ပၢင်လိူၵ်ႈတင်ႈသွမ်ႈ မိူင်းႁူမ်ႈတုမ် တေၸတ်းႁဵတ်း ၼႂ်းႁူဝ်လိူၼ်ၼူဝ်ႊဝႅမ်ႊၿိူဝ်ႊ

ၶွမ်ႊမသျိၼ်ႊပၢင်လိူၵ်ႈတင်ႈ မိူင်းႁူမ်ႈတုမ် ပိုၼ်ၽၢဝ်ႇပဵၼ်တၢင်းၵၢၼ် မိူဝ်ႈဝၼ်းတီႈ 08/05/2018 ဝႃႈ ဢွင်ႈတီႈၽူႈတႅၼ်းသၽႃး ဢၼ်လုတ်ႈႁၢမ်းပဝ်ႇဝႆႉၸိူဝ်းၼၼ်ႉ ပေႃးထိုင်မႃး ဝၼ်းတီႈ 3 လိူၼ်ၼူဝ်ႊဝႅမ်ႊၿိူဝ်ႊၸိုင် တေၸတ်းႁဵတ်း ပၢင်လိူၵ်ႈတင်ႈသွမ်ႈၵႂႃႇ ဝႃႈၼႆ။

ဢွင်ႈတီႈသၽႃးဢၼ်လုတ်ႈႁၢမ်းပဝ်ႇဝႆႉၸိူဝ်းၼၼ်ႉသမ်ႉ မိူၼ်ၼင်ႇ ၽူႈတႅၼ်းသၽႃးၵူၼ်းမိူင်း 4 တီႈၼင်ႈ၊ ၽူႈ တႅၼ်းသၽႃးၸိူဝ်ႉၸၢတ်ႈ 1 တီႈၼင်ႈ၊ ၽူႈတႅၼ်းသၽႃးၸႄႈမိူင်းလႄႈတိူင်း 8 တီႈၼင်ႈ တင်းမူတ်းႁူမ်ႈၵၼ် မီး 13 တီႈၼင်ႈ။ တွၼ်ႈတႃႇပၢင်လိူၵ်ႈတင်ႈသွမ်ႈပွၵ်ႈၵမ်းၼႆႉ တေမီးပႃႇတီႇလႂ် ၶဝ်ႈၶႄႉၶႅင်ႇဢၼ်ဝႃႈၼၼ်ႉ ယင်းပႆႇႁူႉ ဝႃႈၼႆ။

ဢွင်ႈတီႈၽူႈတႅၼ်းသၽႃး ဢၼ်လုတ်ႈႁၢမ်းပဝ်ႇၸိူဝ်းၼၼ်ႉ ယွၼ်ႉၽူႈတႅၼ်းသၽႃးမၢင်ၵေႃႉ လူႉသဵင်ႈ/တၢႆ၊ မၢင် ၵေႃႉထွၼ်တူဝ်ဢွၵ်ႇ၊ မၢင်ၵေႃႉ ၶၢႆႉတီႈ ၸိူဝ်းၼႆႉသေ ၸွမ်းၼင်ႇပၵ်းပိူင်မီးၼၼ်ႉ ၸင်ႇလႆႈၸတ်းႁဵတ်း ပၢင်လိူၵ်ႈ တင်ႈသွမ်ႈ လိူၵ်ႈၽူႈတႅၼ်းတႃႇၶဝ်ႈမႃးတႅၼ်းတီႈယူႇၸိူဝ်းဢၼ်လုတ်ႈႁၢမ်းပဝ်ႇဝႆႉ 13 တီႈၼင်ႈၼၼ်ႉ ဝႃႈၼႆ။

ဢွင်ႇတီႈၽူႈတႅၼ်းသၽႃး ဢၼ်လုတ်ႈႁၢမ်းပဝ်ႇဝႆႉ တင်းမူတ်း 13 တီႈၼင်ႈၼၼ်ႉ ၼႂ်းမိူင်းတႆး ပႃးၼိုင်ႈတီႈၼင်ႈ ပဵၼ်ဢွင်ႈတီႈၽူႈတႅၼ်းသၽႃးၵူၼ်းမိူင်း ၸႄႈဝဵင်းလၢႆးၶႃႈ။ လိူဝ်ၼၼ်ႉ မိူၼ်ၼင်ႇ တိူင်းတႃႈၵုင်ႈ၊ ၸႄႈမိူင်းၶျၢင်း၊ ၸႄႈမိူင်းတႆး၊ တိူင်းတႃႈလိူဝ်ႇ၊ ၸႄႈမိူင်းၶၢင်၊ တိူင်းပႃႇၵိူဝ်၊ တိူင်းၸႄႈၵႅင်း၊ တိူင်းမၵူၺ်း၊ ၸႄႈမိူင်းရၶႅင်ႇ ၸိူဝ်းၼႆႉ ဝႃႈၼႆ။

မိူဝ်ႈပီ 2017 လိူၼ်ဢေႊပရိူဝ်ႊ ဝၼ်းတီႈ 1 ၼၼ်ႉၵေႃႈ ၸတ်းႁဵတ်းမႃးၵမ်းၼိုင်ႈ ပၢင်လိူၵ်ႈတင်ႈသွမ်ႈ ဝႃႈၼႆ။

ၶေႃႈမုလ်း – VOA