မေႃၵႂၢမ်းတႆး ၸိုဝ်ႈသဵင်ယႂ်ႇ ၸၢႆးသၢႆမၢဝ်း ယူႇလီၵိၼ်ဝၢၼ် ပၢႆးယူႇလီၶႅမ်ႉလႅပ်ႈလီငၢမ်း

ၼႂ်းၶၢဝ်းတၢင်း 1-2 ဝၼ်းၼႆႉမႃး ၼိူဝ်တူင်ႇဝူင်းၾဵတ်ႉၿုၵ်ႉ ဢွၵ်ႇမႃးတင်းၼမ်ဝႃႈ မေႃၵႂၢမ်းၸိုဝ်ႈသဵင်ယႂ်ႇ ၸၢႆးသၢႆမၢဝ်း လႆႈလူႉသဵင်ႈ/တၢႆၵႂႃႇယဝ်ႉ ၵဵဝ်ႇၵပ်းလွင်ႈၼႆႉ ပဵၼ်ၶၢဝ်ႇၽၢင်း ဢမ်ႇၸႂ်ႈပဵၼ်ၶၢဝ်ႇတႄႉ ဝႃႈၼႆ။

ဝၼ်းတီႈ 07/05/2018 ယၢမ်းၵၢင်ၶမ်ႈ မေႃၵႂၢမ်းၸိုဝ်ႈသဵင်ယႂ်ႇ ၸၢႆးသၢႆမၢဝ်း ဢွၵ်ႇမႃးထၢႆႇLive သပ်းလႅင်းၼႄ ၵူၼ်းမိူင်းတင်းၼမ်ဝႃႈ ၶၢဝ်ႇဢၼ်ဢွၵ်ႇၵႂႃႇၼၼ်ႉ မၼ်းဢမ်ႇၸႂ်ႈပဵၼ်ၶၢဝ်ႇလွင်ႈတႄႉ။ ၶႃႈႁဝ်း ၼပ်ႉယမ် ၽူႈပၼ် ႁႅင်းၶႃႈသေ တေသိုပ်ႇၶတ်းၸႂ်ႁွင်ႉၽဵင်းၵႂၢမ်းၵႂႃႇထႅင်ႈယူႇ ဝႃႈၼႆ။

ယူႇတီႈၸုမ်းၶၢဝ်ႇၽူႈတွႆႇႁွၵ်ႈလႆႈတွင်ႈထၢမ်ထိုင် ပီႈၸၢႆးသၢႆမၢဝ်း မိူဝ်ႈၶမ်ႈဝႃး ၶၢဝ်းယၢမ်း မွၵ်ႈ 10:30 မူင်း ၵၢင်ၶိုၼ်းၼၼ်ႉ ယူႇတီႈၸၢႆးသၢႆမၢဝ်း တွပ်ႇလၢတ်ႈဝႃႈ “ တေႃႈလဵဝ် ၶႃႈႁဝ်းယူႇဝႆႉတီႈတႃႈၵုင်ႈ(ယၼ်ႇၵုင်ႇ)။ ပၢႆးယူႇလီၶႃႈႁဝ်း ၶႅမ်ႉလႅပ်ႈယူႇလီၶိုၼ်ႈမႃးတင်းၼမ်ၶႃႈ တင်ႈတႄႇလႆႈၵႂႃႇယူတ်းယႃတူဝ်တီႈၵုင်းထဵပ်ႈပွၵ်ႈမႃး။ ၶႃႈႁဝ်းၸၢႆးသၢႆမၢဝ်း ဢမ်ႇပဵၼ်သင်ၶႃႈ” ဝႃႈၼႆ။

ၸၢႆးသိူဝ်တႆး ၽူႈၸွႆႈထႅမ်တူၺ်းထိုင် မေႃၵႂၢမ်း ၸၢႆးသၢႆမၢဝ်း လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၶမ်ႈဝႃး ၶႃႈႁဝ်းတိုၵ်ႉ လၢတ်ႈတေႃႇတင်းပီႈသၢႆမၢဝ်းယူႇ။ ၵႃႈၸူဝ်ႈပီႈသၢႆမၢဝ်း မႃးယူတ်းယႃတူဝ် တီႈၵုင်းထဵပ်ႈသေ ပွၵ်ႈမိူဝ်းၼႆႉ ပီႈသၢႆမၢဝ်း ယူႇလီၵိၼ်ဝၢၼ်မႃးတင်းၼမ်ယဝ်ႉ။ လိူဝ်ၼၼ်ႉ ၼႂ်းၶၢဝ်းတၢင်း 2-3 လိူၼ်တၢင်းၼႃႈၼႆႉ ပီႈသၢႆမၢဝ်း ပေႃးတေၶဝ်ႈမႃး ၵူတ်ႇထတ်းပၢႆးယူႇလီ တီႈၵုင်းထဵပ်ႈထႅင်ႈၵမ်းၼိုင်ႈယဝ်ႉ” ဝႃႈၼႆ။

မိူဝ်ႈလိူၼ်ဢေႊပရိူဝ်ႊ(April) ပူၼ်ႉမႃးၼႆႉ ၸၢႆးသၢႆမၢဝ်း လႆႈၵႂႃႇယူတ်းယႃတူဝ် တီႈႁူင်းယႃသူႇၶုမ်ဝိတ်ႉ ဝဵင်းလူင်ၵုင်း ထဵပ်ႈ(မိူင်းၵွၵ်ႇ) ၸိုင်ႈထႆး။ လႆႈၽႃႇတတ်းတၢင်းပဵၼ်တီႈတႂ်သေ သိုပ်ႇယူတ်းယႃတူဝ်လုမ်းလႃးတီႈ ႁူင်းယႃၼၼ်ႉၵႂႃႇ၊ ယွၼ်ႉပၢႆးယူႇလီ ၶႅမ်ႉလႅပ်ႈယူႇလီၶိုၼ်ႈမႃးယဝ်ႉလႄႈ ထိုင်မႃး ႁၢင်လိူၼ်ဢေႊပရိူဝ်ႊ ၸင်ႇလူင်းႁူင်းယႃသေ ပွၵ်ႈၶိုၼ်းတႃႈၵုင်ႈ ဝႃႈၼႆ။