ႁူင်းပွႆႇသဵင် FM 99 MHz ၸတ်းႁဵတ်းပၢင်သွၼ် ၽိူမ်ႉထႅမ်ၼမ်ႉၵတ်ႉ ပၼ်ၵူၼ်းၼုမ်ႇ သႅၼ်းႁုၼ်ႈမႂ်ႇလႄႈ ႁႂ်ႈပဵၼ်မႃးၽူႈၸတ်းလၢႆးၵၢၼ် ပိုၼ်ၽၢဝ်ႇၶၢဝ်ႇငၢဝ်း ဢၼ်ထုၵ်ႇမႅၼ်ႈၸိုဝ်ႈၸႂ်ႈ။

ဝၼ်းတီႈ 28 – 29 /04/2018 ႁူင်းပွႆႇသဵင် FM 99 MHz ၸတ်းႁဵတ်းပၢင်သွၼ် ၽိူမ်ႉထႅမ်ၼမ်ႉၵတ်ႉၽူႈၸတ်းလၢႆးၵၢၼ် တီႈႁူင်းႁႅမ်း Holiday Garden ၵဵင်းမႆႇ ၸိုင်ႈထႆး မီးၽူႈၸတ်းလၢႆးၵၢၼ်လႄႈ ၵူၼ်းၼုမ်ႇၶဝ်ႈႁူမ်ႈလဵပ်ႈ ႁဵၼ်းဢဝ် 30 ပၢႆ။

ၸၢႆးသႅင်မိူင်း မင်းၵွၼ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ၵၢပ်ႈပၢၼ်ဝၢၼ်ႈမိူင်းမိူဝ်ႈလဵဝ်ၼႆႉ တႃႇပိုၼ်ၽၢဝ်ႇသိုဝ်ႇၼၼ်ႉမၼ်းငၢႆႈၼႃႇ ၵူၺ်းၵႃႈၼင်ႇႁိုဝ်တေပိုၼ်ၽၢဝ်ႇႁႂ်ႈထုၵ်ႇမႅၼ်ႈၸိုဝ်ႈၸႂ်ႈ ၶိုတ်းၵၢပ်ႈပၢၼ်ၼႆ လမ်ႇလွင်ႈတႄႉတႄႉ ၵွပ်ႈၼၼ်ႁဝ်းၶႃႈၸင်ႇၸတ်းႁဵတ်းပၢင်သွၼ်ၼႆႉ” ဝႃႈၼႆ။

ၼႂ်းပၢင်ၼႆႉ ပူင်သွၼ်ပၼ် လၢႆးႁၢင်ႈႁႅၼ်းတႃႇၸတ်းလၢႆးၵၢၼ်၊ ပိူင်ၵၢၼ်ၸတ်းလၢႆးၵၢၼ်၊ လွၵ်းလၢႆးၸတ်းလၢႆး ၵၢၼ်၊ လၢႆးတတ်းတေႃႇသဵင်ၸိူဝ်းၼႆႉ ၽူႈပူင်သွၼ်ပဵၼ် ၸၢႆးသႅင်မိူင်း မင်းၵွၼ်း ၽူႈၵွၼ်းႁူင်းပွႆႇသဵင် FM99၊   ၼၢင်းၶမ်းဢိင်ႇ ၸုမ်းတႆး TV ၊ ၸၢႆးပီး ၸဝ်ႈၼႃႈတီႈၾၢႆႇ Tachnical ၸုမ်း MAP ၸိူဝ်းၼႆႉ။

ယိင်းၵွၼ်တႆး ၽူႈၶိုၼ်ႈပၢင်သွၼ် လၢတ်ႈဝႃႈ – “ ဢၼ်လႆႈမႃးၶိုၼ်ႈၼႆႉၵေႃႈ ပဵၼ်ဢၼ်ယိၼ်းၸူမ်းသိူဝ်းတႄႉ လႆႈတၢင်းႁူႉၼမ်တႄႉၶႃႈဢေႃႈ ၵၢၼ်ပိုၼ်ၽၢဝ်ႇၶေႃႈမုလ်း ၸတ်းလၢႆးၵၢၼ်ၼႆႉ မၼ်းဢမ်ႇၸႂ်ႈလွင်ႈငၢႆႈ ပေႃးၽိတ်းၵႂႃႇယဝ်ႉဢဝ်ၶိုၼ်းဢမ်ႇလႆႈ ဢၼ်လႆႈမႃးႁဵၼ်းမိူဝ်ႈၼႆႉၵေႃႈ တေၸၢင်ႈဢဝ်ၵႂႃႇၸႂ်ႉမိူဝ်းၼႃႈလႆႈၼမ်တႄႉၶႃႈဢေႃႈ” ဝႃႈၼႆ။

ႁူင်းပွႆႇသဵင် MAP Radio FM 99.0 MHz ၼႆႉ ၵေႃႇတင်ႈမႃး မိူဝ်ႈဝၼ်းတီႈ 23 လိူၼ် ၾႅပ်ႊၿိဝ်ႊရီႊ 2004 ။ မိူဝ်ႈ ၼၼ်ႉ မီးၽူႈၸတ်းလၢႆးၵၢၼ် မိူၼ်ၼင်ႇ ၸၢႆးသႅင်မိူင်း ၊ ၸၢႆးတုမ်ႇမွၵ်ႇႁၢၼ် ၊ ၼၢင်းၶမ်းဢိင်ႇ လႆႈၵႂႃႇႁူမ်ႈၸတ်းတီႈ ႁူင်းပွႆႇသဵင် FM 99.0 MHz ဢၼ် ဢႃးၸၢၼ်ဢူႊထႆႊဝၼ်ႊ ပဵၼ်ၸဝ်ႈၶွင်ဝႆႉ ။

ထိုင်မႃး ပီ 2007 လႆႈသိုဝ်ႉဢဝ် ႁူင်းပွႆႇသဵင်သေ ပဵၼ်မႃး ႁူင်းပွႆႇသဵင် MAP Radio မႃး တေႃႇထိုင်ယၢမ်းလဵဝ် ။   ႁူင်းပွႆႇသဵင်ၼႆႉ ႁပ်ႉထွမ်ႇလႆႈၼႂ်းတၢင်းၵႆ 30 ၵီႊလူဝ်ႊ ပၼ်ႇမူၼ်း ။ ပိုၼ်ၽၢဝ်ႇလၢၵ်ႇလၢႆၽႃသႃၸၢဝ်းၶိူဝ်း မိူၼ်ၼင်ႇထႆး၊ တႆး၊ မၢၼ်ႈၸဵမ်ၸိူဝ်း ပိုတ်ႇပွႆႇသဵင်ပၼ် ၵူႈဝၼ်း ၶၢဝ်းယၢမ်း ၵၢင်ၼႂ် 07:00 – 20:00 မူင်း။ တႃႇႁႂ်ႈမီးၵူၼ်းၼုမ်ႇသႅၼ်းႁုၼ်ႈမႂ်ႇ ၾိုၵ်းသွၼ်ပၼ် ၵူၼ်းၼုမ်ႇမႃး ၵူႈပီပီၼႆယဝ်ႉ ။