ၽူႈတႅၼ်းသၽႃး တင်း ၸုမ်းပွင်ၵၢၼ် ပႃႇတီႇႁူဝ်သိူဝ် လူင်းပိုၼ်ႉတီႈ သူႇၸႂ်းႁူပ်ႉထူပ်း ၵူၼ်းမိူင်းၼႂ်းပိုၼ်ႉတီႈ တၢင်းပွတ်းဢိူင်ႇမိူင်းလင်း ၸႄႈဝဵင်းသီႇပေႃႉ။
ဝၼ်းတီႈ 08/05/2018 ယၢမ်းဝၢႆးဝၼ်း 2:00 မူင်း – 3:30 မူင်း ၽူႈတႅၼ်းသၽႃး ၼၢင်းသၢၼ်းသၢၼ်းဢေး တင်း ၸုမ်းပွင်ၵၢၼ်ပႃႇတီႇႁူဝ်သိူဝ် SNLD ၸႄႈဝဵင်းသီႇပေႃႉ လူင်းပိုၼ်ႉတီႈသူႇၸႂ်း ၸုမ်းပွင်ၵၢၼ်ၸွမ်းဢိူင်ႇလႄႈ ၵူၼ်း ပိုၼ်ႉတီႈလူင်းတွင်ႈထၢမ် လွင်ႈယၢပ်ႇၽိုတ်ႇၵူၼ်းမိူင်း တီႈဝတ်ႉဝိႁၢရ်လူင်မိူင်းလင်း ဢိူင်ႇမိူင်းလင်း ၸႄႈဝဵင်းသီႇ ပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ဝႃႈၼႆ။
ၸၢႆးလၢဝ်သႅင် ၽူႈၼမ်းၼႂ်းပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ လူင်းႁူပ်ႉထူပ်း သူႇၸႂ်း ၸုမ်းပွင်ၵၢၼ်ပႃႇတီႇႁဝ်း ၸွမ်းဢိူင်ႇ/ၸွမ်းဝၢၼ်ႈ။ ယူႇတီႈၵူၼ်းမိူင်း ၼႂ်းပိုၼ်ႉတီႈသေ တုၵ်းယွၼ်းတၢင်ႇၶိုၼ်ႈ မႃးသမ်ႉ ၵဵဝ်ႇလူၺ်ႈ လွင်ႈသဵၼ်ႈတႃႈ သၢႆတၢင်း၊ လွင်ႈၼမ်ႉ၊ ၾႆးၾႃႉလႄႈ လွင်ႈၶူဝ်း ၸိူဝ်းၼႆႉ။ ၵဵဝ်ႇၵပ်းလွင်ႈ ၼႆႉ ၽူႈတႅၼ်းႁဝ်းၶႃႈ ၼၢင်းသၢၼ်းသၢၼ်းဢေး လႆႈသပ်းလႅင်းလၢတ်ႈဝႃႈ ပေႃးငိုၼ်းၿတ်ႊၵျႅတ်ႊ(Budget) ငိုၼ်းၵွင် တိုၼ်းၸႂ်ႉၸၢႆႇ လူင်ပွင်ၸိုင်ႈလူင်းမႃး ထႅင်ႈပီၼႃႈၸိုင် တေမႃး ႁဵတ်းသၢင်ႈပၼ်ၵႂႃႇ ဝႃႈၼႆ။
သိုပ်ႇလၢတ်ႈဝႃႈ “ယူႇတီႈပႃႇတီႇသေ ဢၼ်လႆႈႁဵတ်းသၢင်ႈတူင်ႉၼိုင်မႃး လွင်ႈၵူၼ်းပၢႆႈၽေးသိုၵ်း ဢၼ်လႆႈတေႃႉ သူင်ႇပွၵ်ႈႁိူၼ်းယေးၶဝ်ၸိူဝ်းၼၼ်ႉ။ လွင်ႈဝႆႉသတိၾႆး ယွၼ်ႉဝႃႈ တေႃႈလဵဝ်ၼႆႉ ပဵၼ်ၶၢဝ်းမႆႈ လူဝ်ႇလႆႈၾၢင်ႉ သတိ ၵၼ်ၸိူင်ႉႁိုဝ် ၼင်ႇႁိုဝ် ၾႆးပေႃးတေဢမ်ႇၸၢင်ႈမႆႈ ႁိူၼ်းယေး။ လိူဝ်ၼၼ်ႉ သပ်းလႅင်းၼႄ လွင်ႈပၵ်းပိူင်မၢႆမီႈ ၵၢၼ် ႁေႃႈလူတ်ႉၶိူင်ႈ/ၵႃး ႁႂ်ႈဢွၼ်ၵၼ်သႂ်ႇမၢၵ်ႇႁူဝ်ႁႄႉၽေး။ ထႅင်ႈဢၼ်ၼိုင်ႈၵေႃႈ ဢၼ်ပိူၼ်ႈသိုပ်ႇၾူၼ်းမႃးသေ လႅၼ်ၵိၼ်ၵၼ်ၼၼ်ႉၵေႃႈ ယႃႇပေၵိုင်ႉၵၢင်ႉၼႅတ်ႈယုမ်ႇ ၸဵမ်ၸိူဝ်းၼႆႉ” ဝႃႈၼႆ။
လိူဝ်ၼၼ်ႉ ၽူႈတႅၼ်းသၽႃးၸႄႈမိူင်း ၶဵတ်ႈလိူၵ်ႈတင်ႈမၢႆ(1) ၸႄႈဝဵင်းသီႇပေႃႉ ၼၢင်းသၢၼ်းသၢၼ်းဢေး တင်း ႁူဝ်ပဝ်ႈပႃႇတီႇႁူဝ်သိူဝ် ၸႄႈ ဝဵင်းသီႇပေႃႉ လုင်းဢွင်ႇတဵင်း မွၵ်ႇလၢတ်ႈၶေႃႈၵႂၢမ်းၵႂႃႇ ဝႃႈၼႆ။
ဝၼ်းတီႈ 09/05/2018 ယၢမ်းၵၢင်ၼႂ် 9 မူင်း 11 မူင်း ၵၢင်ဝၼ်း ပႃႇတီႇႁူဝ်သိူဝ် ၸႄႈဝဵင်းသီႇပေႃႉ သိုပ်ႇလူင်းပိုၼ်ႉ တီႈႁူပ်ႉထူပ်း ၽူႈပွင်ၵၢၼ်ပႃႇတီႇ ၼႂ်းဢိူင်ႇလႄႈ ၵူၼ်းမိူင်း တီႈဢိူင်ႇၼမ်ႉယၢင်း၊ ဝၢႆးဝၼ်းသမ်ႉ တီႈဢိူင်ႇၼႃးမၢၵ်ႇ ၶေႃ။ မိူဝ်ႈၽုၵ်ႈ ဝၼ်းတီႈ 10 သမ်ႉ သိုပ်ႇႁူပ်ႉထူပ်းထႅင်ႈ တီႈဢိူင်ႇပၢင်မႅင်း တင်း ဢိူင်ႇၵုင်းသႃႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ