ပၢင်ၾိုၵ်းၽွၼ်ႉ ၽိူမ်ႉထႅမ်ၼမ်ႉၵတ်ႉ လၢႆးပူင်သွၼ်လိၵ်ႈလၢႆးတႆး ပွၵ်ႈၵမ်း 5 တီႈၸႄႈဝဵင်းၼွင်ၶဵဝ် မီးမေႃသွၼ် ၶဝ်ႈႁူမ်ႈလဵပ်ႈႁဵၼ်း 105 ၵေႃႉ ဝႃႈၼႆ။

ဝၼ်းတီႈ 23/04/2018 ၸုမ်းတူင်ႉၼိုင်တူင်ႇဝူင်းတႆး ၼႂ်းၸႄႈဝဵင်းၼွင်ၶဵဝ် ႁူမ်ႈၵၼ်သေ ၸတ်းႁဵတ်းပွႆးလူင်း ပၢင်ၾိုၵ်းၽွၼ်ႉ ၽိူမ်ႉထႅမ်ၼမ်ႉၵတ်ႉ လၢႆးပူင်သွၼ်လိၵ်ႈလၢႆးတႆး တီႈဝတ်ႉဝိႁၢရ်ၼမ်ႉၶူၵ်ႉ ဢိူင်ႇသၢမ်သိူဝ် ၸႄႈဝဵင်း ၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ ပၢင်သွၼ်ၼႆႉ ၽိူမ်ႉထႅမ်ပၼ် တႃႇမေႃသွၼ် ၸိူဝ်းတေၶဝ်ႈ ပူင်သွၼ် ၼႂ်းႁူင်းႁဵၼ်းလူင်ပွင်ၸိုင်ႈ ဝႃႈၼႆ။

ၸၢႆးဢွင်ႇမိူင်း ႁူဝ်ပဝ်ႈပႃႇတီႇႁူဝ်သိူဝ် ၸႄႈဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ၸတ်းႁဵတ်း ပၢင်ၾိုၵ်း ၽွၼ်ႉ ၽိူမ်ႉထႅမ်ၼမ်ႉၵတ်ႉမေႃသွၼ်ၼႆႉမႃး ၵူႈပီ။ ၾိုၵ်းၽွၼ်ႉႁၢင်ႈႁႅၼ်းပၼ် တႃႇမေႃသွၼ်ၶဝ် ၸိူဝ်းတေၵႂႃႇ ပူင်သွၼ်လိၵ်ႈတႆး ၼႂ်းႁူင်းႁဵၼ်းလူင်ပွင်ၸိုင်ႈ။ ယွၼ်ႉၼၼ် ႁဝ်းၶႃႈ ၸင်ႇလႆႈမွၵ်ႇထိုင် ၶူးပူင်သွၼ်လုင်းၸၢႆးၾႃႈ လႄႈ ဢိၵ်ႇပႃးထႅင်ႈ မေႃသွၼ် 7 ၵေႃႉ မႃးပူင်သွၼ်ပၼ်ၵႂႃႇ” ဝႃႈၼႆ။

ပၢင်ၾိုၵ်းၽွၼ်ႉၽိူမ်ႉထႅမ်ၼမ်ႉၵတ်ႉ မေႃသွၼ်ၼႆႉ ပိုတ်ႇပူင်သွၼ် တႄႇဢဝ် ဝၼ်းတီႈ 02-23/04/2018 တႃႇၶၢဝ်း တၢင်း ႁိမ်း 1 လိူၼ် ဝႃႈၼႆ။

ၼႂ်းၸႄႈဝဵင်းၼွင်ၶဵဝ်ၼႆႉ လႆႈၶႂၢင်ႉပူင်သွၼ်လိၵ်ႈတႆး ၼႂ်းႁူင်းႁဵၼ်းလူင်ပွင်ၸိုင်ႈမႃး မီးၶၢဝ်းတၢင်း 4 ပီ။ တေႃႈလဵဝ် ဢၼ်လႆႈပူင် သွၼ်ၼႂ်းႁူင်းႁဵၼ်းမီး 48 လင်၊ ၸၼ်ႉငဝ်ႈ(မူႇလ)၊ ၸၼ်ႉၵၢင်လႄႈ ၸၼ်ႉသုင် ၶၢဝ်းယၢမ်း ပူင်သွၼ် သမ်ႉ ယၢမ်းၵၢင်ၼႂ် 7 မူင်း ထိုင် 8 မူင်း ၵူႈဝၼ်းၸၼ်ထိုင် ဝၼ်းသုၵ်း ဝႃႈၼႆ။

ၸၢႆးဢွင်ႇမိူင်း လၢတ်ႈဝႃႈ “ ၼိုင်ႈႁူင်းႁဵၼ်းလႂ် ႁဝ်းၶႃႈတမ်းပၼ် မေႃသွၼ် 2 ၵေႃႉၶႃႈ။ ႁဝ်းၶႃႈ ဢမ်ႇၸႅၵ်ႇၸၼ်ႉ မၼ်းသေသွၼ်၊ မိူၼ် ၸၼ်ႉငဝ်ႈ ၸၼ်ႉၵၢင်လႄႈ ၸၼ်ႉသုင် ႁဝ်းၶႃႈ တေပူင်သွၼ်သၢမ်ၸၼ်ႉထၢၼ်ႈ။ ၶၢဝ်းယၢမ်း သွၼ်တႄႉ တေပဵၼ်ယၢမ်းၵၢင်ၼႂ် 7 မူင်း ထိုင် 8 မူင်း ၵူႈၼႂ်” ဝႃႈၼႆ။
ဢၼ်ၾိုၵ်းၽွၼ်ႉ မေႃသွၼ်ၸိူဝ်းၼႆႉၵေႃႈ ပိူဝ်ႈတႃႇၽိူမ်ႉထႅမ် ၶူးသွၼ်ၼႂ်းႁူင်းႁဵၼ်း ၸိူဝ်းၼႆႉယဝ်ႉ ဝႃႈၼႆ။