မိူဝ်ႈၼႆႉ ဝၼ်းတီႈ 24/11/2023 ယၢမ်းၵၢင်ၼႂ်မွၵ်ႈ 7 မူင်း မီးၸုမ်းဢမ်ႇႁူႉၾၢႆႇ ၶဝ်ႈတီႉၺွပ်း ၸဝ်ႈၶွင်ႁၢၼ်ႉၶၢႆၶူဝ်း ၵုၼ်ႇ ၽူႈၸၢႆး ဢႃယု 40 ပၢႆ ၵေႃႉၼိုင်ႈ တီႈၸဵင်ႇႁွင်ႇၵၢတ်ႇ မၢႆ (2) ပွၵ်ႉၵွင်းၼွင် ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းႁၢႆႉၼႆႉ ပဵၼ်ၽူႈၸၢႆး ၶဝ်မႃးၸွမ်းၵၼ် 3 ၵေႃႉ ၶီႇၵႃး Crown သီၽိူၵ်ႇ မႃးလမ်းၼိုင်ႈသေ ၵွၼ်ႇတေၶဝ်ႈတီႉၺွပ်း ဢဝ်တူဝ်ၸဝ်ႈၶွင်ႁၢၼ်ႉၶၢႆၶူဝ်းၼၼ်ႉၵႂႃႇ ၼႂ်းႁၢၼ်ႉၼၼ်ႉ ၶဝ်ယိုဝ်းၵွင်ႈ ၶိုၼ်ႈၾႃႉ 3 ၵမ်းသေ ၸင်ႇၶဝ်ႈတီႉၺွပ်းၵုမ်းတူဝ်ၸဝ်ႈၶွင်ႁၢၼ်ႉၵႂႃႇ။ ၵမ်ႈၼမ် ၶဝ်တေတီႉၵႂႃႇႁဵတ်းပဵၼ်တူဝ်ယိူဝ်ႇ(ပြန်ပေးဆွဲ) ၶႃႈဢေႃႈ”- ဝႃႈၼႆ။

ၸူဝ်ႈပၢင်တိုၵ်း သိုၵ်းမၢၼ်ႈတင်း ၸုမ်းဢူၺ်းလီပွတ်းႁွင်ႇ ယိုဝ်းၵၼ်မႃး ၶၢဝ်းတၢင်းၸမ်လိူၼ်ၼႆႉ ၵူၼ်းမိူင်းမူႇၸေႊ ထုၵ်ႇ ၸုမ်း ဢမ်ႇႁူႉၾၢႆႇ ၶဝ်ႈတီႉၺွပ်း ၵုမ်းတူဝ်ၵႂႃႇ 3 ၵေႃႉယဝ်ႉ။

“ၸုမ်းဢၼ်ၶဝ်မႃးတီႉၼႆႉ ယူႇတီႈႁဝ်းၶႃႈလၢမ်းၶၢတ်ႇတႄႉ တေပဵၼ်ၸုမ်းမီးၵွင်ႈ ၼႂ်းၸုမ်းပျီႇတူႉၸိတ်ႉ ဢမ်ႇၼၼ် ၸုမ်း သိုၵ်းမၢၼ်ႈထၢၵ်ႈ ၸိူဝ်းၼႆႉ။ ၸုမ်းၸိူဝ်းၼၼ်ႉ ၶဝ်တေလၢတ်ႈၵႂၢမ်းမၢၼ်ႈတေႃႇၵၼ်ၵူၺ်း။ ၸူဝ်ႈပၢင်တိုၵ်းၼႆႉမႃး ၶဝ်တီႉၺွပ်း ၵႂႃႇ ၵူၼ်းမူႇၸေႊၼႆႉ မီး 3 ၵေႃႉယဝ်ႉ။ ပေႃးၶဝ်တီႉၺွပ်းၵႂႃႇယဝ်ႉ ႁႂ်ႈၵူၼ်းတင်းလင် ဢဝ်ငိုၼ်းၵႂႃႇထုတ်ႇတူဝ်ဢွၵ်ႇမႃး 1 ၵေႃႉ လႆႈပၼ်ငိုၼ်းၶႄႇ ဢေးသုတ်း 3 သႅၼ်ယႂၼ်ႊ ဢမ်ႇၼၼ် 5 သႅၼ်ယႂၼ်ႊၼႆႉ။ လွင်ႈႁူမ်ႇလူမ်ႈၵူၼ်းမိူင်းတီႈမူႇၸေႊၼႆႉ ဢမ်ႇမီးသေဢိတ်းယဝ်ႉၶႃႈ ယၢမ်းလဵဝ်ၼႆႉ”- ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။

ၸုမ်းဢမ်ႇႁူႉၾၢႆႇ ယိပ်းၵွင်ႈ ၶဝ်ႈတီႉၺွပ်းၵူၼ်းမိူင်းမူႇၸေႊ ဢဝ်ၵႂႃႇႁဵတ်းတူဝ်ယိူဝ်ႇ (ပြန်ပေးဆွဲ) ၸိူင်ႉၼႆၼႆႉ ၵမ်ႈၼမ် ၶဝ် တေတီႉဢဝ်ၵႂႃႇၵူၼ်းသထေး၊ ၸဝ်ႈၶွင်ႁၢၼ်ႉၶၢႆၶူဝ်းၵုၼ်ႇ၊ ႁၢၼ်ႉၶၢႆၶမ်းလႄႈ ၸၢဝ်းၶႄႇ ၸိူဝ်းၼႆႉ။

ၶၢဝ်းတၢင်း သိုၵ်းမၢၼ်ႈ ယိုတ်းမိူင်းမႃး ၸမ်သၢမ်ပီၼႆႉ ၵူၼ်းမူႇၸေႊ ၺႃးၸုမ်းဢမ်ႇႁူႉၾၢႆႇ ယိပ်းၵွင်ႈ တီႉၺွပ်း ၵုမ်းတူဝ်ၵႂႃႇ ၼႆႉ ဢမ်ႇယွမ်း 10 ယဝ်ႉ ၵူၼ်းပိုၼ်ႉတီႈလၢတ်ႈ။