ၵူၼ်းမိူင်းလႃႈသဵဝ်ႈ ၺႃး သိုၵ်းမၢၼ်ႈၸႂ်ႉၶိူင်ႈမိၼ်ပွႆႇမၢၵ်ႇသႂ်ႇ ၼၢင်းယိင်း 2 ၵေႃႉ ၼႂ်းၼၼ်ႉ ၵေႃႉၼိုင်ႈ လူႉတၢႆၽွင်းယူတ်းယႃတူဝ်။
ဝၼ်းတီႈ 15/1/2023 ယၢမ်းႁူဝ်ၶမ်ႈ 3 မူင်းၼၼ်ႉ သိုၵ်းမၢၼ်ႈၸႂ်ႉၶိူင်ႈမိၼ် ပွႆႇမၢၵ်ႇလူင်သႂ်ႇလႄႈ ၵူၼ်းဝၢၼ်ႈၵုၼ်ၵႅင်း ၸႄႈဝဵင်းလႃႈသဵဝ်ႈ လူႉတၢႆ 2 ၵေႃႉ ၼႂ်းၼၼ်ႉလူႉတၢႆထင်တီႈၵေႃႉၼိုင်ႈ လူႉတၢႆၽွင်းယူတ်းယႃတူဝ်ၵေႃႉၼိုင်ႈ။
ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ တီႈၵုၼ်ၵႅင်း ၼႆႉ သိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇသႂ်ႇလႄႈ ၼၢင်းယိင်းၵေႃႉၼိုင်ႈတၢႆထင်တီႈ။ထႅင်ႈၵေႃႉၼိုင်ႈၵေႃႈ လူႉတၢႆ ၼႂ်းဝၼ်းတီႈ 16 မိူဝ်ႈၽွင်းယူတ်းယႃတူဝ်ယူႇ ၼၼ်ႉ ဢေႃႈ။ ႁိူၼ်းပႃႈလီၶဝ်ယူႇၼၼ်ႉၵေႃႈ လႅဝ်ၽႅဝ်ႉဢေႃႈၼၼ်ႉ ” – ဝႃႈၼႆ။
ၼၢင်းယိင်း 2 ၵေႃႉ ဢၼ်လူႉတၢႆၵႂႃႇၼႆႉ ၸိုဝ်ႈ ၼၢင်းပီး လႄႈ ၼၢင်းၶမ်း ။တူဝ်တၢႆၶဝ်ၼၼ်ႉ သိုၵ်းၵဝ်ႈၵၢင်ႉ MNDAA ဢဝ်ၵႂႃႇလုမ်းလႃးပၼ် လႆႈႁူႉၸွမ်းၼင်ႇၼႆ။
ၶၢဝ်းတၢင်း ၸုမ်းဢူၺ်းလီပွတ်းႁွင်ႇ တႄႇၽႅၼ်တိုၵ်း 1027 မႃးၼႆႉ ၵူၼ်းမိူင်းလူႉတၢႆ ယွၼ်ႉပၢင်တိုၵ်း ဢမ်ႇယွမ်း 40 ၵေႃႉ ၼႂ်းၼၼ်ႉ ပႃးၵူၼ်းလႃႈသဵဝ်ႈ 10 ၵေႃႉဝႃႈၼႆ။
ယၢမ်းလဵဝ် ၵူၼ်းပၢႆႈၽေးသိုၵ်း တီႈဝဵင်ႈလႃႈသဵဝ်ႈၼႆႉ သဵၼ်ႈမၢႆၵူၼ်းပၢႆႈၽေး ႁၢၼ်ႉတေႃႇထိုင် ဝၼ်းတီႈ 13 ၼႆႉတီႈ ဝတ်ႉပၢင်ၼႃး 630 ၵေႃႉ၊ ႁူင်းႁဵၼ်းၸိူဝ်ႉၸၢတ်ႈ မိူင်းယေႃ 440 ၵေႃႉ၊ ဝတ်ႉဝၢၼ်ႈဢၢႆႇၼိူဝ် 410 ၵေႃႉ၊ ဝတ်ႉၵၢင်မိူင်း 122 ၵေႃႉ၊ ဝတ်ႉ ႁူမ်ႈယဵၼ် 305 ၵေႃႉ၊ ဝတ်ႉတေႃးယ 350 ၵေႃႉ၊ ဝတ်ႉထမ်ႈၶမ်း 140 ၵေႃႉ၊ ဝတ်ႉႁူဝ်ပိုၵ်ႉ 381 ၵေႃႉ၊ ဝတ်ႉၼႃး မူၼ်း 35 ၵေႃႉ၊ ဝတ်ႉတႃႈပုင်ႇ 210 ၵေႃႉ၊ ဝတ်ႉမိူင်းတဵမ် 250 ၵေႃႉ၊ ဝတ်ႉၵွင်းၶၢမ် 375 ၵေႃႉ၊ ဝတ်ႉႁူဝ်ၼမ်ႉ 340 ၵေႃႉလႄႈ ဝတ်ႉဝၢၼ်ႈ သူႈ 2,000 ၵေႃႉ ၼႆယဝ်ႉ။
ဝၼ်းတီႈ 16/11/2023 ယၢမ်းၵၢင်ၼႂ်ၼၼ်ႉၵေႃႈ သိုၵ်းမၢၼ်ႈတင်း ၸုမ်းဢူၺ်းလီ ပွတ်းႁွင်ႇ ယိုဝ်းၵၼ် တီႈဝၢၼ်ႈ တူင်ႉၶၢၼ်ႊ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်း ဝၢၼ်ႈ (ၸၢဝ်းၶၢင်) မၢတ်ႇၸဵပ်း 5 ၵေႃႉ။ ၼႂ်းၼၼ်ႉ ယိင်း 2 ၵေႃႉ ၸၢႆး 3 ၵေႃႉ ယၢမ်းလဵဝ် ၵူၼ်းမၢတ်ႇၸဵပ်းၼႆႉ လႆႈသူင်ႇဝႆႉတီႈ ႁူင်းယႃမူႇၸေႊ။
ၸွမ်းၼင်ႇၶေႃႈလႆႈၸႂ် ၵျီႊၼီႊဝႃႊ ၶွၼ်ႊဝႅၼ်ႊသျိၼ်ႊ ဢၼ်မိူင်းမၢၼ်ႈၶဝ်ႈပႃးလႆႈၸႂ်လူင်းလၢႆးမိုဝ်းဝႆႉၸွမ်းၼၼ်ႉတႄႉပႃးဝႆႉဝႃႈ – ၸုမ်းယိပ်းၵွင်ႈၵၢင်ႇၼႆႉ တေလႆႈငိူင်ႉဝႄႈလွင်ႈၸႂ်ႉၶိူင်ႈၵွင်ႈၵၢင်ႇဢၼ်တေပဵၼ်ၽေးတေႃႇၵူၼ်းမိူင်း၊ ပေႃးတေယိုဝ်းၵွင်ႈၼႆၵေႃႈ တေလႆႈငိူင်ႉဝႄႈတီႈၵူၼ်းမိူင်းယူႇသဝ်း၊ တေဢမ်ႇလႆႈဢဝ်ၵူၼ်းမိူင်းပဵၼ်ပဝ်ႉပၢႆၵၢၼ်သိုၵ်း၊ တေဢမ်ႇလႆႈဢဝ်ၵူၼ်းမိူင်းႁဵတ်းပဵၼ်ႁူဝ်ႉႁႄႉၼႂ်းပၢင်တိုၵ်းၼႆၸိူဝ်းၼႆႉဝႆႉ။ ၵူၺ်းၵႃႈတၢမ်တူဝ်သိုၵ်းမၢၼ်ႈတႄႉဢမ်ႇတွၼ်ႉႁဵတ်းၸွမ်းၶေႃႈတူၵ်းလူင်းမၢႆမီႈၼၼ်ႉသေပွၵ်ႈ။
