ၸုမ်းသၢႆငဝ်းလႅင်းပုတ်ႉထ ၸႄႈဝဵင်းမိူင်းၽျၢၵ်ႈ ဢွၼ်ႁူဝ်သေ ၸတ်းႁဵတ်းပၢင်တၢၼ်ႈၶႆႈ လွင်ႈပိုၼ်ႉႁူႉပၢႆးႁၼ် မီး ၵူၼ်းမိူင်းၶဝ်ႈႁူမ်ႈထွမ်ႇငိၼ်း 200 ပၢႆ ၸတ်းႁဵတ်းပဵၼ်ပွၵ်ႈၵမ်းႁႅၵ်ႈ ဝႃႈၼႆ။
ဝၼ်းတီႈ 07/05/2018 ယၢမ်းဝၢႆးဝၼ်း 1 မူင်း ၸုမ်းသၢႆငဝ်းလႅင်းပုတ်ႉထ ဢွၼ်ႁူဝ်ၼမ်းၼႃႈသေ ၸတ်းႁဵတ်းပၢင် တၢၼ်ႈၶႆႈ ပၼ်ပိုၼ်ႉႁူႉပၢႆးႁၼ် ၵဵဝ်ႇၵပ်းၵၢၼ်ထမ်မ၊ ပိုၼ်း၊ ၾိင်ႈငႄႈႁိတ်ႈႁွႆး၊ လိၵ်ႈလၢႆးပၢႆပေႇ၊ ၽေးယႃႈမဝ်းၵမ် ဢိၵ်ႇထႅင်ႈလၢႆလၢႆလွင်ႈ။ ပၢင်တၢၼ်ႈၶႆႈၼႆႉ ၸတ်းႁဵတ်းတီႈ ဝတ်ႉဝိႁၢရ်ဝၢၼ်ႈပုင်ႇ ၸႄႈဝဵင်းမိူင်းၽျၢၵ်ႈ ၸႄႈတွၼ်ႈ တႃႈၶီႈလဵၵ်း ၸိုင်ႈတႆးပွတ်းဢွၵ်ႇ ဝႃႈၼႆ။
ၸဝ်ႈၸၢင်းပၺ်ၺႃလေႃးၵ(ႁွင်ႉ) ၸဝ်ႈၸၢင်းယီႈ ၵမ်မၵၢၼ် ၸုမ်းသၢႆငဝ်းလႅင်းပုတ်ႉထ လၢတ်ႈတီႈၽူႈတွႆႇႁွၵ်ႈဝႃႈ “ ယိူင်းဢၢၼ်းၸုမ်းသၢႆငဝ်းလႅင်းပုတ်ႉထ ၵေႃႇတင်ႈမႃး ပိူဝ်ႈတႃႇ ပိုၼ်ၽႄႈပၼ်ပိုၼ်ႉႁူႉ ပၢႆးႁၼ် လွင်ႈထမ်မ လွင်ႈ လေႃးၵ တႃႇၵူၼ်းၶိူဝ်းမိူင်းတႆး တႃႇပႂ်ႉပႃးၾိင်ႈငႄႈၾိင်ႈထုင်း လိၵ်ႈလၢႆးပၢႆပေႇတႆး တႃႇၵမ်ႉထႅမ်ၸွႆႈထႅမ်ပၼ် ၵပ်းၵၢႆႇ လူၺ်ႈပၢႆးပၺ်ၺႃ ႁႂ်ႈၵူၼ်းမိူင်း ပိူင်လူင်မၼ်တႄႉ တႃႇၼေႃႇတႅၼ်းၶိူဝ်း။ လိူဝ်ၼၼ်ႉ တႃႇၸွႆႈထႅမ်ၵူၼ်းတုၵ်ႉၶ ယၢၵ်ႈ ၽၢၼ် ဢၼ်ၵပ်းၵၢႆႇလူၺ်ႈ ၵၢၼ်ပၢႆးပၺ်ၺႃ ပၢႆးယူႇလီ လွင်ႈႁႃၵိၼ်လဵင်ႉတွင်ႉ ၸိူဝ်းၼႆႉ။ ၵမ်းၼႆႉ ၽူႈယႂ်ႇၵူၼ်းလူင် လႄႈ ၽူႈၶဝ်ႈၸုမ်းတင်းမူတ်း ၸင်ႇလႆႈၸႂ်ၵၼ်ဝႃႈ ၼႂ်းဢိူင်ႇဝဵင်းမိူင်းၽျၢၵ်ႈၼႆႉ တေၶိုင်ႁဵတ်းပၢင်တၢၼ်ႈၶႆႈႁႂ်ႈ ၸေးၸွတ်ႇၵူႈဝၢၼ်ႈၼႆသေ ၸင်ႇပွင်ၵၢၼ်ၶိုင်ပဵၼ်မႃး ပၢင်တၢၼ်ႈၶႆႈပွၵ်ႈၵမ်းႁႅၵ်ႈ တီႈဝၢၼ်ႈပုင်ႇၼႆႉ” ဝႃႈၼႆ။
ၼႂ်းပၢင်တၢၼ်ႈၶႆႈၼႆႉ မီးၸဝ်ႈတူၼ်ၶူး ႁႃႈတူၼ် ပၼ်ႇပုတ်ႈၵၼ်သေ တၢၼ်ႈၶႆႈၵႂႃႇ မိူၼ်ၼင်ႇ ၸဝ်ႈၶူးၸၢႆးၼွင်ႉ လူဢၢၼ်ႇၼႄပိုၼ်းၵႅပ်ႈ လွင်ႈပဵၼ်မႃး ပၢင်တၢၼ်ႈၶႆႈပွၵ်ႈၵမ်းၼႆႉ ။ ႁူဝ်ပဝ်ႈလူင် ၸုမ်းသၢႆငဝ်းလႅင်းပုတ်ႉထ ၸဝ်ႈ သြႃႇၸၢႆးၵၢႆ မွၵ်ႇလၢတ်ႈၶေႃႈၵႂၢမ်း ပိုတ်ႇပၢင်တၢၼ်ႈၶႆႈ ။ ၸဝ်ႈၶူးသၢမ်သႅင် ၵျွင်းဝတ်ႉၼမ်ႉလမ်ႉ မိူင်းၽျၢၵ်ႈ တၢၼ်ႈၶႆႈ လွင်ႈၵုင်ႇမုၼ်ပေႃႈမႄႈ လႄႈ လွင်ႈၽေးၶဵၼ်ႁၢႆႉလူင်ယႃႈမဝ်းၵမ် ။ ၸဝ်ႈၶူးတၢၼ်း ၵျွင်းဝတ်ႉ ၼၵႃး ၶမ်း ဝၢၼ်ႈႁူၺ်ႈ မိူင်းၽျၢၵ်ႈ တၢၼ်ႈၶႆႈလွင်ႈ ႁူဝ်ၸႂ်သထေးၵူၼ်းမီး တင်း လွင်ႈယူႇသၢင်ႈၵိၼ်သဝ်း ၼႂ်းၸၢတ်ႈပၢၼ် ၽွင်းပၢၼ် မိူဝ်ႈ လဵဝ် ဝႃႈၼႆ။
သိုပ်ႇသေၼၼ်ႉ ၸဝ်ႈၶူးၸၼ်သႅင် ဝတ်ႉၵျွင်းဢႃးရၢမ်း မိူင်းၽျၢၵ်ႈ တၢၼ်ႈၶႆႈလူၺ်ႈလွင်ႈ ႁႂ်ႈမေႃႁၵ်ႉပႂ်ႉပႃး ၸိူဝ်ႉၶိူဝ်း ၽႃႇသႃႇ သႃသၼႃ ၾိင်ႈငႄႈႁိတ်ႈႁွႆး။ ၸဝ်ႈၸၢင်းမုင်ႉ ၵႅမ်ၽူႈ ၼင်ႈၵျွင်း ဝၢၼ်ႈပုင်ႇမိူင်းၽျၢၵ်ႈ မွၵ်ႈလၢတ်ႈၶေႃႈၵႂၢမ်း လွင်ႈၶွပ်ႈၸႂ် လႄႈ ပၼ်ႁႅင်းၸႂ် ၸုမ်းပွင်ၵၢၼ်လႄႈ ၽူႈၶိုၼ်ႈႁွတ်ႈထွမ်ႇငိၼ်း။ ႁူဝ်ပဝ်ႈလူင် မွၵ်ႇလၢတ်ႈၶေႃႈၵႂၢမ်း ဢိုတ်းယင်ႉပၢင်တၢၼ်ႈၶႆႈ။ ၸဝ်ႈၶူးၼွႆႉ ဝၢၼ်ႈလႄး မိူင်းယွင်း ႁေႃးတြႃး ဝႃႈၼႆ။
