Thursday, June 20, 2024

သိုၵ်းမၢၼ်ႈ ထႅမ်ႁႅင်းသိုၵ်းၵူႈၾၢႆႇလႄႈ သိုၵ်း SSPP ႁၢမ်ႈၵူၼ်းမိူင်း ဢွၵ်ႇၼွၵ်ႈႁိူၼ်း ယၢမ်းၵၢင်ၶမ်ႈၵၢင်ၶိုၼ်း

Must read

ငဝ်းလၢႆးသိုၵ်းတင်းသွင်ၾၢႆႇၶဵင်ႈၶႅင်ထႅမ်ႁႅင်းသိုၵ်းတေႃႇၵၼ်ဝႆႉလႄႈ တီႈတၢင်းၸႄႈဝဵင်းမိူၵ်းၵိုင် သိုၵ်းမၢၼ်ႈတင်းသိုၵ်း SSPP/SSA ႁၢမ်ႈ ၵူၼ်းမိူင်း ၸႄႈဝဵင်းမိူင်းၵိုင် ဢွၵ်ႇၼွၵ်ႈႁိူၼ်းယေး ယၢမ်းၵၢင်ၶမ်ႈၵၢင်ၶိုၼ်း။

ဝဵင်းမိူင်းၵိုင်
Photo by – ၵူၼ်းပိုၼ်ႉတီႈ/ ဝဵင်းမိူင်းၵိုင်

ၵူၼ်းမိူင်းထုၵ်ႇႁၢမ်ႈၸဵမ်မိူဝ်ႈႁူဝ်လိူၼ်ဢေႃႊၵတ်ႉသ်ၼႆႉမႃး ယၢမ်းလဵဝ်ၵေႃႈမီးၶၢဝ်းတၢင်း ၽၢၵ်ႇလိူၼ်ယဝ်ႉလႄႈ ယၢပ်ႇၽိုတ်ႇတႃႇၵူၼ်းႁႃၸဝ်ႉၵိၼ်ၶမ်ႈ ဢမ်ႇၸၢင်ႈၵႂႃႇမႃးႁႃၵိၼ်လဵင်ႉတွင်ႉလွတ်ႈလႅဝ်း ဝႃႈၼႆ။

- Subscription -

ၵူၼ်းၼႂ်းပိုၼ်ႉတီႈမိူင်းၵိုင်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈယဝ်ႉ ၵွပ်ႈၶဝ်မီးလွင်ႈ ၶဵင်ႈၶႅင်ၵၼ် လၢႆပႃႈလၢႆၾၢႆႇၼၼ်ႉၼႃႇၼေႃႈ ။ တၢင်းလၢႆးၶႃႈၼႆႉၵေႃႈ သိုၵ်းမၢၼ်ႈၶဝ် ထႅမ်ႁႅင်းသိုၵ်း ၊ၾၢႆႇတၢင်းသီႇပေႃႉပုၼ်ႉၵေႃႈ ငိၼ်းဝႃႈ သိုၵ်းမၢၼ်ႈၶဝ် ထႅမ်ႁႅင်းသိုၵ်းၼႆလႄႈ SSPP ၸင်ႇႁၢမ်ႈဢွၵ်ႇႁိူၼ်း ၼႂ်းငဝ်းလၢႆးၶိုၵ်ႉၶၵ်ႉမႃးၸိူင်ႉၼႆ။ ၶဝ်ႁႄႉႁၢမ်ႈၸိူင်ႉၼႆ မီးလွင်ႈယၢပ်ႇၽိုတ်ႇလၢႆမဵဝ်းယူႇဢေႃႈ။မၼ်းဢမ်ႇမီးလွင်ႈႁူမ်ႇလူမ်ႈ လွတ်ႈၽေး မိူဝ်ႈႁဝ်းဢွၵ်ႇတႃႈဢွၵ်ႇတၢင်းၼၼ်ႉၶႃႈၼႃႇၼေႃႈ။မိူၼ်ၼင်ႇ ၵူၼ်းႁႃၸဝ်ႉၵိၼ်ၶမ်ႈ ၶဝ်ၸိူဝ်းၼႆႉၵေႃႈ ပဵၼ်ဢၼ်ယၢပ်ႇဝႆႉတေႉဢေႃႈ” – ဝႃႈၼႆ။

လွင်ႈၼႆႉ ၾၢႆႇ SSPP/SSA တႄႉ ပိုၼ်ၽၢဝ်ႇပဵၼ်တၢင်းၵၢၼ် သေဢမ်ႇၵႃး ႁူပ်ႉထူပ်းၵူၼ်းမိူင်းသေ ဢုပ်ႇလၢတ်ႈဝႆႉ ၵူဝ်ၵူၼ်းမိူင်းတူၵ်းပဵၼ်ယိူဝ်ႇသိုၵ်းသိူဝ် ဝႃႈၼႆ။

ဢိင်ၼိူဝ်လွင်ႈၼႆႉ ၵူၼ်း မိူင်းၵိုင်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “  SSPP ၼႆႉ ၶဝ်တိုၼ်းႁၢမ်ႈမႃး ၸဵမ်မိူဝ်ႈၶဝ်မႃးယူႇတီႈၼႆယဝ်ႉလူး ။ ၶဝ်တိုၼ်းဝႃႈ ႁၢမ်ႈဢွၵ်ႇ ၵၢင်ၶမ်ႈၵၢင်ၶိုၼ်း ဢမ်ႇပၼ်လႄႇ ၶၢဝ်းၵၢင်ၶိုၼ်းၸိူဝ်းၼႆႉ ။ ပေႃးဢွၵ်ႇၵေႃႈ တိုၼ်းဝႃႈ ထူပ်းၽေးတေႉၼၼ်ႉၼႃႇၼေႃ။ ႁၼ်လၢႆၵေႃႉတေႉၼင်ႇၵဝ်ႇ။ ၵူၺ်းၼႃႇ ဢၼ်ႁၢမ်ႈမိူဝ်ႈလဵဝ်ၼႆႉတေႉ တေပဵၼ်သိုၵ်းမၢၼ်ႈၵႂႃႈ ၸင်ႇဢွၼ်ၵၼ်ဝႃႈ သိုၵ်းမၢၼ်ႈၵေႃႈႁၢမ်ႈ သိုၵ်းတႆးၵေႃႈႁၢမ်ႈဢၼ်ဝႃႈၼႆႉ” – ဝႃႈၼႆ။

ၾၢႆႇသိုၵ်းမၢၼ်ႈယိုတ်းမိူင်းၵေႃႈၶိုၼ်းမႃး ႁၢမ်ႈဝႆႉ ဢမ်ႇႁႂ်ႈဢွၵ်ႇၼွၵ်ႈႁိူၼ်းယေး ၶၢဝ်းယၢမ်း  8 မူင်း ၵၢင်ၶမ်ႈ တေႃႇထိုင် ၵၢင်ၼႂ် 6 မူင်း ဝႃႈၼႆဝႆႉ။

တႄႇဢဝ် ဝၼ်းတီႈ 6/8/2023 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် သိုၵ်းမၢၼ်ႈ ယိုတ်းမိူင်း ထႅမ်ႁႅင်းသိုၵ်း မုင်ႈၸူး ဝဵင်း လၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း မႃးထႅင်ႈၼမ် တေလုၵ်ႉတၢင်းၼမ်ႉၸၢင် – လွႆလႅမ် – ပၢင်လူင် ၸိူဝ်းၼႆႉမႃး။

တၢင်းၸႄႈဝဵင်းလၢႆးၶႃႈၵေႃႈသိုၵ်းမၢၼ်ႈလႄႈ SSPP ပိုတ်းယိုဝ်းတိုၵ်းတေႃးၵၼ် ၶဵင်ႈၶႅင်ၵၢၼ်သိုၵ်းတေႃႇၵၼ်တေႃႇထိုင်ဝၼ်းမိူဝ်ႈၼႆႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း