ၸဝ်ႈတူၼ်ၶူးလူင် ၻွၵ်ႊတိူဝ်ႊ ပၺ်ႇၺႃၼၼ်ႇတ ဝတ်ႉထၢတ်ႈတေႃႇလွႆလႅမ် တေယေႃးတူဝ်ၵႂႃႇမိူင်းထႆး ႁူမ်ၸူမ်း ႁပ်ႉတွၼ်ႈလုၵ်ႈၼွင်ႉပွင်ႈပၢႆၸိူဝ်းလႆႈ ႁပ်ႉၸုမ်ႈၶူး တီႈၸၼ်ႉၸွမ်မႁႃၸုလႃး ဝင်းၼွႆႉ လႄႈ တေၵႂႃႇမဵတ်ႉတႃႇ ပွၼ်ႈထမ်း ပၼ်ပႃး ပီႈၼွင်ႉႁႅင်းၵၢၼ်တႆး ၼႂ်းမိူင်းၵွၵ်ႇ ၸိုင်ႈထႆး ဝႃႈၼႆ။
ဝၼ်းတီႈ 12/05/2018 ယၢမ်းဝၢႆးဝၼ်း 1 မူင်း သင်ၶတႆး တင်း တၵ်ႉၵႃႇသတ်ႉထႃး မိူင်းၵွၵ်ႇ ႁူမ်ႈၵၼ် ႁၢင်ႈႁႅၼ်း ၸတ်းႁဵတ်းပၢင်ထွမ်ႇ ထမ်းတြႃးလႄႈ ၵၼ်ႇတေႃး ၸဝ်ႈတူၼ်ၶူးလူင် ၻွၵ်ႊတိူဝ်ႊ ပၺ်ႇၺႃႇၼၼ်ႇတ ဢၵ်ႉၵမႁႃ ပၼ်ႇတိတ ႁူဝ်ပဝ်ႈ ငဝ်ႈငုၼ်းမုၵ်ႉၸုမ်းလူင်သင်ၶ ၸိုင်ႈတႆး ၵႅမ်ႁူဝ်ပဝ်ႈသင်ၶမႁႃၼႃယၵ ၸိုင်ႈမိူင်း ဝတ်ႉ ထၢတ်ႈတေႃႇ ဝဵင်းလွႆလႅမ် ၸိုင်ႈတႆး။ ပၢင်ႁပ်ႉသိလ်ၾင်းထမ်း တေၸတ်းႁဵတ်းတီႈဝတ်ႉမႂ်ႇတႆး သႃထုပရႃ တိတ်ႇ၊ သွႆး 44/1 ယၢၼ်းၼႃးဝႃး ဝဵင်းမိူင်းၵွၵ်ႇ ၸိုင်ႈထႆး ဝႃႈၼႆ။
ၸဝ်ႈၶူးၶမ်းလႅင်း ၶေႇမိၼ်ႇတ ၽူႈတေႁပ်ႉၸုမ်ႈၶူး ၸၼ်ႉ B.A တီႈၸၼ်ႉၸွမ်မႁႃၸုလႃးလူင်းၵွၼ်း ဝင်းၼွႆႉ လၢတ်ႈဝႃႈ “ ၸဝ်ႈတူၼ်ၶူးလူင်ႁဝ်း တေယုၵ်ႉတူဝ်ယေႃးၶိင်း မႃးႁူမ်ၸူမ်းလုၵ်ႈၼွင်ႉပွင်ႈပၢႆ ႁပ်ႉၸုမ်ႈၶူး တီႈၸၼ်ႉၸွမ်မႁႃၸုလႃးလူင်းၵွၼ်းၼႆႉ ဢဝ်ၵုင်ႇမုၼ်တႄႉၶႃႈ။ ထႅင်ႈၾၢႆႇၼိုင်ႈၵေႃႈ ဢိင်ၼိူဝ်တိုဝ်ႉ တၢင်း လွင်ႈၸဝ်ႈၶူးလူင်ႁဝ်းၶႃႈ တေမႃးႁူမ်ၸူမ်းလုၵ်ႈၼွင်ႉႁပ်ႉၸုမ်ႈၶူးသေ တေမႃးမဵတ်ႉတႃႇတြႃးပၼ်ပႃး ပီႈၼွင်ႉ တၵ်ႉၵႃႇ ႁႅင်းၵၢၼ်ယၢၼ်မိူင်းပီႈၼွင်ႉတႆး ဢၼ်မီးဝႆႉတီႈၵုင်းထဵတ်ႈ မိူင်းၵွၵ်ႇၼႆႉပႃး” ဝႃႈၼႆ။
ပေႃးထိုင်ဝၼ်းတီႈ 13/05/2018 ၸဝ်ႈတူၼ်ၶူးလူင် ပၺ်ႇၺႃႇၼၼ်ႇတ တေၵႂႃႇမွၵ်ႇလၢတ်ႈၶေႃႈၵႂၢမ်း ႁူမ်ၸူမ်း လုၵ်ႈႁဵၼ်း သင်ၶတႆး တီႈၸၼ်ႉၸွမ်မႁႃၸုလႃးလူင်းၵွၼ်း ဢယုတ်ႉထယႃး ဝင်းၼွႆႉ ၸိုင်ႈထႆး ဝႃႈၼႆ။
ပေႃးထိုင်မႃး ဝၼ်းတီႈ 12-13/05/2018 ၶၢဝ်းတၢင်း 2 ဝၼ်း ယူႇတီႈၸၼ်ႉၸွမ်မႁႃၸုလႃးလူင်းၵွၼ်း ဝင်းၼွႆႉ ဢယုတ်ႉထယႃး ၸိုင်ႈထႆး တေမွပ်ႈယိုၼ်ႈၸုမ်ႈၶူး ပၼ်လုၵ်ႈႁဵၼ်း တင်းမူတ်း 3000 ပၢႆ ၼႂ်းၼၼ်ႉ ပႃးလုၵ်ႈ ႁဵၼ်းသင်ၶတႆး၊ လုၵ်ႈႁဵၼ်းတႆး ဢၼ်တေႁပ်ႉၸုမ်ႈၶူး ၸၼ်ႉ Ph.D၊ ၸၼ်ႉ M.A ၊ ၸၼ်ႉ B.A ၸဵမ်ၸိူဝ်းၼႆႉ ဝႃႈၼႆ။
