ၸၼ်ႉၸွမ် ရင်းသိတ်ႇ တေၸတ်းပၢင်ပိုတ်ႇပပ်ႉလိၵ်ႈလူင်တႆး

ၸၼ်ႉၸွမ် ရင်းသိတ်ႇ မိူင်းထႆး တေၸတ်းပၢင်ပိုတ်ႇပပ်ႉ လိၵ်ႈလူင်တႆး (Tai Epics) လႄႈ မွပ်ႈၶွင်တွၼ်ႈပၼ် ၽူႈတႅၼ်း တႆး တီႈၸဝ်ႈႁၢၼ် ယွင်ႁူၺ်ႈ။

ဝၼ်းတီႈ 30/11/2023 ယၢမ်းဝၢႆးဝၼ်း 1 မူင်းထိုင် 6 မူင်းႁူဝ်ၶမ်ႈ ယူႇတီႈ ဢႃးၸၢၼ် ၶျူၼ်းထီးရႃး သတ်ႇတယႃး ဝတ်ႉထ ၼႃး ဢွၼ်ႁူဝ်သေ တေၸတ်းႁဵတ်းပၢင်ပွႆး “ၸူးၶႂၼ်သုဝၼၽူႇမိ” (สู่ขวัญ สุวรรณภูมิ) တီႈႁွင်ႈ Auditorium ၸၼ်ႉ (2) တိူၵ်ႈမၢႆ (15) ၼႂ်းၸၼ်ႉၸွမ် ရင်းသိတ်ႇ (RANGSIT UNIVERSITY) ဝဵင်းပထုမ်းထႃးၼီး မိူင်းထႆး ယဝ်ႉၵေႃႈ တေပိုတ်ႇပပ်ႉ လိၵ်ႈလူင်တႆး ဢၼ်ပိၼ်ႇဝႆႉ ၽႃႇသႃႇထႆးၼၼ်ႉ ဝႃႈၼႆ။

ၸဝ်ႈၶိုၼ်းသႂ် ၸႂ်ယဵၼ် ၽူႈတေၶဝ်ႈႁူမ်ႈ ပၢင်ပွႆး ၸူးၶွၼ်သုဝၼၽူႇမိ တီႈၸၼ်ႉၸွမ် ရင်းသိတ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ပၢင်ပွႆးၼႆႉ တေၸတ်းႁဵတ်း ၼႂ်းဝၼ်းတီႈ 30 တေထိုင်ၼႆႉ တေယူႇတီႈ ဢႃးၸၢၼ် ၶျူၼ်းထီးရႃး သတ်ႇတယႃး ဝတ်ႉထၼႃး သေ ဢွၼ်ႁဵတ်း မၼ်းၸဝ်ႈၼႆႉ လဵပ်ႈႁဵၼ်းလွင်ႈတႆးမႃးႁိုင်ယဝ်ႉ။ ယဝ်ႉၵေႃႈ မၼ်းၸဝ်ႈ မီးႁွင်ႈၵၢၼ်ၾၢႆႇတႆးသိုၵ်ႇသႃ (Tai Study) ဝႆႉထႅင်ႈ တႃႇပဵၼ်မႃးလိၵ်ႈလူင်ၼႆႉ ယူႇတီႈ ဢႃးၸၢၼ် ၶျၢႆးၶျိုၼ်ႉ ၶမ်းၻႅင်း ယွတ်ႈတႆးၵေႃႈ ၸွႆႈၶပ်ႉၶိုင်ပႃးထႅင်ႈ”- ဝႃႈၼႆ။

သိုပ်ႇလၢတ်ႈထႅင်ႈဝႃႈ – “ၵွပ်ႈၼႆလႄႈ ၼႂ်းဝၼ်းပွႆးၼၼ်ႉ မၼ်းၸဝ်ႈ တေပိုတ်ႇပႃးပပ်ႉလိၵ်ႈလူင်တႆး ဢၼ်ပိၼ်ႇဝႆႉၽႃႇသႃႇ ထႆးၼၼ်ႉ ၼႂ်းဝၼ်းၼၼ်ႉ မၼ်းၸဝ်ႈ တေမွပ်ႈၶွင်ၶႂၼ်ပၼ် ၽူႈတႅၼ်းတႆး တီႈၸဝ်ႈႁၢၼ်ယွင်ႁူၺ်ႈ။ ၵူၺ်းၵႃႈ ၸဝ်ႈႁၢၼ် သမ်ႉ ဢမ်ႇမႃးလႆႈလႄႈ တေယူႇတီႈ ၸဝ်ႈပိုၼ်ၶမ်း ၽယၵ်းဝူင်းသေ တၢင်တူဝ်ၵႂႃႇႁပ်ႉတႅၼ်း”- ဝႃႈၼႆ။

ၼႂ်းပၢင်ပွႆး “ၸူးၶႂၼ်သုဝၼၽူႇမိ” ၼႆႉ လိူဝ်သေ ပၢင်ပွႆးယဝ်ႉ တေမီးပိုတ်ႇပပ်ႉလိၵ်ႈလူင်တႆးလႄႈ မွပ်ႈၶွင်တွၼ်ႈ ၸိူဝ်းၼႆႉယဝ်ႉၸိုင် တေမီးတၢင်းၵႃႈဝႅၼ်(ၵႃႈယိူင်း) ၸိူဝ်းၼႆႉပႃးထႅင်ႈ။

သင်ဝႃႈ ၽူႈလႂ် ၽႂ်တေၶဝ်ႈႁူမ်ႈ ၼႂ်းပၢင်ပွႆးၼႆႉၸိုင် ၶႅၼ်းတေႃႈ လူင်းသဵၼ်ႈမၢႆၸိုဝ်ႈဝႆႉလူင်ႈၼႃႈ တီႈ QR Code ၼႆႉဝႆႉ ဝႃႈၼႆ။