ဢွင်ႈတီႈၽူႈတႅၼ်းသၽႃး ဢၼ်လုတ်ႈႁၢမ်းပဝ်ႇဝႆႉ တင်းမူတ်း 13 တီႈၼင်ႈၼၼ်ႉ ယူႇတီႈၶွမ်ႊမသျိၼ်ႊ ပၢင်လိူၵ်ႈတင်ႈ မိူင်းႁူမ်ႈတုမ် တေၸတ်းႁဵတ်းပၢင်လိူၵ်ႈတင်ႈသွမ်ႈ ၽိူမ်ႉထႅမ်ဢွင်ႈတီႈၽူႈတႅၼ်း လုတ်ႈႁၢမ်းပဝ်ႇ ဝႆႉၸိူဝ်းၼၼ်ႉ ဝႃႈၼႆ။

တႄႇဢဝ် ဝၼ်းတီႈ 19 လိူၼ်ဢေႊပရိူဝ်ႊၼႆႉမႃး ယူႇတီႈၶွမ်ႊမသျိၼ်ႊပၢင်လိူၵ်ႈတင်ႈ မိူင်းႁူမ်ႈတုမ် တႄႇၵဵပ်း သဵၼ်ႈသၢႆမၢႆ ၽူႈတေမီးသုၼ်ႇတွတ်ႇၶႅပ်းၵၢင်ၸႂ် တႃႇၶၢဝ်းတၢင်း 5 ဝူင်ႈ/ပၢတ်ႈ ႁႂ်ႈၵဵပ်းယဝ်ႉတူဝ်ႈလီငၢမ်း ဝႃႈၼႆ။

တီႈၼင်ႈၽူႈတႅၼ်းသၽႃး ဢၼ်လုတ်ႈႁၢမ်းပဝ်ႇ 13 တီႈၼင်ႈၼၼ်ႉ ၼႂ်းမိူင်းတႆး ပႃးဝႆႉၼိုင်ႈတီႈၼင်ႈ ပဵၼ်တီႈၼင်ႈ ၽူႈတႅၼ်းသၽႃးၵူၼ်းမိူင်း ၸႄႈဝဵင်းလၢႆးၶႃႈ ဢွင်ႈတီႈ လုင်းၸၢႆးမူၼ်း ဝႃႈၼႆ။

ၸၢႆးၵျေႃႇၸေႇယ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ(1) ၸႄႈဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈတေၶဝ်ႈလိူၵ်ႈတင်ႈ ဢွင်ႈတီႈလုင်းၸၢႆးမူၼ်းၼၼ်ႉ ႁဝ်းၶႃႈ တေဢုပ်ႇၵႂႃႇတၢင်း ငဝ်ႈငုၼ်းၵွၼ်ႇ ဝႃႈတေႁဵတ်း ၸိူင်ႉႁိုဝ်။ တေႃႈလဵဝ်တႄႉ ႁဝ်းၶႃႈ ပႆႇႁၢင်ႈႁႅၼ်းသင် ငဝ်ႈငုၼ်းၵေႃႈ ပႆႇလႆႈတၢင်ႇလၢတ်ႈသင်။ တၢင်ႇပႃႇတီႇဢၼ်တေ ၶဝ်ႈၶဵင်ႇၵေႃႈ ပိူၼ်ႈပႆႇလၢတ်ႈသင် ပႆႇပိုၼ်ၽၢဝ်ႇသင်။ ဢၼ်ၶႃႈႁဝ်း လၢမ်းၶၢတ်ႈတႄႉ မၼ်းၵေႃႈတေပဵၼ် မိူၼ်ၼင်ႇ ၵူႈပွၵ်ႈမႃးၼၼ်ႉၵူၺ်း တေပဵၼ် ပႃႇတီႇႁူဝ်သိူဝ်၊ ပႃႇတီႇသိူဝ်ၽိူၵ်ႇ၊ ပႃႇတီႇၼူၵ်ႉယုင်းလႄႈ ပႃႇတီႇသၢင်ႇသီႈ ၸိူဝ်းၼႆႉ” ဝႃႈၼႆ။

ဢွင်ႈတီႈ ဢၼ်လုတ်ႈႁၢမ်းပဝ်ႇ 13 တီႈၼင်ႈၼၼ်ႉ တေပဵၼ်ဢွင်ႈတီႈ မိူၼ်ၼင်ႇ တိူင်းတႃႈၵုင်ႈ၊ ၸႄႈမိူင်းၶျၢင်း၊ ၸႄႈမိူင်းတႆး၊ တိူင်းတႃႈလိူဝ်ႇ၊ ၸႄႈမိူင်းၶၢင်၊ တိူင်းပႃႇၵိူဝ်၊ တိူင်းၸႄႈၵႅင်း၊ တိူင်းမၵူၺ်း၊ ၸႄႈမိူင်းရၶႅင်ႇ ၸိူဝ်းၼႆႉ ဝႃႈၼႆ။

ဢူးမိၼ်ႉၼၢႆႇ ၽူႈၶၢၼ်ပၢၵ်ႇ ၶွမ်ႊမသျိၼ်ႊပၢင်လိူၵ်ႈတင်ႈ မိူင်းႁူမ်ႈတုမ် လၢတ်ႈတီႈသိုဝ်ႇၶၢဝ်ႇ The Vioce ဝႃႈ “ ပၢင်လိူၵ်ႈတင်ႈသွမ်ႈၼႆႉ တေၸတ်းႁဵတ်း ၼႂ်းပီၼႆႉ။ ၵွၼ်ႇပႆႇထိုင်ဝၼ်းပၢင်လိူၵ်ႈတင်ႈၼၼ်ႉ တေပိုၼ်ၽၢဝ်ႇဝၼ်း ပၢင်လိူၵ်ႈတင်ႈ လူင်ႈၼႃႈ 6 လိူၼ်။ တေႃႈလဵဝ်ၼႆႉ တိုၵ်ႉၵဵပ်းသဵၼ်ႈသၢႆမၢႆတႃႇၵူၼ်းဢၼ်တေမီးသုၼ်ႇ တွတ်ႈၶႅပ်း ၵၢင်ၸႂ်ယူႇ” ဝႃႈၼႆ။

မိူဝ်ႈပီ 2017 ၼၼ်ႉ ယူႇတီႈၶွမ်ႊမသျိၼ်ႊပၢင်လိူၵ်ႈတင်ႈ မိူင်းႁူမ်ႈတုမ် လႆႈၸတ်းႁဵတ်းပၢင်လိူၵ်ႈတင်ႈသွမ်ႈမႃးယဝ်ႉ ၵမ်းၼိုင်ႈ တင်းမူတ်း ပႃႇတီႇ ဢၼ်ၶဝ်ႈၶႅင်ႇၵၼ် မီး 42 ပႃႇတီႇ။ ၽူႈတႅၼ်းဢၼ်ၶဝ်ႈလိူၵ်ႈတင်ႈ 88 ၵေႃႉ။ ယူႇတီႈ သုၼ်ႇတူဝ်သေ ၶဝ်ႈၶႅင်ႇသမ်ႉ မီး 7 ၵေႃႉ။ ဢွင်ႈတီႈဢၼ်လုတ်ႈႁၢမ်းပဝ်ႇ တီႈၼင်ႈၽူႈတႅၼ်းသမ်ႉ တင်းမူတ်း မီး 19 တီႈၼင်ႈ ဝႃႈၼႆ။