တူၼ်ႈမႆႉႁုင်းလူင် ၵူၼ်ႇတဵင် ဝိႁၢရ်ၽြႃးၵိင်း ဝဵင်းမိူင်းၼၢႆး

ၾူၼ်ယႂ်ႇလူမ်းလူင် ၽတ်ႉပဝ်ႇႁၢဝ်ႈႁႅင်း ၼႂ်းၸႄႈဝဵင်းမိူင်းၼၢႆး ႁဵတ်းႁႂ်ႈတူၼ်ႈမႆႉယႂ်ႇ/မႆႉလူင် ႁၵ်းတဵင်ဝိႁၢရ် ၽြႃးၵိင်း ၼႂ်းၸႄႈဝဵင်းမိူင်းၼၢႆး၊ ဝိႁၢရ်လႄႈႁုၼ်ႇႁၢင်ႈၽြႃး လူႉၵွႆၼမ်။

ဝၼ်းတီႈ 01/05/2018 ယၢမ်းၵၢင်ၶမ်ႈ 7 မူင်းပၢႆၼၼ်ႉ ၾူၼ်ယႂ်ႇလူမ်းလူင် ၽတ်ႉပဝ်ႇႁၢဝ်ႈႁႅင်းသေ တူၼ်ႉမႆႉႁုင်း လူင် ႁၵ်းလူမ်ႉတဵင်သႂ်ႇဝိႁၢရ်ၽြႃးၵိင်း ဝၢၼ်ႈၵၢတ်ႇၼွၵ်ႈ ဢိူင်ႇၼမ်ႉမေႃႇသူမ်ႈ ၸႄႈဝဵင်းမိူင်းၼၢႆး ၸႄႈတွၼ်ႈလၢင်း ၶိူဝ်း ၸိုင်ႈတႆးပွတ်းၸၢၼ်း။

ၸၢႆးမွင်ႇၵျီႇ ၽူႈပွင်ၵၢၼ် ၸုမ်းႁၵ်ႉပႅင်းပႂ်ႉပႃး သၽႃဝ ၾိင်ႈတိုၼ်းပဵၼ် ၸႄႈဝဵင်းမိူင်းၼၢႆး လၢတ်ႈတီႈၽူႈတွႆႇႁွၵ်ႈ ဝႃႈ “ တူၼ်ႈမႆႉ ဢၼ်ႁၵ်းလူမ်ႉတဵင်သႂ်ႇဝိႁၢရ်ၽြႃးၵိင်းၼၼ်ႉ တေလႆႈဝႃႈ ပဵၼ်တူၼ်ႈမႆႉ ဢၼ်မီးမႃးပီယၢဝ်းၶၢဝ်းႁိုင်။ တူၼ်ႈမႆႉႁုင်းၼၼ်ႉ မႆႉႁၢႆး တင်းတူၼ်ႈၽၵ်းႁီႉ ဢွၵ်ႇၵိုၵ်းၵၼ်ဝႆႉ။ လွင်ႈဢၼ်တူၼ်ႈမႆႉႁၵ်းလူမ်ႉသႂ်ႇ ဝိႁၢရ်ၽြႃးၵိင်း ၼႆႉႁုၼ်ႈႁၢင်ႈၽြႃၵိင်း ႁုၼ်ႁၢင်ႈရႁၢၼ်းတႃႇ လူႉၵွႆၵႂႃႇလၢႆလၢႆသူႇဢေႃႈ” ဝႃႈၼႆ။

သိုပ်ႇလၢတ်ႈဝႃႈ ၵႃႈၶၼ်ဢၼ်လႆႈလူႉသုမ်းၵႃႈႁိုဝ် ဢၼ်ဝႃႈၼၼ်ႉ ႁဝ်းၶႃႈ ဢမ်ႇလၢမ်းလႆႈ ၵူၺ်းၵႃႈ လီသေလၢႆ မၼ်း ပဵၼ်ႁွႆးမိုဝ်းၵဝ်ႇၵႄႇတႆးႁဝ်း ႁဵတ်းသၢင်ႈမႃး ပီယၢဝ်းၶၢဝ်းႁိုင်။ ပေႃးတူၺ်းၼႂ်းမိူင်းၼၢႆးႁဝ်းၸိုင် ဝတ်ႉႁူဝ်ၶူဝ် တင်းလွႆ ၸၢင်ႉၼႆႉ မၼ်းမီးမႃးႁိုင် ႁူဝ်ပၢၵ်ႇပီ ၵိုၵ်းဝဵင်းမိူင်းၼၢႆးႁဝ်းၶႃႈမႃး တေႃႇယၢမ်းလဵဝ်” ဝႃႈၼႆ။

ၵဵဝ်ႇၵပ်းလွင်ႈၼႆႉ လွင်ႈတုမ်ႉတိူဝ်ႉၵူၼ်းမိူင်းမၢတ်ႇၸဵပ်းလူႉတၢႆ ဢမ်ႇမီး ယူႇတီႈၵူၼ်းဝၢၼ်ႈ ၽူႈမီးပုၼ်ႈၽွၼ်း ၼႂ်း ဝၢၼ်ႈ ၼႂ်းဢိူင်ႇ ႁူမ်ႈၵၼ်သေ တႅပ်းပႅတ်ႈ ၽဵဝ်ႈပႅတ်ႈတူၼ်ႈမႆႉ ဢၼ်ႁၵ်းလူမ်ႉတဵင်ၸိူဝ်းၼၼ်ႉ ဝႃႈၼႆ။

ဝတ်ႉဝိႁၢရ်လူင်ႁူဝ်ၶူဝ်ၼႆႉ ႁိမ်းတၢင်းၶဝ်ႈဢွၵ်ႇဝဵင်းမိူင်းၼၢႆး ၼႂ်းဢိူင်ႇၼမ်ႉမေႃႇသူမ်ႈ ၼိူဝ်တၢင်းလူင်လုၵ်ႉၼမ်ႉၸၢင်၊ ႁၢႆးၽၵ်း ၶဝ်ႈၸူး ဝဵင်းမိူင်းၼၢႆး ဝႃႈၼႆ။

ၶႅပ်းႁၢင်ႈ FB – Sai Sunloi