ၾူၼ်ယႂ်ႇလူမ်းလူင် တူၵ်းႁၢဝ်ႈႁႅင်း ထပ်းၵၼ် လၢႆဝၼ်းသေ ၼမ်ႉလုပ်ႇထူမ်ႈၼႂ်းဝၢၼ်ႈၼႃးႁႆးလူင် ၼႂ်းၵိင်ႇၸႄႈ ဝဵင်း တႃႈလိူဝ်ႇ ႁဵတ်းႁႂ်ႈၵူၼ်းဝၢၼ်ႈထူပ်းတၢင်းယၢပ်ႇၽိုတ်ႇလိူဝ်ႁႅင်း ဝႃႈၼႆ။

ဝၼ်းတီႈ 04/05/2018 ယၢမ်းၵၢင်ၼႂ်ၸဝ်ႉ မွၵ်ႈ 1 မူင်း 2 မူင်းၼၼ်ႉ မႄႈၼမ်ႉၶမ်း လုပ်ႇၼွင်းထူမ်ႈ ၼႂ်းဝၢၼ်ႈ ၼႃးႁႆးလူင် ၼႂ်းၵိင်ႇၸႄႈဝဵင်းတႃႈလိူဝ်ႇ ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။ လင်ႁိူၼ်းၵူၼ်းဝၢၼ်ႈ 5 လင် ၺႃးၼမ်ႉလုပ်ႇၼွင်းထူမ်ႈႁၢဝ်ႈႁႅင်းသေ ၶူၺ်လိၼ် ၵူမ်ႇသၢႆး ထူမ်ႈၶဝ်ႈထိုင်ၼႂ်းႁိူၼ်း ဝႃႈၼႆ။

ၸၢႆးၼုမ်ႇ ၽူႈတူင်ႉၼိုင် ၼႂ်းၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃး ၸိုင်ႈတႆးပွတ်းဢွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ၾူၼ် တူၵ်းႁႅင်း မႄႈၼမ်ႉၶမ်းၼွင်းလုပ်ႇထူမ်ႈၶိုၼ်ႈမႃးႁၢဝ်ႈႁႅင်းသေ ၵူၼ်းဝၢၼ်ႈ ၼႅတ်ႈဢွၼ်ၵၼ်ၶၢႆႉ ၶူဝ်းႁိူၼ်းယေး ၵႂႃႇဝႆႉ တီႈသုင်။ လင်ႁိူၼ်းဢၼ်ၺႃးၼမ်လိူဝ်ပိူၼ်ႈတႄႉ တင်း မူတ်း မီး 4 လင်။ ၼမ်ႉထူမ်ႈထိုင်ဢႅဝ်ဢေႃႈ။ ၶီႈဢုင် ၶီႈငႂ်ႈ ဢၼ်လႆမႃးၸွမ်းၼၼ်ႉတႄႉ ၵိုတ်းၶၢင်ႉဝႆႉ ၼႂ်းႁိူၼ်းယေးၼႃၼႃႇၶႃႈ။ ၼႂ်းၵိဝ်ႇဝၢၼ်ႈၵေႃႈၼမ်ဢေႃႈ” ဝႃႈၼႆ။

သိုပ်ႇလၢတ်ႈဝႃႈ မိူဝ်ႈၶွမ်ႊပၼီႊၶဝ်ဢမ်ႇပႆႇမႃးၶုတ်းၶမ်းတႄႉ ၼမ်ႉဢမ်ႇသူႈထူမ်ႈၶႃႈ။ ပႃ ပူ ဢၼ်မီး ၼႂ်းမႄႈၼမ်ႉၶမ်းၼၼ်ႉ ႁဝ်းၶႃႈ ၵူၼ်းဝၢၼ်ႈ ဢွၼ်ၵၼ်ႁႃၵိၼ် တေလႆႈဝႃႈ ပဵၼ်မႄႈၼမ်ႉ ဢၼ်ၵူၼ်းမိူင်း လႆႈပိုင်ႈဢိင်ၵိၼ်တႄႉတႄႉ။ ဝၢႆးၶွမ်ႊပၼီႊၸိူဝ်းၼႆႉ မႃးၶုတ်းၶမ်း၊ ပူ၊ ပႃ တူဝ်သတ်းၼႂ်းၼမ်ႉၵေႃႈ ဢမ်ႇမီးယဝ်ႉ။ လိူဝ်ၼၼ်ႉ ႁဝ်းၶႃႈ ၵူၼ်းမိူင်း လႆႈဢွၼ်ၵၼ်သိုဝ်ႉၵိၼ်ၼမ်ႉထႅင်ႈလူးၵွၼ်ႇ။ ပေႃးၾူၼ်တူၵ်း မႃးႁၢဝ်ႈႁႅင်းၵေႃႈ ႁဝ်းၶႃႈ လႆႈဢွၼ်ၵၼ်ဝႆႉသတိတႄႉတႄႉ ၵူဝ်ၼမ်ႉလုပ်ႇထူမ်ႈမႃးႁၢဝ်ႈႁႅင်း လွင်ႈၼႆႉ ၵူၼ်းဝၢၼ်ႈႁဝ်း လႆႈထူပ်းတၢင်းယၢပ်ႇၽိုတ်ႇတႄႉ” ဝႃႈၼႆ။

ဝၢၼ်ႈၼႃးႁႆးလူင်ၼႆႉ ပေႃးၾူၼ်တူၵ်းႁၢဝ်ႈႁႅင်းၸိုင် ၼမ်ႉၵႆႉၵႆႉလုပ်ႇထူမ်ႈၶဝ်ႈဝၢၼ်ႈတႃႇသေႇ။ ပွၵ်ႈၼႆႉ တေလႆႈဝႃႈ လုပ်ႉထူမ်ႈၶဝ်ႈၼႂ်းဝၢၼ်ႈ ၼႂ်းႁိူၼ်းၵူၼ်းဝၢၼ်ႈႁၢဝ်ႈႁႅင်း။ ၵႆႇဢၼ်ၵူၼ်းဝၢၼ်ႈလဵင်ႉၵေႃႈတၢႆ ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၵူၼ်းဝၢၼ်ႈၼႃးႁႆးလူင် တင်း ၸုမ်းတူင်ႉၼိုင်တူင်ႇဝူင်းၵူၼ်း ႁူမ်ႈၵၼ်သေ တုၵ်းယွၼ်း ႁႂ်ႈၵိုတ်းယင်ႉ ၵၢၼ်ၶုတ်းၶမ်းမႃးလၢႆပွၵ်ႈၵေႃႈ ဢမ်ႇလႆႈ၊ သိုပ်ႇၶုတ်းၶမ်းယူႇၵူႈမိုဝ်ႉၵူႈဝၼ်း၊ ဢၼ်ၶဝ်ၶုတ်းၶမ်း မႃး ၵေႃႈမီးႁိမ်း 10 ပီယဝ်ႉ ဝႃႈၼႆ။