ၵဵတ်ႉလၢၼ်ႇသိုၵ်းမၢၼ်ႈ ဢၼ်တင်ႈဝႆႉ တၢင်းၶဝ်ႈဢွၵ်ႇဝဵင်းမိူင်းၽျၢၵ်ႈ မီးလွင်ႈတဵၵ်းယွၼ်းငိုၼ်း ၵူၼ်းမိူင်းမႃးလိူဝ်ႁႅင်း။

ၼႂ်းပီႊ 2023 ၼႆႉ ၵဵတ်ႉလၢၼ်ႇသိုၵ်းမၢၼ်ႈယိုတ်းမိူင်း ဢၼ်တင်ႈဝႆႉ တၢင်းၶဝ်ႈဢွၵ်ႇဝဵင်းမိူင်းၽျၢၵ်ႈ ၸိုင်ႈတႆးပွတ်းဢွၵ်ႇၼႆႉ မီးလွင်ႈ ၵဵပ်းၶွၼ်ႇရူတ်ႉၵႃး တီႈၵူၼ်းမိူင်းလိူဝ်ႁႅင်းလႄႈ ႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇၵိၼ်းၸႂ်။

ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၵဵတ်ႉလၢၼ်ႇၸိူဝ်းၼႆႉ ၵဵပ်းၶွၼ်ႇ ၵႃးဢၼ်တေႃႉတၢင်ႇ ဝူဝ်းၵႂၢႆး ဢၼ်ၵႂႃႇၵႃႉၶၢႆၸွမ်းလႅၼ်လိၼ် ယဝ်ႉၵေႃႈ ၵႃးတၢင်ႇမႆႉ ဢၼ်သူင်ႇပၼ်ၶႄႇၸိူဝ်းၼႆႉၵႃႈၵဵပ်းႁၢဝ်ႈႁႅင်း လိူဝ်ၼၼ်ႉ ၵႃးၵူၼ်းမိူင်းၽၵ်းၵႃႇ ဢၼ်ႁဵတ်းၵိၼ်ၵၢၼ်ယူဝ်းယူဝ်းၸိူဝ်းၼႆႉၵေႃႈ ၶဝ်ၵဵပ်းမႃးလူၼ်ႉလူၼ်ႉလိူဝ်လိူဝ်လႄႈ ပဵၼ်ဢၼ်ယၢပ်ႇယၢၵ်ႈ ၵိၼ်းၸႂ်တေႉယဝ်ႉ  ” – ဝႃႈၼႆ။

ဝၢႆးသိုၵ်းမၢၼ်ႈယိုတ်းမိူင်းမႃးၼႆႉ ႁွင်ႈၵၢၼ်လၢႆၸုမ်း ဢၼ်ယူႇတႂ်ႈသိုၵ်းမၢၼ်ႈ ပႂ်ႉဝႆႉၸွမ်းၵဵတ်ႉလၢၼ်ႇ တဵၵ်းယွၼ်း ငိုၼ်း ၵူၼ်းမိူင်း မႃး ဢမ်ႇထၢတ်ႇဢမ်ႇဝၢႆး ပေႃးၵဵပ်းလႆႈငိုၼ်းမႃးသမ်ႉ မီးလွင်ႈၸႅၵ်ႇၵၼ်ၵိၼ်ပႅတ်ႈလၢႆလၢႆ ဢမ်ႇမီးလွင်ႈမႃးၵမ်ႉထႅမ်ပၼ် ၵူၼ်းမိူင်းၶိုၼ်း ဝႃႈၼႆ ။

ဢိင်ၼိူဝ်လွင်ႈၼႆႉ ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ တီႈၵဵတ်ႉၼႆႉ မီးလၢႆၸုမ်းပႂ်ႉဝႆႉ။ ၸုမ်းဢၼ်ယူႇၾၢႆႇတႂ်ႈ ၸၵၶ ( 18 ) ၵဵင်းတုင် ပုတ်ႈၵၼ်ယူႇသဝ်းဝႆႉ  ။ မိူၼ်ၼင်ႇ ပလိၵ်ႈ ၊ လဝၵ  ၸိူဝ်းၼႆႉၵေႃႈပႃး  ။ ဢၼ် ႁၼ်တႄႉ မီးဝႆႉ ၽူႈၵွၼ်းပလိၵ်ႈ(ရဲအုပ်)   2 ၵေႃႉ ။ ယဝ်ႉၵေႃႈ လုၵ်ႈၸုမ်းပလိၵ်ႈ 5 ၵေႃႉ ။ သမ်ႉမီးထႅင်ႈ လုင်းတၢၼ်းထုၼ်း ဢၼ်ပဵၼ်ၽူႈမီးၸၼ်ႉၼႂ်းလဝၵၼၼ်ႉၵေႃႉၼိုင်ႈဢေႃႈ ဢၼ်ပႂ်ႉတီႈၼၼ်” – ဝႃႈၼႆ။

ႁွင်ႈၵၢၼ် လၢႆလၢႆၸုမ်း ဢၼ်ပႂ်ႉၵဵတ်ႉလၢၼ်ႇၶဝ်ႈဝဵင်းမိူင်းၽျၢၵ်ႈၼႆႉ ၶဝ်ပုတ်ႈၵၼ်ပႂ်ႉ ပွတ်းၼႂ်ၸုမ်းၼိုင်ႈ ပွတ်းဝၼ်းၸုမ်းၼိုင်ႈသေ ပေႃးၵဵပ်းလႆႈငိုၼ်းမႃးၵေႃႈ ၸႅၵ်ႇဝႆႉပဵၼ်လၢႆလၢႆပုၼ်ႈ။ႁူဝ်ႁၢၼ် ၶိၼ်ႇမွင်ႇထုၼ်း ဢၼ်ပဵၼ်လုၵ်ႈၼွင်ႉၽူႈၵွၼ်းၸႄႈဝဵင်း ၊ လႄႈဢိၵ်ႇပႃးတင်း ၵႅမ်ၶုၼ်ႁၢၼ်ပလိၵ်ႈ ၵေႃႉၼိုင်ႈၼၼ်ႉ လႆႈၼိုင်ႈပုၼ်ႈ ယဝ်ႉၵေႃႈ ပလိၵ်ႈဢၼ်ပႂ်ႉၸွမ်းၵဵတ်ႉၸိူဝ်းၼၼ်ႉၵေႃႈ ၽႄပၼ်ၵၼ်ဢဝ်ထႅင်ႈ ၼႆ ၵူၼ်းပိုၼ်ႉတီႈသိုပ်ႇလၢၼ်ႈၼင်ႇၼႆ။

သိုၵ်းမၢၼ်ႈလႄႈပလိၵ်ႈၸိူဝ်းၼႆႉ ၼႄၶေႃႈဢၢင်ႈလၢႆဢၼ်သေ လွၵ်ႇငိုတ်ႈၵဵပ်းငိုၼ်းၵူၼ်းမိူင်းၸိူဝ်း လတ်းၵႂႃႇမႃး ၵူႈဝၼ်း လႄႈ ၵူၼ်းမိူင်းဢွၼ်ၵၼ် ၶၢင်းပွင်ႉယွၼ်ႉဢမ်ႇမီးလွင်ႈႁူမ်ႇလူမ်ႈၼႆယဝ်ႉ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈထႅင်ႈဝႃႈ – “ ၼႂ်းလိူၼ်ၼႆႉၵူၺ်းၼင်ႇၵဝ်ႇ ၵူၼ်းၼုမ်ႇၵဵင်းတုင်သွင်ၵေႃႉ ႁေႃႈၵႃးမႃး ၺႃးသိုၵ်းပႂ်ႉၵဵတ်ႉၸိူဝ်းၼႆႉၵူတ်ႇထတ်းႁၢဝ်ႈႁႅင်းသေ မၢပ်ႇၼႄးဝႃႈ ဢမ်ႇပႃးမၢတ်ႈပုင်ႇတိၼ်ႇၼႆလႄႈ ႁေႉႁၢမ်ႈဝႆႉ ဢမ်ႇပၼ်သိုပ်ႇၶၢဝ်းတၢင်းထႅင်ႈ။ ယွၼ်ႉၼၼ် ၵူၼ်းၼုမ်ႇသွင်ၵေႃႉၵူဝ်ႁႄသေ ယွၼ်းၵႃႈႁိုဝ်ၵေႃႈလႆႈပၼ်။ ယဝ်ႉၵေႃႈ ၵႃးဢမ်ႇမီးလၢႆႊသိၼ်ႊၸိူဝ်းၼႆႉၵေႃႈ ၼိုင်ႈၶွၵ်ႉလႂ် ၶဝ်ၵဵပ်း 1 သႅၼ် ။ ပေႃး ပဵၼ်ၵႃးတၢင်ႇမႆႉ တၢင်ႇၼၵ်းမွၵ်ႈ 2 တၢၼ်ႊ ၼႆၸိုင် လႆႈပၼ် 2 သႅၼ် ။ငိုၼ်းၸိူဝ်းလႆႈမႃးတင်းသဵင်ႈၵေႃႈ ၶဝ်ၼင်ႇၵၼ် ၽႄၵၼ်ဢဝ်မူတ်းၼၼ်ႉယဝ်ႉ” – ဝႃႈၼႆ။

 လွင်ႈၼႆႉ ယူႇတီႈၽူႈတွႆႇႁွၵ်ႈ ၶတ်းၸႂ်တိတ်းတေႃႇတူၺ်းၸူး တၢင်းၾၢႆႇႁူင်းပလိၵ်ႈယူႇၵေႃႈတိတ်းတေႃႇဢမ်ႇလႆႈ။