ၼႂ်းဝၼ်းလဵဝ်ၵူၺ်း လိၼ်ၵူၼ်ႇ ၊ ႁူဝ်ႉပင်း ၼႂ်းမိူင်းတႆးထပ်းၵၼ် 2 တီႈ မီးလွင်ႈလူႉသုမ်း လႄႈၵူၼ်းမၢတ်ႇၸဵပ်း ဢမ်ႇယွမ်း 5 ၵေႃႉ။

မိူဝ်ႈဝၼ်းတီႈ 2/9/2023 ဝၼ်းသဝ်ၼႆႉ ၾူၼ်တူၵ်းဢမ်ႇထၢတ်ႇသေ ႁဵတ်းႁႂ်ႈ လိၼ်ၵူၼ်ႇ ႁူဝ်ႉပင်း ၼႂ်းမိူင်းတႆး   တီႈဝဵင်းပၢင်လွင်း  လိၼ်ၵူၼ်ႇ မၢတ်ႇၸဵပ်း 4 ၵေႃႉ ၊ တီႈဝဵင်းလူင်တူၼ်ႈတီးၵေႃႈ ႁူဝ်ႉၵူၼ်ႇပင်းတဵင်ႁိူၼ်းသေ ၼၢင်းယိင်းၵေႃႉၼိုင်ႈမၢတ်ႇၸဵပ်းႁၢဝ်ႈႁႅင်း။

ၵူၼ်းၼႂ်းပိုၼ်ႉတီႈပၢင်လွင်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ဢၼ်လိၼ်ၵူၼ်ႇၼႆႉ ပဵၼ်ၵႂႃႇမွၵ်ႈ 4 မူင်းႁူဝ်ၶမ်ႈ ။ ယွၼ်ႉၾူၼ်တူၵ်းဢမ်ႇထၢတ်ႇလႄႈ လိၼ်ႇၵူၼ်ႇတီႈသဵၼ်ႈတၢင်းၵျႃႇမၼီႇၼၼ်ႉ။ မီးၵူၼ်းမၢတ်ႇၸဵပ်း 4 ၵေႃႉ သဵၼ်ႈတၢင်းၵႂႃႇမႃးၵေႃႈ ပေႃးတၼ်ဢေႃႈ ” – ဝႃႈၼႆ။ 

လိၼ်ဢၼ်ၵူၼ်ႇ တီႈဝဵင်းပၢင်လွင်းၼႆႉ ပဵၼ်ၵႂႃႇတီႈၼိူဝ်သဵၼ်ႈတၢင်းၵျႃႇမၼီႇ ႁိမ်းဝၢၼ်ႈၸိင်ႇပၢၼ်း ၼႂ်းဢိူင်ႇလွႆမၢဝ်း(လွယ်မော) ၼႆယဝ်ႉ။

ၽူႈမီးပုၼ်ႈၽွၼ်းၼႂ်းၸုမ်းၶႂၢႆႇၶႃပႄလႅင်တူၼ်ႈတီးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၾူၼ်တူၵ်းႁႅင်းလႄႈ ၵၢင်ၶမ်ႈ 9 မူင်းၼႆႉ ႁူဝ်ႉဢုတ်ႇတီႈၵျွင်းမုၼ်ၸဝ်ႈၵူၼ်ႇသႂ်ႇႁိူၼ်းလင်ၼိုင်ႈ ။ ႁူဝ်ႉဢုတ်ႇသမ်ႉ သုင်မွၵ်ႈ 6 ထတ်းၼႆႉ။ ၼၢင်းယိင်းဢၼ်ၼွၼ်းဝႆႉ ၼႂ်းႁိူၼ်းၼၼ်ႉ ၺႃးၽႃႁိူၼ်းတဵင်သႂ်ႇလႄႈ တႄႇဢဝ်ဢႅဝ်မၼ်းလူင်း ဢမ်ႇတူင်ႉလႆႈယဝ်ႉၼႆဢေႃႈ ” – ဝႃႈၼႆ။

ႁူဝ်ႉဢုတ်ႇဢၼ်ၵူၼ်ႇပင်းတဵင်ႁိူၼ်းၼႆႉ ပဵၼ်ႁူဝ်ႉဝတ်ႉၵျွင်းထမ်ႇမဝိတူႇ တီႈ ပွၵ်ႉရတၼႃႇသီႇရိ ၸႄႈဝဵင်းတူၼ်ႈတီး။ၼၢင်းယိင်းၵေႃႉဢၼ်မၢတ်ႇၸဵပ်းၼၼ်ႉၵေႃႈ သိုပ်ႇယူတ်းယႃတူဝ်ဝႆႉတီႈ ႁူင်းယႃလူင် ၸဝ်ႈၸၢမ်ႇထုၼ်း ၼႆယဝ်ႉ။

ၶၢဝ်းႁိုဝ်ႉၶၢဝ်းၾူၼ်ၼႆႉ ၼမ်ႉႁူၺ်ႈၼမ်ႉလွႆၵႆႉၼွင်းသေ ႁဵတ်းႁႂ်ႈၼမ်ႉထူမ်ႈဝၢၼ်ႈထူမ်ႈဢိူင်ႇ မိူၼ်ၼၼ်ၼင်ႇၵဝ်ႇ ယွၼ်ႉၾူၼ်တူၵ်းႁၢဝ်ႈႁႅင်းသေ ၵူၼ်းယူႇၸွမ်းပိုၼ်ႉလိၼ်တႅမ်ႇ တီႈပွၵ်ႉ 4 ၸႄႈဝဵင်းၵၢတ်ႇလေႃႉ ၸိုင်ႈတႆးပွတ်းၸၢၼ်းၼၼ်ႉၵေႃႈ ၼမ်ႉၼွင်းထူမ်ႈ ၶဝ်ႈထိုင်ၼႂ်းႁိူၼ်းၼႂ်းယေး လႆႈႁူႉၼင်ႇၼႆ။