ၼႂ်းၸိုင်ႈတႆးပွတ်းၸၢၼ်း ဝၢၼ်ႈၵူၼ်း 50 ပၢႆ ၶၢတ်ႇၼမ်ႉၵိၼ် လူဝ်ႇတၢင်းၸွႆႈထႅမ် တင်းၼမ် ဝႃႈၼႆ။
ဝၢၼ်ႈၵူၼ်း ဢၼ်ၶၢတ်ႇၼမ်ႉၵိၼ်ၽွင်းၶၢဝ်းမႆႈ မႃးၵူႈပီၼႆႉ မိူၼ်ၼင်ႇ ၸႄႈဝဵင်းၵၢတ်ႇလေႃႉ၊ ၸႄႈဝဵင်းပၢင်လွင်း၊ ၸႄႈဝဵင်း ပၢင်းတရႃႉလႄႈ ၸႄႈဝဵင်းယွင်ႁူၺ်ႈ ၸဵမ်ၸိူဝ်းၼႆႉ ဝႃႈၼႆ။
ၵူဝ်ႇဢွင်ႇသၢၼ်း ၽူႈဢွၼ်ႁူဝ် ၸုမ်းၵူၼ်းၼုမ်ႇလႄႈ ၵေႃလိၵ်ႈလၢႆးလႄႈၾိင်ႈငႄႈ တွင်ႇလိူဝ်း လၢတ်ႈတီႈသိုဝ်ႇၶၢဝ်ႇ ဢေႊရႃႇဝတီႇဝႃႈ “ တေႃႈလဵဝ် ၵူၼ်းဝၢၼ်ႈလူဝ်ႇၼမ်ႉၼႃႇၶႃႈယဝ်ႉ။ ဢၼ်ပဵၼ်လိူဝ်ႁႅင်းတႄႉ ၸႄႈဝဵင်းပၢင်းတရႃႉ ၵူႈဝၼ်းၼႆ့ ႁဝ်းၶႃႈ လႆႈတေႃႇသူင်ႇၼမ်ႉပၼ်။ ၵဵဝ်ႇၵပ်းလွင်ႈၼႆႉ လႆႈတၢင်ႇယွၼ်းတၢင်းၸွႆႈထႅမ်တၢင်းၼိူဝ်ဝႆႉယူႇ။ ၸွမ်းၼင်ႇဢၼ်ႁဝ်းၶႃႈ ပွင်ပဵၼ်လႆႈၼႆႉ ႁဝ်းၶႃႈၵေႃႈ ၸွႆႈတေႃႉသူင်ႇပၼ်ၼမ်ႉၵူႈဝၼ်းယူႇ” ဝႃႈၼႆ။
တေႃႈလဵဝ် တေလႆႈဝႃႈ ပေႃးထိုင်မႃး ၶၢဝ်းမႆႈၸိုင် ၼမ်ႉၵိၼ်ၼႆႉ ၶႂ်ႈဝႃႈၶၢတ်ႇၵူႈပီယဝ်ႉ။ ၾူၼ်ၵေႃႈ တူၵ်းဢေႇ။ မိူဝ်ႈၶၢဝ်းမႆႈပီပူၼ်ႉ ၼႂ်းမိူင်းႁူမ်ႈတုမ်ပတ်းပိုၼ်ႉ ဝၢၼ်ႈၵူၼ်းဢၼ်ၶၢတ်ႇၼမ်ႉၵိၼ်/ၼမ်ႉၸႂ်ႉ တင်းမူတ်း မီး 2 ႁဵင် ဝၢၼ်ႈပၢႆ လႆႈႁပ်ႉႁူႉတီႈႁွင်ႈၵၢၼ်ၾၢႆႇၾိင်ႈၾႃႉ ဝဵင်းလိူဝ်ႇ ဝႃႈၼႆ။
ၵဵဝ်ႇၵပ်းလွင်ႈၼႆႉ ပေႃးထိုင်မႃးၶၢဝ်းမႆႈၸိုင် ၼမ်ႉတႃႇတေၵိၼ်ၼၼ်ႉ ၶၢတ်ႇမႃးၵူႈပီ ယူႇတီႈၵူၼ်းပိုၼ်ႉတီႈ ဝၢၼ်ႈ ၵူၼ်းဢၼ်ၶၢတ်ႇၼမ်ႉၵိၼ်ၼၼ်ႉ ဢွၼ်ၵၼ်တႅမ်ႈတၢင်ႇလိၵ်ႈၸူးထိုင် ႁွင်ႈၵၢၼ်ၾၢႆႇတူင်ႇဝူင်းၵူၼ်းတင်း ၾၢႆႇ ၸွႆႈထႅမ်လႄႈ တမ်းဝၢင်းတီႈယူႇ ၵႂႃႇၶၢဝ်းတၢင်းပီပၢႆယဝ်ႉ တေႃႇထိုင်ယၢမ်းလဵဝ် တိုၵ်ႉလူဝ်ႇတၢင်းၸွႆႈထႅမ် လွင်ႈ ၼမ်ႉၵိၼ် တင်းၼမ်ယူႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ