မိူဝ်ႈၼႆႉ ဝၼ်းတီႈ 2/10/2023 ယၢမ်းၵၢင်ၼႂ် 10 မူင်းၼၼ်ႉ သိုၵ်းမၢၼ်ႈ ၵိုင်ႉၵင်ႉသင်ႇဢိုတ်းၵဵတ်ႉလၢၼ်ႇတႃႈပိင်း ဢၼ်မီးၼႂ်းၵႄႈၸႄႈဝဵင်းၵဵင်းတုင် – မိူင်းလႃး ၸိုင်ႈတႆးပွတ်းဢွၵ်ႇ လွင်ႈၼႆႉ ၵူၼ်းမိူင်းမႆႈၸႂ်ၵူဝ်ပဵၼ်ၶၢဝ်းယၢဝ်း ။

ၵူၼ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ မိူဝ်ႈလဵဝ် ၶဝ်သင်ႇဢိုတ်းဝႆႉယဝ်ႉ ဢမ်ႇၸၢင်ႈၵႂႃႇမႃးယဝ်ႉတၢင်းၼႆႉ။လွင်ႈၼႆႉ ႁဝ်းၶႃႈတႄႉ ၵူဝ်ပဵၼ်ၶၢဝ်းယၢဝ်းၵူၺ်းဢေႃႈ ” – ဝႃႈၼႆ။

တၢင်းသဵၼ်ႈၼႆႉ ပဵၼ်ဢၼ်လမ်ႇလွင်ႈ တႃႇၵူၼ်းၵႃႉၵူၼ်းၶၢႆ ၸိုင်ႈတႆးပွတ်းဢွၵ်ႇ  ။ မိူဝ်ႈတၢင်းပဵၼ်ၶူဝ်ႊဝိတ်ႉၽႄႈလၢမ်းၵေႃႈ ထုၵ်ႇပိၵ်ႉဢိုတ်းမႃး ၶၢဝ်းတၢင်းၼပ်ႉႁူဝ်လိူၼ်မၼ်းလႄႈ မိူဝ်ႈလဵဝ် ၵူဝ်ပိၵ်ႉဢိုတ်းႁိုင်ထႅင်ႈၼႆ ၵူၼ်းပိုၼ်ႉတီႈ ၶၢင်းပွင်ႉမႆႈၸႂ်ၼင်ႇၼႆ။

ၵူၼ်းပိုၼ်ႉတီႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၶဝ်ၸႂ်ႉပိၵ်ႉယွၼ်ႉသင်ၵေႃႈ ဢမ်ႇႁူႉ ။ ဢမ်ႇၼၼ်ၵေႃႈ ယွၼ်ႉၽွၼ်းယွၼ်ႈ ပၢင်တိုၵ်းပွတ်းႁွင်ႇပဵၼ်မႃးၶိူဝ်းယႂ်းလႄႈ ၶဝ်ၵူဝ်မၼ်းလၢမ်းထိုင်တၢင်းၼႆႉ ႁိုဝ်ၼႆ ထၢင်ႇထိူမ်ၵၼ်ဝႆႉ ” – ဝႃႈၼႆ ။

မိူဝ်ႈပီ 2016 လိူၼ် Sep 28 ဝၼ်း သိုၵ်းဝႃႉ UWSA သူင်ႇႁႅင်းသိုၵ်းႁိမ်းႁဵင် ၶဝ်ႈယိုတ်းတပ်ႉမိူင်းလႃး ဢမ်ႇယွမ်း ႁႃႈတီႈ။ ၼိူဝ်သဵၼ်ႈတၢင်းၵဵင်းတုင်-မိူင်းလႃး ဝူင်ႈၵၢင်လၢၼ်ႇတႃႈပိင်းတင်းမိူင်းလႃး ၺႃးသိုၵ်းဝႃႉ ယိုတ်းဢဝ် 3 တီႈ – တပ်ႉၵိဝ်ႇသၢႆး၊ လၢၼ်ႇပၢင်မၢၵ်ႇၾႆး၊ တင်းတပ်ႉလွႆသၢမ်သုမ်။ တင်ႈတႄႇၼၼ်ႉမႃးသိုၵ်းမၢၼ်ႈသင်ႇပိၵ်ႉလၢၼ်ႇတႃႈပိင်းဢမ်ႇပၼ်ၵူၼ်း/ၵႃး ၵႂႃႇမႃး။  ထိုင်မႃးဝၼ်းတီႈ 16/9/2021 ၸင်ႇပိုတ်ႇၶိုၼ်း ။   မိူဝ်ႈလဵဝ်သိုၵ်းမၢၼ်ႈသမ်ႉ ၶိုၼ်းသင်ႇဢိုတ်းဝႆႉထႅင်ႈ။

ထႅင်ႈၾၢႆႇၼိုင်ႈၵေႃႈ NDAA မိူင်းလႃး ဢွၵ်ႇလိၵ်ႈပိုၼ်ၽၢဝ်ႇဝႆႉဝႃႈ – တေၵႂႃႇၸွမ်းပိူင်ၵၢၼ်မိူင်း ဢၼ်တမ်းဝၢင်းဝႆႉၵူၺ်း။ ၸုမ်းယိပ်းၵွင်ႈၵၢင်ႇၸုမ်းလႂ်ၵေႃႈယဝ်ႉ တေဢမ်ႇယွမ်းႁႂ်ႈ မႃးပူၼ်ႉပႅၼ်ၼႂ်းၼႃႇလိၼ်ၸဝ်ႈၵဝ်ႇ ဝႃႈၼႆဝႆႉ။

ၸႄႈဝဵင်းမိူင်းလႃးၼႆ့ ယူႇႁၢင်ႇၵႆ ၸႄႈဝဵင်းၵဵင်းတုင် မွၵ်ႈ 65 လၵ်း မီးၸဵင်ႇႁွင်ႇဝၼ်းဢွၵ်ႇ ဝဵင်းၵဵင်းတုင် သဵၼ်ႈတၢင်းမိူင်းလႃး – ၵဵင်း တုင်ၼႆ့ ပဵၼ်သဵၼ်ႈတၢင်းၵႃ့ၶၢႆ သဵၼ်ႈၼိုင်ႈ ။ ၸႄႈဝဵင်းမိူင်းလႃးၼႆ့ ပဵၼ်ဝဵင်းတိတ်းၸပ်းလႅၼ်လိၼ်ၶႄႇ ဝဵင်းၼိုင်ႈ ၼႆယဝ့် ။

မိူဝ်ႈပီ 2017 လိူၼ်သႅပ်ႊထႅမ်ႊပိူဝ်ႊ 28 ဝၼ်းၼၼ့် သိုၵ်းဝႃ့ UWSA ဢဝ်ဢဵၼ်ႁႅင်းသိုၵ်းတင်းၼမ် မႃးပုတ်ႈႁိမ်ဢဝ် တပ့်ႁူမ်ႇလူမ်ႈ မိူင်း လႃး ဢၼ်ပၵ်းဝႆ့ ၸွမ်းလႅၼ်လိၼ် မိူင်းလႃး – ၵဵင်းတုင် တိတ်းၸပ်းၵၼ်  မိူၼ်ၼင်ႇ ၼွင်ႁုၵ်ႈ၊ လွႆသၢမ်သုမ်၊ လွႆၵိဝ်ႇသၢႆး၊ ၵဵတ်ႉပၢင် မၢၵ်ႇၾႆးလႄႈ ၵဵတ်ႉၶူဝ်သုင် ၸိူဝ်းၼႆ့သေ ႁဵတ်းႁႂ်ႈမီးလွင်ႈယုင်ႈယၢင်ႈသုၵ်ႉသၵ့် ၵၼ်မႃး ၼႂ်းၵႄႈမိူင်းလႃး တင်း ဝႃ့ ။