႁေႃးပရိတ်ႈလူင် လႄႈ ၼႄၵၢင်ၸႂ်သၢၼ်ၶတ်းသိုၵ်းၵဝ်ႈၵၢင်ႉ MNDAA ဢၼ်ယႃႉၵွင်းမူးတီႈလၢဝ်ႇၵၢႆး ၼႃႈလိၼ်သိုၵ်းၵဝ်ႈၵၢင်ႉတူင်ႉ ၼိုင်။

မိူဝ်ႈဝၼ်းတီႈ 12/01/2024 သိုၵ်းမၢၼ်ႈလႄႈ PNO ႁူမ်ႈၵၼ်ၼႄၵၢင်ၸႂ်သၢၼ်ၶတ်း MNDAA ယဝ်ႉၵမ်းၼိုင်ႈ။ ဝၼ်းတီႈ 13/01/2024 ႁဵတ်းတီႈမိူင်းသၢတ်ႇ မိူင်းၽျၢၵ်ႈၸိူဝ်းၼႆႉသေ ယၢမ်းလဵဝ်ၵေႃႈ မီးၶၢဝ်ႇဢွၵ်ႇမႃးဝႃႈ ၸႂ်ႉၵူၼ်းမိူင်းၼႂ်း ၸႄႈဝဵင်းၼမ်ႉၸၢင်၊ မိူင်းၼၢႆး ၊ လၢင်းၶိူဝ်း ၊မိူင်းပၼ်ႇၸိူဝ်းၼႆႉၸတ်းႁဵတ်းယူႇ ဝႃႈၼႆ။

ၼႂ်းမိူင်းတႆးၵူၺ်းဢမ်ႇၵႃး တီႈၸႄႈဝဵင်းႁူမ်ႈမၢၵ်ႇလူင်း တိူင်းၸႄႈၵႅင်းၵေႃႈ သိုၵ်းမၢၼ်ႈဢွၼ်ႁူဝ်ၸတ်းႁဵတ်းလွင်ႈ ဢွၵ်ႇၼႄၵၢင်ၸႂ်ၵႂႃႇမိူဝ်ႈဝၼ်းတီႈ 14/01/2024 ။ တီႈဝဵင်းမူင်ႇယႂႃႇ၊ သူၺ်ႇပူဝ်ႇ ၸိူဝ်းၼႆႉၵေႃႈ တဵၵ်းၸႂ်ႉႁဵတ်းၵႂႃႇယဝ်ႉ- ၶၢဝ်ႇတႆးလႅင်ဢွၵ်ႇဝႆႉၼင်ႇၼႆ။

ၽွင်းပၢင်တိုၵ်း 1027 ႁူဝ်လိူၼ်ၵျၼ်ႊၼိဝ်ႊရီႊၼႆႉၼၼ်ႉ မီးၶလိပ်ႉဝီႊတီႊဢူဝ်ႊဢၼ်ၼိုင်ႈၽႄႈလၢမ်းမႃးတၢင်း ဢွၼ်ႊလၢႆႊ။ သိုၵ်းၵဝ်ႈၵၢင်ႉ 2 ၵေႃႉ ပေႃႉထုပ်ႉၵွင်းမူးသူႇၼိုင်ႈဢၼ်မီးတီႈၼိူဝ်ၵွင်းလွႆ ပႂၢႆႉ 2202 ။ ဝၢႆးၼၼ်ႉ မိူဝ်ႈဝၼ်းတီႈ 9/1/2024 ၾၢႆႇသိုၵ်းၵဝ်ႈၵၢင်ႉ ပိုၼ်ၽၢဝ်ႇလိၵ်ႈၽိုၼ်ၼိုင်ႈ ပႃးဝႆႉဝႃႈ – ၵွင်းမူးၼၼ်ႉပဵၼ်ၵွင်းမူးဢၼ်သိုၵ်းမၢၼ်ႈၵေႃႇဝႆႉ၊ သိုၵ်းၵဝ်ႈၵၢင်ႉဢၼ်ယႃႉၵွင်းမူးၼၼ်ႉၵေႃႈ မၼ်းၸၢႆးဢမ်ႇလႆႈႁပ်ႉၶေႃႈပူင် ၸီႉသင်ႇသင်သေ မၼ်းယႃႉလူၺ်ႈသုၼ်ႇတူဝ်မၼ်းၵူၺ်း ၊ ၵွပ်ႈၼႆလႄႈ ယူႇတီႈၸုမ်းသိုၵ်းၵဝ်ႈၵၢင်ႉတေၵူတ်ႇထတ်း ထဵတ်ႈထၢမ်လီငၢမ်းသေ တေပၼ်တူတ်ႈတၢမ်ႇၵႂႃႇ။ ဢၼ်ၶလိပ်ႉဝီႊတီႊဢူဝ်ႊဢွၵ်ႇမႃးၽႄႈလၢမ်းသေႁဵတ်းႁႂ်ႈၸၢဝ်းပုတ်ႉထၽႃႇသႃႇလႆႈတုမ်ႉတိူဝ်ႉၸႂ်ၼၼ်ႉၵေႃႈ – ယူႇတီႈသိုၵ်း MNDAA သေ ယွၼ်းၼွမ်းတွင်းပၢၼ်ႇယႂ်ႇၼမ်ဝႃႈၼႆဝႆႉ။