ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတႃႈၶီႈလဵၵ်း ဢွၼ်ႁူဝ်သေ ၸတ်းႁဵတ်းပွႆးလူင်းပၢင်သွၼ်လိၵ်ႈတႆး ၶၢဝ်းမႆႈ တီႈ ဢိူင်ႇမိူင်းၵူဝ်း မီးၽူႈယႂ်ႇၵူၼ်းမိူင်းလႄႈ လုၵ်ႈႁဵၼ်းၶဝ်ႈႁူမ်ႈတင်းၼမ်လၢႆ ဝႃႈၼႆ။
ဝၼ်းတီႈ 07/05/2018 ယၢမ်းၵၢင်ၼႂ် 9 မူင်း ၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းတႃႈၶီႈလဵၵ်း ဢွၼ်ႁူဝ်သေ ၸတ်းႁဵတ်းပွႆးလူင်းပၢင်သွၼ်လိၵ်ႈတႆး ၶၢဝ်းမႆႈ တီႈဝတ်ႉဝိႁၢရ်သၼ်သၢႆး ဢိူင်ႇမိူင်းၵူဝ်း ၸႄႈဝဵင်းတႃႈၶီႈလဵၵ်း ၸိုင်ႈ တႆးပွတ်းဢွၵ်ႇ။
ၸၢႆးဝၼ်း ၽူႈသူၼ်းတုမ် ၸုမ်းၵူၼ်းၼုမ်ႇတႆး TYO ၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းၶၢဝ်းတၢင်း 2-3 ပီ မႃးၼႆႉ ၼႂ်းၸိုင်ႈတႆးပွတ်းဢွၵ်ႇႁဝ်း မိူၼ်ၼင်ႇ ၵၢၼ်တူင်ႉၼိုင်တူင်ႇဝူင်းလႄႈသင်၊ ပၢင်သွၼ်လိၵ်ႈလၢႆးတႆး ႁဝ်းလႄႈသင် တေလႆႈဝႃႈ ပဵၼ်ဢၼ်ၶိုပ်ႈၼႃႈမႃးတႄႉတႄႉ။ တႃႇတေပဵၼ်မႃးပၢင်သွၼ်လိၵ်ႈတႆး ၶၢဝ်းမႆႈ ႁဝ်းပီၼႆႉ ၵေႃႈ ယူႇတီႈၵေႃလိၵ်ႈလၢႆး တႃႈၶီႈလဵၵ်းႁဝ်း ဢွၼ်ႁူဝ်ၼမ်းၼႃႈသေ ၸတ်းႁဵတ်းမႃး” ဝႃႈၼႆ။
သိုပ်ႇဝႃႈ “လိူဝ်ၼၼ်ႉ ယူႇတီႈၸုမ်း ၵူၼ်း ၼုမ်ႇတႆးႁဝ်း၊ ပူႇသႅၼ်၊ ပူႇၵၢင်ႉလႄႈ ၽူႈယႂ်ႇၵူၼ်းလူင် ၼႂ်းမူႇၼႂ်းဝၢၼ်ႈ လႄႈ ဢိၵ်ႇထႅင်ႈလၢႆမူႇၸုမ်း ႁူမ်ႈၵၼ်သေ ၸွႆႈၶပ်းၶိုင်ႁၢင်ႈႁႅၼ်းၸွႆႈ ၸဵမ်ၸိူဝ်းၼႆႉ။ မိူဝ်ႈဝႃး ဢၼ်လႆႈမွပ်ႈယိုၼ်ႈ ပၼ်လုၵ်ႈႁဵၼ်းလႄႈ မေႃသွၼ်သမ်ႉ ယိုၼ်ႈ ပၼ် ဝႂ်ယွင်ႈယေႃးလႄႈ သူးၼမ်ႉၸႂ်ၶူဝ်းတွၼ်ႈ ၸိူဝ်းၼႆႉ ” ဝႃႈၼႆ။
ပွႆးသွၼ်လိၵ်ႈတႆး ၼႂ်းဢိူင်ႇမိူင်းၵူဝ်း ၸႄႈဝဵင်းတႃႈၶီႈလဵၵ်းၼႆႉ တင်းမူတ်း ပၢင်သွၼ်မီး 12 ပၢင်။ လုၵ်ႈႁဵၼ်း ဢၼ်မႃး ၶိုၼ်ႈသွၼ်သမ်ႉ 600 ပၢႆ။ ဢၼ်မႃးတႅမ်ႈတွပ်ႇၶူၼ်ႉၶႆႈ(တွပ်ႇသူပ်း) 400 ပၢႆ ဝႃႈၼႆ။
ပွႆးလူင်းပၢင်သွၼ်လိၵ်ႈတႆး ၶၢဝ်းမႆႈ ၼႂ်းၸႄႈဝဵင်းတႃႈၶီႈလဵၵ်း ဢၼ်ၸတ်းႁဵတ်းယဝ်ႉၵႂႃႇသမ်ႉ မိူၼ်ၼင်ႇ ၵိင်ႇၽႄ ၸႄႈဝဵင်းတႃႈလိူဝ်ႇ၊ ဢိူင်ႇႁူၺ်ႈလိၼ်လမ်၊ ပွၵ်ႉတူၼ်ၵေႃႉ(တေႃႇၵေႃႉ) လႄႈ ဢိူင်ႇမိူင်းၵူဝ်း။ လိူဝ်ၼၼ်ႉ ပေႃး ထိုင်မႃး ဝၼ်းတီႈ 9/5/2018 ၼႆႉ တေၸတ်းႁဵတ်းတီႈ ပွၵ်ႉသၼ်သၢႆး ဝၢၼ်ႈမႂ်ႇ ဝႃႈၼႆ။
