ၼႂ်းၸႄႈဝဵင်းၼမ်ႉၸၢင် ၾူၼ်လူင် လူမ်းလႅင်ႉၽတ်ႉပဝ်ႇ ႁၢဝ်ႈႁႅင်း လင်ၶႃးမုင်း ႁူင်းၵဵပ်းၶူဝ်းၶွင်(ပွဲရုံ) လႄႈ သဝ်ၾႆးၾႃႉႁိမ်းၶၢင်ႈ တၢင်းႁၵ်းလူမ်ႉ၊ မီးလွင်ႈလူႉယႂ်ႇသုမ်းၼမ် ဝႃႈၼႆ။
ဝၼ်းတီႈ 10/05/2018 ယၢမ်းၵၢင်ဝၼ်း မွၵ်ႈ 12:30 မူင်းၼၼ်ႉ လူမ်းၽတ်ႉႁၢဝ်ႈႁႅင်း ၼႂ်းဝဵင်းၼမ်ႉၸၢင်၊ တၢင်းၵႂႃႇမိူင်းၼၢႆးလႄႈ ၼႂ်းၵႄႈၼမ်ႉၸၢင် – ပၢင်ႇလႅင်းသႂ် ၼႂ်းၸႄႈဝဵင်းၼမ်ႉၸၢင်ၸိူဝ်းၼၼ်ႉ။ သဝ်ၾႆးၾႃႉ ၸွမ်းၶၢင်ႈတၢင်း ႁၵ်းလူမ်ႉၵမ်ႈၽွင်ႈ။ ယဝ်ႉၵေႃႈ လင်ၶႃးမုင်းႁူင်းၵဵပ်းၶူဝ်းၶွင်ၵေႃႈ ၵွၵ်းပိဝ်ၸွမ်းလူမ်းၵမ်ႈၽွင်ႈ ဝႃႈၼႆ။
ၵူၼ်းပိုၼ်ႉတီႈ ၸႄႈဝဵင်းၼမ်ႉၸၢင် လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈယဝ်ႉ မိူဝ်ႈဝႃး မွၵ်ႈယၢမ်းၵၢင်ဝၼ်းၼၼ်ႉ လူမ်း မႃးႁႅင်းၼႃႇ။ သဝ်ၾႆးၸွမ်းၶၢင်ႈတၢင်းႁၵ်းလူမ်ႉၵေႃႈမီး။ လင်ၶႃးမုင်းႁိူၼ်း၊ မုင်းႁွင်ႈၵဵပ်းၶွင်ၵေႃႈ ၵွၵ်းဢွၵ်ႇပိဝ်ၸွမ်း လူမ်းၵမ်ႈၽွင်ႈ။ လူမ်းၼႆႉ မၼ်းမႃးပဵၼ်သၢႆ ႁဵတ်းၼၼ်ၵူၺ်း။ တၢင်ႇတီႈတႄႉ ဢမ်ႇပေႃးႁၼ်ပဵၼ်သင်တႄႉတႄႉ၊ ၾူၼ်ဢမ်ႇတူၵ်းႁႅင်းတူၵ်းဢိတ်းၼိုင်ႈၵူၺ်း” ဝႃႈၼႆ။
မိူဝ်ႈ ဝၼ်းတီႈ 08/05/2018 ၶၢဝ်းယၢမ်းဝၢႆးဝၼ်း 2 မူင်းပၢႆၼၼ်ႉၵေႃႈ ၾူၼ်လူင်လူမ်းလူင်ၽတ်ႉပဝ်ႇႁၢဝ်ႈႁႅင်း ၼႂ်းၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။ ၼႂ်းၼၼ်ႉ ႁိူၼ်းၵူၼ်း ဢၼ်ၺႃးၾူၼ်လူင် လူမ်းလူင်ၽတ်ႉပဝ်ႇပဵၼ် ပွၵ်ႉလွႆဝႄႈ၊ ပွၵ်ႉၼွင်ၵႅဝ်း၊ပွၵ်ႉပေႃႈမိူင်း ဝဵင်းမိူင်းၼၢႆးလႄႈ ဢိူင်ႇၵုင်းလူင် ၸႄႈဝဵင်း မိူင်းၼၢႆး။ ယွၼ်ႉၾူၼ်လူင်လူမ်းလူင်သေ ႁိူၼ်းၵူၼ်းမိူင်း 16 လင်၊ ဝတ်ႉဝႃးသႃလႃး 2 လင် ၊ ႁူင်းႁဵၼ်း 1 လင်လူႉၵွႆ။ လိူဝ်ၼၼ်ႉ သဝ်ၾႆးၾႃႉၸိူဝ်းၼႆႉၵေႃႈလူမ်ႉ။ ယၢမ်းလဵဝ် ၵူၼ်းဝၢၼ်ႈထူပ်းတၢင်းယၢပ်ႇ။ လူဝ်ႇတၢင်းၸွႆႈထႅမ်။
Photo – Namsang Net
