ၼိူဝ်သဵၼ်ႈတၢင်းလူင် လႃႈသဵဝ်ႈ – ဝဵင်းလိူဝ် ၵႃးတင်းလူတ်ႉၶိူင်ႈ ၽႃႇတမ်ၵၼ် ၼႂ်းၸႄႈဝဵင်းသီႇပေႃႉ ၵူၼ်းႁေႃႉ လူတ်ႉၶိူင်ႈ ၵေႃႉၼိုင်ႈ လႆႈလူႉတၢႆထင်တီႈ ဝႃႈၼႆ။
ဝၼ်းတီႈ 06/05/2018 ယၢမ်းၵၢင်ဝၼ်း မွၵ်ႈ 11 မူင်း ၵႃးတင်း လူတ်ႉၶိူင်ႈ ၽႃႇတမ်ၵၼ် ၼႂ်းၵႄႈဝၢၼ်ႈ ၸၢမ် လဝ်း တင်း ဝၢၼ်ႈၵုင်းမူင်ႈ ၼိူဝ်သဵၼ်ႈတၢင်းလူင် လႃႈသဵဝ်ႈ – ဝဵင်းလိူဝ်ႇ ၼႂ်းၸႄႈဝဵင်းသီႇပေႃႉ ၸႄႈတွၼ်ႈ ၵျွၵ်ႉမႄး ၸိုင်ႈတႆးပွတ်းႁွင်ႇ။ ၵူၼ်းႁေႃႈလူတ်ႉၶိူင်ႈ ပဵၼ်ၽူႈၸၢႆး ဢႃယု 30 ပီပၢႆ လႆႈလူႉတၢႆ ထင်တီႈ ဝႃႈၼႆ။
လုင်းၸၢႆးၶမ်းဢွင်ႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ(2) လၢတ်ႈတီႈၽူႈတွႆႇႁွၵ်ႈဝႃႈ “ မၢင်ၵေႃႉႁေႃႈ လူတ်ႉ ဢမ်ႇမီးသတိ ဝိရိယ၊ မၢင်တီႈတၢင်းၵႅပ်ႈ၊ မၢင်တီႈတၢင်းၶႅမ်ႉၼႅၼ်ႇ သမ်ႉႁေႃႈဝႆးၼႃႇၽႅဝ်၊ မၢင်ၵေႃႉသမ်ႉ ဢမ်ႇ သႂ်ႇမၢၵ်ႇႁူဝ်ႁႄႉၽေးၸိူဝ်းၼႆႉ ၵႆႉပဵၼ်ၼႃႇ” ဝႃႈၼႆ။
လိူဝ်ၼၼ်ႉ ယူႇတီႈၸဝ်ႈၼႃႈတီႈပလိၵ်ႈၸႄႈဝဵင်းသီႇပေႃႉ ၵႂႃႇၵူတ်ႇထတ်းတူၺ်း ဢွင်ႈတီႈဢၼ်ပဵၼ်ၼၼ်ႉ လူတ်ႉ ၶိူင်ႈသမ်ႉ လုၵ်ႉတၢင်း လႃႈသဵဝ်ႈမႃး။ ၵႃးသမ်ႉ လူတ်ႉတၢင်း ဝဵင်းလိူဝ်ႇသေမႃး ယွၼ်ႉႁေႃႈဝႆးသေ ဢမ်ႇၵုမ်းလႆႈႁႅင်း လူတ်ႉလႄႈ လေႃႇတမ်ၽႃႇၵၼ် ဝႃႈၼႆ။
ပလိၵ်ႈမၢၼ်ႈ ၸႄႈဝဵင်းသီႇပေႃႉ လၢတ်ႈတီႈသိုဝ်ႇၶၢဝ်ႇ ၵၢမ်ႇပေႃးၸတၢႆးဝႃႈ “ ၾၢင်ႁၢင်ႈ ဢၼ်လူတ်ႉတမ်ၽႃႇ ၵၼ်ၼၼ်ႉ မၼ်းပဵၼ်တၢင်းၵူတ်ႉ ၵႃးသမ်ႉတေႁေႃႈဝႆးသေ လႅပ်ႈဢမ်ႇၵုမ်းလႆႈႁႅင်းလူတ်ႉသေ လေႃႈတမ်သႂ်ႇ လူတ်ႉၶိူင်ႈ ဢၼ်လုၵ်ႉတၢင်းလႃႈသဵဝ်ႈမႃး” ဝႃႈၼႆ။
ၼႂ်းၵႃးၼၼ်ႉ မီးၵူၼ်းၶီႇမႃးၸွမ်းၵၼ် 4 ၵေႃႉ။ ၵူၺ်းၵႃႈ ၵူၼ်းၼႂ်းၵႃႉတႄႉ ဢမ်ႇလႆႈမၢတ်ႇၸဵပ်းသင်သေၵေႃႉ။ ၵူၼ်းၵေႃႉဢၼ်ႁေႃႈလူတ်ႉၶိူင်ႈမႃးၼၼ်ႉ လႆႈလူႉတၢႆထင်တီႈၼၼ်ႉသေ ယူႇတီႈၸုမ်းၸွႆႈထႅမ် ၸႄႈဝဵင်းသီႇပေႃႉ လႆႈၼမ်းဢဝ်တူဝ် သူင်ႇၵႂႃႇတီႈႁူင်းယႃသီႇပေႃႉ ဝႃႈၼႆ။
Photo – နယ်စည်းမခြားပရဟိတအသင်း
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ