ၶွမ်ႊမတီႊငမ်းယဵၼ် – ၸႄႈမိူင်း JMC-S တင်းၶွမ်ႊမတီႊငမ်းယဵၼ် – ၸႄႈတွၼ်ႈ JMC-L ႁူမ်ႈၵၼ်သေ လူင်းပိုၼ်ႉတီႈ ႁူပ်ႉထူပ်းၵူၼ်းမိူင်း ၼႂ်းၸႄႈဝဵင်းမိူင်းပၼ်ႇ သပ်းလႅင်းၼႄ လွင်ႈၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ဝႃႈၼႆ။

ဝၼ်းတီႈ 27/04/2018 ၶွမ်ႊမတီႊပႂ်ႉတူၺ်းလွင်ႈငမ်းယဵၼ် ၸၼ်ႉၸႄႈမိူင်း JMC-S တင်း JMC-L ၊ ၽူႈတႅၼ်း သၽႃးလႄႈၶႃႈႁၢပ်ႇၵၢၼ်လူင်ပွင်ၸိုင်ႈ ႁူမ်ႈၵၼ် လူင်းပိုၼ်ႉတီႈႁူပ်ႉထူပ်းၵူၼ်းမိူင်း တီႈ ဝၢၼ်ႈၼွင်ပႃမူၼ်ႇ ၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။ ၵူၼ်းမိူင်းၶဝ်ႈႁူမ်ႈထွမ်ႇငိၼ်း 300 ပၢႆ။

ၸၢႆးၼွင်ႉ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ(1) ၸႄႈဝဵင်းမိူင်းပၼ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ၸုမ်း JMC ၶဝ် မႃးလၢတ်ႈၼႄလွင်ႈဝႃႈ JMC ၼႆႉႁဵတ်းသင်ဝႆႉယူႇ။ ယဝ်ႉၵေႃႈ ႁႂ်ႈၵူၼ်းမိူင်းပႂ်ႉပႃးပၼ်ၸိူင်ႉႁိုဝ်။ ပၵ်းပိူင် JMC သမ်ႉမီးၸိူင်ႉႁိုဝ်။ ယဝ်ႉၵေႃႈ သပ်းလႅင်း လွင်ႈတူင်ႉၼိုင်ႁဵတ်းသၢင်ႈ ၸိူဝ်းၼၼ်ႉ။ လိူဝ်ၼၼ်ႉ သပ်းလႅင်း ၼႄလွင်ႈ ဝၢႆးလူင်း NCA ၵႂႃႇယဝ်ႉၼၼ်ႉ ၶေႃႈယိူင်းဢၢၼ်း NCA မီးသင် ၸဵမ်ၸိူဝ်းၼႆႉ” ဝႃႈၼႆ။

ၵဵဝ်ႇၵပ်းလွင်ႈႁူပ်ႉထူပ်းၵူၼ်းမိူင်းၼႆႉ သပ်းလႅင်းၼႄ ၵူၼ်းမိူင်း လွင်ႈ NCA ၵမ်ႈၽွင်ႈ၊ ပၵ်းပိူင်မၢႆမီႈၵၢၼ်ၵိုတ်းသိုၵ်း ဢၼ်သိုၵ်းလူဝ်ႇလႆႈတိုဝ်းၵမ်၊ ၵဵဝ်ႇလူၺ်ႈလွင်ႈ တႃႇၵႅတ်ႇၶႄႁႄႉၵၢင်ႈ ၵူၼ်းမိူင်းလႄႈ သပ်းလႅင်းပႃး သင်ဝႃႈ ၽႂ်/ ၸုမ်းလႂ် ပူၼ်ႉပႅၼ်ပၵ်းပိူင်မၢႆမီႈၸိုင် ႁႂ်ႈၵူၼ်းမိူင်းတၢင်ႇထိုင် JMC ၸဵမ်ၸိူဝ်းၼႆႉ။

ၶွမ်ႊမတီႊႁူမ်ႈပႂ်ႉတူၺ်း လွင်ႈငမ်းယဵၼ် – ၸၼ်ႉၸႄႈမိူင်း JMC-S ၼႆႉ ႁူဝ်ပဝ်ႈ ပဵၼ်ၸွမ်ႁၢၼ်တၢၼ်းလၢႆႇ ၽူႈ ၵွၼ်းငဝ်ႈငုၼ်းတိူင်းသိုၵ်းယလၶၶူဝ်လမ်။ ၵေႃႉဢွၼ်ႁူဝ်လူင်းႁူပ်ႉၵူၼ်းမိူင်း။ ၼႂ်းၸုမ်းၸိူဝ်းလူင်းႁူပ်ႉ ၵူၼ်းမိူင်း ၼၼ်ႉ မီးတူဝ်တႅၼ်း RCSS/SSA ၊ PNLO တင်း တူဝ်တႅၼ်းၵူၼ်းမိူင်း၊ တူဝ်တႅၼ်း တပ်ႉသိုၵ်းလူင်ပွင်ၸိုင်ႈမၢၼ်ႈ ၶဝ်ႈပႃးၸွမ်း ဝႃႈၼႆ။

ဓါတ်ပုံ – JMC-S (Shan )