ၶွင်ႇသီႇၽွင်းငမ်းၸူဝ်ႈၵၢင် မိူင်းယၢင်းလႅင် လႄႈ ၶွင်ႇသီႇၵိူဝ်းၵုမ် မိူင်းယၢင်းလႅင် IEC ပိုၼ်ၽၢဝ်ႇဝႃႈ ၵၢၼ်ၽွင်းငမ်းသိုၵ်းမၢၼ်ႈၵိုတ်းၵႂႃႇတင်းမူတ်းယဝ်ႉ ဝႃႈၼႆ။

ၶေႃႈပိုၼ်ၽၢဝ်ႇၼႆႉဢွၵ်ႇမႃးမိူဝ်ႈဝၼ်းတီႈ 30 လိူၼ်ၼူဝ်ႊဝႅမ်ႊပိူဝ်ႊ။

ၶၢဝ်ႊတၢင်းပၢင်တိုၵ်း 1111 ဢၼ်တႄႇမိူဝ်ႈဝၼ်းတီႈ 11 လိူၼ်ၼူဝ်ႊဝႅမ်ႊပိူဝ်ႊမႃးတေႃႇထိုင်ယၢမ်းလဵဝ် လႆႈ 10 ဝၼ်းပၢႆ သိုၵ်းၸၢဝ်းၶိူဝ်းယိုတ်းလႆႈတပ်ႉသိုၵ်းမၢၼ်ႈသေ တႄႇလွင်ႈၽွင်းငမ်းၵူၼ်းမိူင်းလႆႈ တီႈဝဵင်းလွႆၶေႃ ဝဵင်းလူင်မိူင်းယၢင်းလႅင်ၵူၺ်းဢမ်ႇၵႃး လၢႆလၢႆၸႄႈဝဵင်းၼႂ်းမိူင်းယၢင်းလႅင်ၵေႃႈပႃးလႄႈ ၶႂ်ႈဝႃႈၽွင်းငမ်းလႆႈပတ်းပိုၼ်ႉၸႄႈမိူင်းယဝ်ႉဝႃႈၼႆ။

ႁူဝ်ပဝ်ႈ kscc ဢူးဢွင်ႇသၢၼ်းမျိၼ်ႉလၢတ်ႈဝႃႈ “ၼွၵ်ႈလိူဝ်တီႈတပ်ႉသိုၵ်းၶဝ်ယဝ်ႉ တၢင်ႇတီႈတၢင်ႇဝဵင်း ၶဝ်ဢမ်ႇမီးဢေႃးၸႃႇ ၶဝ်ဢမ်ႇမီးၵၢၼ်ၽွင်းငမ်းသင်ယဝ်ႉ ။ ၾၢႆႇတၢင်းလူင်ပွင်ၸိုင်ႈယၢင်းလႅင်ႁဝ်းၶႃႈဢၢၼ်းဝႆႉတႄႉဝႃႈ ဢၢၼ်းႁႂ်ႈၽဵဝ်ႈမူၺ်ႉၸဝ်ႈဢႃႇၼႃႇသိုၵ်း တိုၼ်းတေၽဵဝ်ႈလၢင်ႉႁႂ်ႈယႃႇႁႂ်ႈမီးပိူင်ၽွင်းငမ်းသိုၵ်းမၢၼ်ႈသေဢိတ်း” ဝႃႈၼႆ။

ၾၢႆႇၼိုင်ႈ ယၢမ်းလဵဝ်ၼႂ်းၸႄႈမိူင်းယၢင်းလႅင် ၸုမ်းသိုၵ်းလုၵ်ႉၽိုၼ်ႉသိုၵ်းမၢၼ်ႈလႄႈတင်းတပ်ႉသိုၵ်းမၢၼ်ႈပိုတ်းယိုဝ်းတိုၵ်းတေႃးၵၼ်ယင်းပႆႇယဝ်ႉပႆႇတူဝ်ႈ။ ၵူၼ်းမိူင်းလႆႈပၢႆႈၽေးသိုၵ်းၼပ်ႉႁူဝ်သႅၼ်။ ၶႃႈႁၢပ်ႇၵၢၼ်ၶုၼ်ၵေႃႈ ဢမ်ႇယွမ်းႁဵတ်း CDM သေဢမ်ႇၵႃး သမ်ႉဢမ်ႇႁတ်းၶိုၼ်ႈလုမ်းႁဵတ်းၵၢၼ် ၊ လႆႈပၢႆႈၽေးသိုၵ်းၼင်ႇၵူၼ်းမိူင်းလႄႈ ၵၢၼ်ၽွင်းငမ်းဝၢၼ်ႈမိူင်းလႆႈၵိုတ်းဝႆႉႁိုင်ယဝ်ႉၵေႃႈႁင်းမၼ်း။ ၵႃႈပဵၼ်ႁူင်းႁဵင်းလႄႈလုမ်းၵေႃႈလႆႈပိၵ်ႉဝႆႉမူတ်း။

ယၢမ်းလဵဝ်ၵေႃႈ ပၢင်တိုၵ်းၼႆႉတိုၵ်ႉပဵၼ်ယူႇတိၵ်းတိၵ်းၸွမ်းဝဵင်းတီႊမူဝ်ႊသူဝ်ႇ ၊ ပေႃးလၶႄး၊ ၽႃသွင်ႇ၊ မႄႈၸႄႉလႄႈ သျႃးတေႃး ၸိူဝ်းၼႆႉ။