NUG ပၼ်ၾၢင်ႉ လွင်ႈသိုၵ်းမၢၼ်ႈတေပိုၼ်ၽၢဝ်ႇတႃႉၶၢႆႁိူၼ်းဢွင်ႇသၢၼ်းၸူႉၵျီႇ

ႁၢင်လိူၼ်သႅပ်ႊထိမ်ႊပိူဝ်ႊပူၼ်ႉမႃး  မီးၶၢဝ်ႇလိုဝ်းဝႃႈ သိုၵ်းမၢၼ်ႈယိုတ်းမိူင်း ဢၢၼ်းပိုၼ်ၽၢဝ်ႇတႃႉၶၢႆ (လေလံ) ႁိူၼ်း ဢွင်ႇသၢၼ်းၸူႉၵျီႇၼႆလႄႈ ၾၢႆႇ NUG  ဢွၵ်ႇလိၵ်ႈပၼ်ၾၢင်ႉ ယႃႇႁႂ်ႈသိုၵ်းမၢၼ်ႈယႃႉၵဝ်း  ။

သိုဝ်ႇ BBC ႁၢႆးငၢၼ်းဝႆႉဝႃႈ – “ မိူဝ်ႈဝၼ်းတီႈ 29/9/2023 ၼၼ်ႉ ၾၢႆႇ NUG ပိုၼ်ၽၢဝ်ႇလၢတ်ႈဝႃႈ လႆႈႁူႉၶေႃႈမုၼ်း လွင်ႈဢၼ်သိုၵ်းမၢၼ်ႈယိုတ်းမိူင်း ဢၢၼ်းၶိုင်ယႃႉၵဝ်းႁိူၼ်းၼၢင်းဢွင်ႇသၢၼ်းၸူႉၵျီႇၼၼ်ႉ တႅတ်ႈတေႃးယဝ်ႉ ။ ယွၼ်ႉၼၼ် ၵူၼ်းဢၼ် ၵဵဝ်ႇၶွင်ႈၸွမ်းလွင်ႈၼႆႉ မိူၼ်ၼင်ႇ ၵူၼ်းပၼ်ႁႅင်းဢီး ၊ ၵူၼ်းပၼ်ၶႂၢင်ႉ ၊ ၵူၼ်းၵမ်ႉထႅမ် ၊ ၵူၼ်းၸိူဝ်းႁူမ်ႈၶိုင်သၢင်ႈၸွမ်းၵၢၼ်ၸိူဝ်းၼႆႉ တၵ်းတေၺႃးတူတ်ႈတၢမ်ႇၸွမ်းပၵ်းပိူင်မၢႆမီႈမီးဝႆႉ ” – ဝႃႈၼႆ။

ဝၢင်းႁိူၼ်းၼၢင်းဢွင်ႇသၢၼ်းၸူႉၵျီႇ မၢႆႁိူၼ်း 54 တီႈဝဵင်းလူင်တႃႈၵုင်ႈၼႆႉ NUG ပိုၼ်ၽၢဝ်ႇ မိူဝ်ႈပီပူၼ်ႉမႃးဝႆႉဝႃႈ ဢွင်ႈတီႈၼႆႉ ပဵၼ်ဢွင်ႈတီႈ ၵိုၵ်းပိုၼ်း ၊ ပဵၼ်ၶူဝ်းပူၺ်ႈၸိူဝ်ႉၸၢတ်ႈ (အမျိုးသားအဆင့် ယဉ်ကျေးမှုအမွေအနှစ်) ၼႆယဝ်ႉ။

ဝၢင်းႁိူၼ်း မၢႆ 54 ၼႆႉ ပဵၼ်ႁိူၼ်းၸွမ်ႁၢၼ်ဢွင်ႇသၢၼ်း ဝၢႆးသေမၼ်းလူႉတၢႆၵႂႃႇယဝ်ႉ လွင်ႈၵၢၼ်ၸႅၵ်ႇၶူဝ်းပူၺ်ႈၼႂ်းၵႄႈ လုၵ်ႈယိင်းမၼ်း ဢၼ်ပဵၼ်ၼၢင်းဢွင်ႇသၢၼ်းၸူႉၵျီႇလႄႈ လုၵ်ႈၸၢႆးမၼ်း ဢူးဢွင်ႇသၢၼ်းဢူးၼႆႉၵေႃႈ ယၢမ်ႈမီးပၼ်ႁႃမႃးၶၢဝ်းႁိုင် ။

ၵဵဝ်ႇၵပ်းလွင်ႈတေပိုၼ်ၽၢဝ်ႇတႃႉၶၢႆႁိူၼ်းၼၢင်းဢွင်ႇသၢၼ်းၸူႉၵျီႇၼႆႉ သိုၵ်းမၢၼ်ႈယိုတ်းမိူင်း ပႆႇပိုၼ်ၽၢဝ်ႇဝႆႉ ပဵၼ်တၢင်းၵၢၼ် လိူဝ်ၼၼ်ႉ သိုဝ်ႇၶၢဝ်ႇဢၼ်လႂ်ၵေႃႈ ၾၢႆႇသိုၵ်းမၢၼ်ႈယိုတ်းမိူင်း ပႆႇႁပ်ႉတွပ်ႇလၢတ်ႈသပ်းၸႅင်ႈပၼ် လွင်ႈၼႆႉ လႆႈႁူႉၼင်ႇၼႆ။

 ဝၼ်းတီႈ 14/9/2023 ၼၼ်ႉၵေႃႈ ပႃႇတီႇၼူၵ်ႉယုင်း NLD  ဢွၵ်ႇလိၵ်ႈပိုၼ်ၽၢဝ်ႇၽိုၼ်ၼိုင်ႈ ပၼ်ၾၢင်ႉသိုၵ်းမၢၼ်ႈယိုတ်းမိူင်း  လွင်ႈပၢႆးယူႇလီ ဢွင်ႇသၢၼ်းၸူႉၵျီႇ ဢမ်ႇလႆႈယူတ်းယႃတူဝ် ။

ၼၢင်းဢွင်ႇသၢၼ်းၸူႉၵျီႇ ဢၼ်ပဵၼ်ႁူဝ်ပဝ်ႈပႃႇတီႇၼူၵ်ႉယုင်း NLD ၼႆႉ ၺႃးသိုၵ်းမၢၼ်ႈယိုတ်းမိူင်း ၼႄၶေႃႈမၢပ်ႇၼႄးလၢႆၶေႃႈ သေ တီႉၺွပ်းၵုမ်းၶင်  ၸဵမ်မိူဝ်ႈဝၼ်းတီႈ 1 လိူၼ်ၾႅပ်ႊပိဝ်ႊရီႊ ပီ 2021 ၊ ယၢမ်းလဵဝ်ႁိုင်မႃးၶၢဝ်းတၢင်း 2 ပီပၢႆ။