မႄႈလုၵ်ႈဢွၼ်ႇ ၵူၼ်းၼမ်ႉတူႈ ၵေႃႉၼိုင်ႈ ၺႃးမၢၵ်ႇလူင်တူၵ်းသႂ်ႇ တီႈဝဵင်းလႃႈသဵဝ်ႈသေ လႆႈထုၵ်ႇတႅပ်းပႅတ်ႈၶႃ ၶွၼ် ၼိုင်ႈ။

ပူၼ်ႉမႃး မိူဝ်ႈဝၼ်းတီႈ 29/12/2023 ယၢမ်းၵၢင်ဝၼ်း 11 မူင်း မၢၵ်ႇလူင်တႅၵ်ႇတိူဝ်ႉသႂ်ႇ မႄႈလုၵ်ႈဢွၼ်ႇလဵၵ်ႉ ဢႃယု 30 ပီ ၵေႃႉၼိုင်ႈ တီႈဢိူင်ႇဢီႇၼၢႆး ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ တီႈၶႃမၼ်းၼၢင်းၾၢႆႇသၢႆႉသေ လႆႈထုၵ်ႇတႅပ်း ပႅတ်ႈ ၼႆယဝ်ႉ။

ၵူၼ်းပိုၼ်ႉတီႈ ၵေႃႉၼိုင်ႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်မၢၵ်ႇလူင် မႃးတူၵ်းသႂ်ႇၼၼ်ႉ ပဵၼ်တီႈႁူဝ် ဝၢၼ်ႈၶႃႈဢေႃႈ။ မၢၵ်ႇၼႆႉ လုၵ်ႉတၢင်းလႂ်မႃးတူၵ်းၵေႃႈ ယင်းဢမ်ႇတၼ်းႁူႉၾၢႆႇမၼ်း။ ယဝ်ႉၵေႃႈ မၢၵ်ႇၼၼ်ႉ ပဵၼ်ၸုမ်း လႂ် ႁွႆးမိုဝ်းၽႂ်ယိုဝ်းမႃးၵေႃႈ ဢမ်ႇႁူႉ။ မၢၵ်ႇၼၼ်ႉ မႃးတူၵ်းတႅၵ်ႇသႂ်ႇၶႃၾၢႆႇသၢႆမၼ်းၼၢင်း။ မိူဝ်ႈလဵဝ် လႆႈတႅပ်းပႅတ်ႈ ၶႃႈ ဢေႃႈ တႄႇဢဝ်ႁူဝ်ၶဝ်ႇလူင်းတႂ်ႈ”- ဝႃႈၼႆ။

မႄႈလုၵ်ႈဢွၼ်ႇ ဢႃယု 30 ပီ ၵေႃႉၺႃးမၢၵ်ႇလူင်တူၵ်းသႂ်ႇၼႆႉ ပဵၼ်ၵူၼ်းမၢၼ်ႈၸၢမ် ဝဵင်းၼမ်ႉတူႈ ၶဝ်သၢမ်ၵေႃႉ ပေႃႈ မႄႈလုၵ်ႈၼႆႉ မႃးဢႅဝ်ႇယႅမ်ႉပေႃႈမႄႈၶဝ် တီႈဝဵင်းလႃႈသဵဝ်ႈၼႆႉသေ တေဢၢၼ်းပွၵ်ႈမိူဝ်းၶိုၼ်းႁိူၼ်းၶဝ် တီႈဝဵင်းၼမ်ႉတူႈ ၼၼ်ႉ ထုၵ်ႇမၢၵ်ႇလူင် တူၵ်းသႂ်ႇ တႅၵ်ႇတိူဝ်ႉတီႈၶႃမၼ်းၼၢင်း ၼႆယဝ်ႉ။

ၵေႃႉပဵၼ် ၸဝ်ႈၽူဝ် မၼ်းၼၢင်း လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ် ၵေႃႉပဵၼ်မေးၶႃႈတႄႉ လႆႈယူတ်းယႃဝႆႉ တီႈႁူင်း ယႃလူင် လႃႈသဵဝ်ႈၼႆႉၶႃႈဢေႃႈ။ မိူဝ်းၼႃႈတႄႉ လွင်ႈတုၵ်ႉၶယၢပ်ႇၽိုတ်ႇ ၼႂ်းၼႃႈႁိူၼ်းတႄႉ တေမီးလွင်ႈယၢပ်ႇၽိုတ်ႇလိူဝ် ႁႅင်းတႄႉ။ ပေႃးဢမ်ႇမီးမႄႈၸဝ်ႈႁိူၼ်းႁဵတ်းၵၢၼ်ၸွႆႈၸိုင်။ လွင်ႈႁႃလဵင်ႉၼႂ်းၼႃႈႁိူၼ်းၵေႃႈ တေပဵၼ်ၶႃႈၵေႃႉလဵဝ် ၵွပ်ႈ ၼႆလႄႈ တေလႆႈမႆႈၸႂ်ယူႇၵူႈမဵဝ်းၶႃႈယဝ်ႉ”- ဝႃႈၼႆ။

မိူဝ်ႈၽွင်း မၢၵ်ႇတူၵ်းသႂ်ႇၼၼ်ႉ ၵေႃႉပဵၼ်လုၵ်ႈဢွၼ်ႇၶဝ် ဢႃယု 4 ၶူပ်ႇၼႆႉ ဢမ်ႇတၼ်းတိူဝ်ႉမၢတ်ႇၸဵပ်းၸွမ်းသင်သေ တႃႉ ယွၼ်ႉသဵင်မၢၵ်ႇတူၵ်းသႂ်ႇႁႅင်းလႄႈ ယၢမ်းလဵဝ် လုၵ်ႈဢွၼ်ႇၼႆႉ လႆႈတုမ်ႉတိူဝ်ႉပၢႆးၸႂ်ဝႆႉ ဝႃႈၼႆ။

“လုၵ်ႈဢွၼ်ႇၶႃႈ တူၵ်းၸႂ်သေ လႆႈႁွင်ႉလႆႈႁႆႈၶႃႈဢေႃႈ။ ႁွင်ႉႁႆႈႁႃမႄႈမၼ်းပေႇၸႂ်ၶႃႈယဝ်ႉ။ ၶႃႈႁဝ်း ပေႃးလႆႈၶျေႃးဝွၼ်းသေ လႆႈႁွင်ႉပၼ်ၾၼ်ၶိုၼ်း။ လွင်ႈၼႃႈႁိူၼ်းႁဝ်းၶႃႈတႄႉ ယၢမ်းလဵဝ် ထူပ်းတၢင်းယၢပ်ႇဝႆႉ လွင်ႈၵႃႈယူတ်းယႃလႄႈ ပေႃး မီးၵူၼ်းၶႂ်ႈၸွႆႈထႅမ်ငိုၼ်းတွင်းၼႆ ဢမ်ႇဝႃႈၼမ်ဢေႇ ယိၼ်းလီႁပ်ႉဢဝ်ယူႇၶႃႈ”- ၵေႃႉပဵၼ် ၸဝ်ႈၽူဝ် သိုပ်ႇလၢတ်ႈၼင်ႇ ၼႆ။

ယၢမ်းလဵဝ် ၵေႃႉပဵၼ် မႄႈလုၵ်ႈဢွၼ်ႇ ဢႃယု 30 ပီၼႆႉ လႆႈယူတ်းယႃတူဝ်ဝႆႉတီႈ ႁူင်းယႃလူင် ဝဵင်းလႃႈသဵဝ်ႈ သင်ဝႃႈ ၽူႈလႂ်ၽႂ် ၶႂ်ႈၵမ်ႉၸွႆႈထႅမ် ၵႃႈယူတ်းယႃၸိုင် ၵပ်းသိုပ်ႇတွင်ႈထၢမ်ၵႂႃႇ လႆႈတီႈမၢႆၾူၼ်း 09942025447 ၼႆႉသေၵမ်း ဝႃႈၼႆ။