သိုၵ်းတဢၢင်း TNLA လႄႈ သိုၵ်းမၢၼ်ႈ တိုၵ်ႉလေႃႇတိုၵ်းၵၼ်ႁၢဝ်ႈႁႅင်း ၵူၼ်းမိူင်းၼမ်ႉၶမ်းၺႃးမၢၵ်ႇလူင်တူၵ်းသႂ်ႇႁိူၼ်းလူႉၵွႆၼမ် ၵူၼ်းမိူင်းလူႉတၢႆပဵၼ်ပုတ်းပွတ်းၵေႃႉၼိုင်ႈ မၢတ်ႇၸဵပ်းၵေႃႉၼိုင်ႈ။
ဝၼ်းတီႈ 25 ထိုင် 26/11/2023 တင်းဝၼ်းၶိုၼ်း ထိုင်လႅင်း သိုၵ်းတဢၢင်း TNLA လေႃႇတိုၵ်းသိုၵ်းမၢၼ်ႈတီႈၸႄႈဝဵင်းၼမ်ႉၶမ်း ဢမ်ႇၵိုတ်းဢမ်ႇယင်ႉ ၾၢႆႇသိုၵ်းမၢၼ်ႈၵေႃႈ ၶိုၼ်းတုမ်ႉတွပ်ႇၸႂ်ႉၶိူင်ႈမိၼ်ပွႆႇမၢၵ်ႇသႂ်ႇၶိုၼ်းလၢႆၵမ်း ႁိူၼ်းၵူၼ်းမိူင်းလူႉၵွႆၼမ် ၵူၼ်းမိူင်း တၢႆ 1 မၢတ်ႇၸဵပ်း 1 ၼႆယဝ်ႉ။
ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸဵမ်မိူဝ်ႈ ၶိုၼ်းလိုၵ်း 1 မူင်းၶိုင်ႈပုၼ်ႉမႃး ထိုင်ၵၢင်ၼႂ် 7 ၶိုင်ႈမူင်းၵၢင်ၼႂ်ၼႆႉ ႁိူဝ်းမိၼ်သိုၵ်းမၢၼ်ႈမႃး ဢမ်ႇယွမ်း 10 ၵမ်းယဝ်ႉ။မႃးပွႆႇမၢၵ်ႇသႂ်ႇႁိူၼ်းၵူၼ်းမိူင်း ဢၼ်ႁူႉၸွမ်း မီးမွၵ်ႈ 3 လင်ၼႆႉယဝ်ႉၶႃႈ။ဢမ်ႇၸၢင်ႈဢွၵ်ႇၵႂႃႇတူၺ်းၵၼ်ၶႃႈ။သိုၵ်းမၢၼ်ႈၶဝ်ၼႆႉ ဢဝ်ႁိူဝ်းမိၼ် ထောက်ပို့ ၶဝ်မႃးပွႆႇဢေႃႈ။မၢၵ်ႇလူင်မၢၵ်ႇဢွၼ်ႇလေႃးလႄးၵၼ်ယဝ်ႉ ” – ဝႃႈၼႆ။
ပွၵ်ႉဝၢၼ်ႈဢၼ်ၺႃး သိုၵ်းမၢၼ်ႈပွႆႇမၢၵ်ႇသႂ်ႇၼႆႉ မိူၼ်ၼင်ႇ ပွၵ်ႉဢွင်ႇမႅတ်ႉတႃႇ၊ ပွၵ်ႉမၢၼ်ႈၼႃး ၊ ၵွင်းသႃႇယႃႇ ၸဵမ်ၸိူဝ်းၼႆႉ။ၼႂ်းၼၼ်ႉ တိူဝ်ႉၺႃးၵူၼ်းမၢတ်ႇၸဵပ်း ၵေႃႉၼိုင်ႈ လူႉတၢႆၵေႃႉၼိုင်ႈ။
ၵူၼ်းၼႂ်းပိုၼ်ႉတီႈသိုပ်ႇလၢတ်ႈတီႈၽူႈတွႆႇႁွၵ်ႈဝႃႈ – “ ဢၼ်တိူဝ်ႉမၢၵ်ႇမၢတ်ႇၸဵပ်းဢိတ်းဢီႈ မီးၵေႃႉၼိုင်ႈ ။ မၢၵ်ႇတူၵ်းတႅၵ်ႇသႂ်ႇလႄႈ ပေႃးပဵၼ်ပုတ်းပဵၼ်ပွတ်းဝႆႉ မီးၵေႃႉၼိုင်ႈဢေႃႈ။ႁူဝ်မၼ်းမီးတီႈၼိုင်ႈ ၊ တိၼ်မိုဝ်းမၼ်းမီးတီႈၼိုင်ႈ။လႆႈဝႃႈ တၢႆႁုၵ်ႉတၢႆႁၢႆႉတေႉတေႉယဝ်ႉ။တီႈၶဝ်ယူႇၼႆႉသမ်ႉ ၵူႈပွၵ်ႈ ပဵၼ်တီႈလုမ်းႁွင်ႈၵၢၼ်ဢၼ်ယူႇတႂ်ႈသိုၵ်းမၢၼ်ႈ ” – ဝႃႈၼႆ။
ၵူၼ်းဢၼ်ၺႃးမၢၵ်ႇတူၵ်းတႅၵ်ႇသႂ်ႇ ပဵၼ်ပုတ်းပဵၼ်ပွတ်းၼၼ်ႉ ပဵၼ်ၼၢင်းယိင်းၵူၼ်းၶၢႆယႃႇပူႉ ၼႂ်းမၢၼ်ႈၼႃး ၸႄႈဝဵင်းၼမ်ႉၶမ်း ။ လိူဝ်ၼၼ်ႉ ၾၢႆႇသိုၵ်းတဢၢင်း TNLA ၶဝ်ႈဢဝ်တီႈယူႇၸွမ်းႁိူၼ်းယေးၵူၼ်းမိူင်း ဢဝ်ၵူၼ်းမိူင်းႁဵတ်းပဵၼ်ႁူဝ်ႉၵင်ႈသေ လေႃႇတိုၵ်းသိုၵ်းမၢၼ်ႈလႄႈ ၵူၼ်းမိူင်းဢမ်ႇမီးလွင်ႈလွတ်ႈၽေးၼႆယဝ်ႉ။
ၵူၼ်းၼႂ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းလွႆၶဝ်ၵေႃႈ မႃးယူႇၸွမ်း ပွၵ်ႉဢွင်ႇမႅတ်ႉတႃႇၼၼ်ႉ ၼမ်ၼႃႇ။ မႃးယူႇၸွမ်းၼႂ်းၵႄႈၵူၼ်းမိူင်းသေ ဢဝ်ၵူၼ်းမိူင်းႁဵတ်းဢၼ်ႁေႉဢၼ်ၵင်ႈၶဝ်ႁဵတ်းၼၼ်ဢေႃႈ။ပေႃးပဵၼ်လႆႈတႄႉ ႁႂ်ႈၶဝ် ဝႄႈယၢၼ်ပၼ်ႁိူၼ်းၵူၼ်းမိူင်းၽွင်ႈဢေႃႈ တီႈယူႇၵူၼ်းမိူင်းတႄႉ ၵုမ်ႇပဵၼ်တီႈယူႇသိုၵ်းၵူၺ်းယဝ်ႉ ” – ဝႃႈၼႆ။
တႄႇဢဝ် ဝၼ်းတီႈ 24/11/2023 ယၢမ်းႁူဝ်ၶမ်ႈ 6 မူင်းမႃး ႁၢၼ်ႉတေႃႇထိုင်ယၢမ်းလဵဝ် သိုၵ်းမၢၼ်ႈ ယိုတ်းမိူင်းတင်း သိုၵ်း တဢၢင်း TNLA ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းဝဵင်းၼမ်ႉၶမ်း ႁဵတ်းႁႂ်ႈၵူၼ်းမိူင်း တူၵ်းၸႂ်တိုၼ်ႇသၢၼ်ႈၵူဝ်ႁေ။
ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းၼႆႉ ပဵၼ်ႁႅင်းတႄႉႁႅင်းဝႃႈၼၼ်ႉယဝ်ႉ တီႈၼမ်ႉ ၶမ်းၼႆႉ တႄႇ မိူဝ်ႈဝႃး ယၢမ်းႁူဝ်ၶမ်ႈမႃး ၶဝ်ပဵၼ်တင်းၶိုၼ်း ႁၢၼ်ႉတေႃႇထိုင် မိူဝ်ႈၼႆႉ ဝၢႆးဝၼ်းသဵင်ၵွင်ႈ ပႆႇယဵၼ်။ မိူဝ်ႈဝႃးတင်းၶိုၼ်းတႄႉ ႁဝ်းၶႃႈ ၼွၼ်းပေႃးဢမ်ႇလပ်းယဝ်ႉ ၵူၼ်းမိူင်းဢွၼ်ၵၼ်တိုၼ်ႇတင်းဝဵင်းဢေႃႈ။ သိုၵ်းမၢၼ်ႈ ၸႂ်ႉ ၶိူင်ႈမိၼ်တိုၵ်း မႃးပွႆႇမၢၵ်ႇ 1 ပွၵ်ႈလႂ် မၢၵ်ႇလူင် ဢမ်ႇယွမ်း 8-9 လုၵ်ႈ လိၼ်ပေႃးသၼ်ႇဢေႃႈ”- ဝႃႈၼႆ။
ယွၼ်ႉပၢင်တိုၵ်းၼႆႉသေ ဝၼ်းတီႈ 25/11/2023 ယၢမ်းၵၢင်ၼႂ်ၸဝ်ႉၼၼ်ႉၵေႃႈ မၢၵ်ႇလူင်တူၵ်းသႂ်ႇ ဝတ်ႉဢူးယဵၼ်ႇ ပွၵ်ႉၵွင်းသႃႇ ဝဵင်းၼမ်ႉၶမ်း လူႉၵွႆတင်း ၼမ်လၢႆ။ၶိူင်ႈမိၼ်ဢၼ်သိုၵ်းမၢၼ်ႈ ၸႂ်ႉတိုဝ်းပိုတ်းယိုဝ်းတီႈၼမ်ႉၶမ်းၼႆႉ ပဵၼ်းသႅၼ်း Fighter Jet လႄႈ Y-12 Military Transport Aircraft ၼႆယဝ်ႉ။
