ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး SHRF ၸီႉၸမ်ႈဝႃႈ သိုၵ်းမၢၼ်ႈ ၵၼ်ႉၸၼ် ၼၢင်းယိင်း မႄႈၸဝ်ႈႁိူၼ်းလႄႈမႄႈမၢၼ်း တီႈဝဵင်းၵူတ်ႉၶၢႆၼၼ်ႉ ႁႂ်ႈသိုၵ်းမၢၼ်ႈဢဝ်ပုၼ်ႈၽွၼ်း တီႉၺွပ်း ပၼ်တူတ်ႈတၢမ်ႇၵူၼ်းသိုၵ်းၶဝ် ႁႂ်ႈထိုင်တီႈထိုင်လႅၼ်။

ဝၼ်းတီႈ 8/8/2023 ယူႇတီႈၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF ဢွၵ်ႇၽိုၼ်တၢမ်းငဝ်းလၢႆး ၼႂ်းၼၼ်ႉ ပႃးဝႆႉဝႃႈ သိုၵ်းမၢၼ်ႈ ၶဝ်ႈ ၵၼ်ႉၸၼ် လူလၢႆၼၢင်းယိင်း 2 ၵေႃႉ ထိုင်ၼႂ်းႁိူၼ်းၼႂ်းယေးတေႃႇၼႃႈလုၵ်ႈလၢင်းလႄႈၸဝ်ႈၽူဝ်၊ တီႈဝၢၼ်ႈသူၼ်လူင် ဢိူင်ႇဢူႇယႃႇပုၼ်ႉ ဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇ။

“သိုၵ်းမၢၼ်ႈ ယိုတ်းမိူင်းၼႆႉ ပၢႆလွၵ်ႇငိုတ်ႈ ၽူႈယႂ်ႇၵူၼ်းလူင်ၼႂ်းဝၢၼ်ႈပႃး ထႅင်ႈဝႃႈ ပေႃးသူပၼ်ၶၢဝ်ႇလွင်ႈၵၼ်ႉၸၼ်ၼႆႉဢွၵ်ႇ တၢင်းသိုဝ်ႇၶၢဝ်ႇၸိုင် တေဢဝ်မၢၵ်ႇလူင် ယိုဝ်းဝၢၼ်ႈသူၵွႆ ” သိုၵ်းမၢၼ်ႈယင်းပၢႆလၢတ်ႈတီႈၵူၼ်းႁိူၼ်းၼၢင်းယိင်းတင်း 2 ၵေႃႉၼၼ်ႉၸိူင်ႉၼႆလူးၵွၼ်ႇဝႃႈၼႆ။

ၸၢႆးႁေႃသႅင် ၽူႈၶၢၼ်ပၢၵ်ႇ ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈၵၼ်ႉၸၼ်ၵူၼ်းမိူင်းၼႆႉ မိူၼ်ၶဝ်တင်ႈၸႂ် ပွႆႇၵူၼ်းၶဝ်ဝႆႉမိူၼ် မႃဢိုပ်းယိူဝ်ႇၼၼ်ႉယဝ်ႉ။ ႁႂ်ႈသွၵ်ႈႁႃၵိၼ်ၵၢင်ၶမ်ႈ ၵၢင်ၶိုၼ်းၼၼ်ႉယဝ်ႉ လွင်ႈၼႆႉ ၶဝ် တိုၼ်းတေလႆႈ ႁပ်ႉဢဝ်ပုၼ်ႈၽွၼ်း သၢႆႈတႅၼ်း လွင်ႈလူႉသုမ်းၵူၼ်းဝၢၼ်ႈလႄႈ ပၼ်တၢမ်ႇသိုၵ်းၶဝ် ၸိူဝ်းဢၼ်ပူၼ်ႉပႅၼ်ႁဵတ်းၽိတ်းၼၼ်ႉ ႁႂ်ႈပေႃးထိုင်တီႈထိုင်လႅၼ်”- ဝႃႈၼႆ။

ၼႂ်းၽိုၼ်တၢမ်းငဝ်းလၢႆး SHRF ဢွၵ်ႇဝႆႉဝႃႈ – မိူဝ်ႈဝၼ်းတီႈ 30/7/2023 ၼၼ်ႉ သၢႆသိုၵ်း သိုၵ်းမၢၼ်ႈတပ်ႉၶမယ 569 ၶဝ်ႈ ၵႂႃႇၼႂ်းဝၢၼ်ႈသူၼ်လူင် ဢိူင်ႇဢူႇယႃႇပုၼ်ႇ ၵွင်းလိၼ် ၸႄႈဝဵင်းၵူတ်ႉၶၢႆသေ ပၵ်းပၢင်သဝ်း ၼႂ်းသူၼ်ဢွႆႈႁိမ်းဝၢၼ်ႈလႄႈ ၼႂ်း ဝတ်ႉ/ ၵျွင်း။ ဝၢၼ်ႈသူၼ်လူင်ၼႆႉ တင်ႈယူႇႁိမ်းၶၢင်ႈတၢင်း သဵၼ်ႈတၢင်းလူင် မူႇၸႄႈ – ဝဵင်းလိူဝ်ႇ။

ၶမ်ႈၼၼ်ႉ ၶၢဝ်းယၢမ်းမွၵ်ႈ 10 မူင်းၵၢင်ၶိုၼ်း သိုၵ်းမၢၼ်ႈ 4 ၵေႃႉ ၶဝ်ႈၵႂႃႇၼႂ်းဝၢၼ်ႈသူၼ်လူင်သေၽႄၵၼ် ပဵၼ်သွင်ၸုမ်း ၼိုင်ႈၸုမ်း သွင်ၵေႃႉ။ သိုၵ်းမၢၼ်ႈၸုမ်းၼိုင်ႈ ၶဝ်ႈၵႂႃႇၼႂ်းႁိူၼ်းၵူၼ်းဝၢၼ်ႈလင်ၼိုင်ႈ ႁိူၼ်းဢၢႆႈၸၢႆး (ၸိုဝ်ႈပွမ်) မေးမၼ်း ၸၢႆး ၼၢင်းလၢဝ် (ၸိုဝ်ႈပွမ်)။ သိုၵ်းမၢၼ်ႈဢဝ်ၵွင်ႈငႃဢၢႆႈၸၢႆးသေ ဢဝ်သေႃး မိုဝ်းထႅပ်းမိုဝ်းမၼ်း ပႄလင်ယဝ်ႉ ဢဝ်ၵႂႃႇၸူး ၼၢင်းလၢဝ်။

ဝၢႆးၼၼ်ႉ သိုၵ်းမၢၼ်ႈၼၼ်ႉ လုပ်ႈလုပ်ႈၵမ်းၵမ်း ၸွမ်းၼႃႈဢူၵ်းၼၢင်းလၢဝ်သေၵၼ်ႉၸၼ် မၼ်းၼၢင်း။ ၽူဝ်မၼ်း ၼၢင်း ၵေႃႈ တင်းႁႆႈႁႆႈႁွင်ႉႁွင်ႉသေ တုၵ်းယွၼ်းသိုၵ်းမၢၼ်ႈႁႂ်ႈၵိုတ်း။ ၵွပ်ႈသဵင်ႁႆႈမၼ်းၸၢႆးႁႅင်းလႄႈ ၵူၼ်းႁိမ်းႁွမ်း ႁိူၼ်းၶဝ် တိုၼ်ႇသေမႃးတူၺ်း။ ဝၢႆးၼၼ်ႉ သိုၵ်းမၢၼ်ႈပေႃႉထုပ်ႉ ဢၢႆႈၸၢႆး၊ ၵႄႈပၼ်သေႃးမိုဝ်းသေ ဢွၵ်ႇႁိူၼ်းၵႂႃႇ ။ ၼၢင်းလၢဝ်ၼႆႉ ဢႃယုတိုၵ်ႉမီး 20 ပီတိုၵ်ႉပႃးတွင်ႉ လႆႈ 3 လိူၼ်။

ၼႂ်းၶၢဝ်းယၢမ်းလဵဝ်ၵၼ် သိုၵ်းမၢၼ်ႈထႅင်ႈၸုမ်းၼိုင်ႈ ၶဝ်ႈၵႂႃႇၼႂ်းႁိူၼ်းၸၢႆးမွင်ႇ (ၸိုဝ်ႈပွမ်) လႄႈမေးမၼ်း ၼၢင်းထူၺ်း ( ၸိုဝ်ႈပွမ်) ဢၼ်မီးႁိမ်းႁၢင်ဝၢၼ်ႈသူၼ်လူင်။ ၶဝ်ဢဝ်ၵွင်ႈငႃ ၸၢႆးမွင်ႇလႄႈ လုၵ်ႈၶဝ်ထႅင်ႈသွင်ၵေႃႉသေ လၢတ်ႈၸၢႆးမွင်ႇဝႃႈ “ပေႃးဢမ်ႇၶႂ်ႈႁႂ်ႈလုၵ်ႈဢွၼ်ႇတၢႆၵေႃႈဢဝ်လုၵ်ႈဢွၼ်ႇမႂ်းသေဢွၵ်ႇႁိူၼ်းၵႂႃႇ၊ ပေႃးမႂ်းမွၵ်ႇလၢတ်ႈၵူၼ်းတၢင်ႇႁိူၼ်း ႁဝ်းတေ ဢဝ်ၾႆးၸုတ်ႇၽဝ်ႁိူၼ်းမႂ်း” ၼႆ။ ၸၢႆးမွင်ႇၵေႃႈ ၵႃႈလႆႈဢဝ် လုၵ်ႈမၼ်းသွင်ၵေႃႉသေ ဢွၵ်ႇႁိူၼ်း ၵႂႃႇ။ ဝၢႆးၼၼ်ႉ သိုၵ်းမၢၼ်ႈ သွင်ၵေႃႉၼၼ်ႉ ဢဝ်ၵွင်ႈငႃၼၢင်းထူၺ်းသေ ၵၼ်ႉၸၼ် မၼ်းၼၢင်းၵေႃႉၼိုင်ႈယဝ်ႉ ၵေႃႉၼိုင်ႈ တေႃႇၶဝ်ပေႃးယဝ်ႉသေ ဢွၵ်ႇ ဝၢၼ်ႈၵႂႃႇ။

ၵၢင်ၼႂ်မိူင်းလႅင်းမႃး ၵူၼ်းဝၢၼ်ႈဢွၼ်ၵၼ် ဢဝ်လွင်ႈၼႆႉၵႂႃႇတၢင်ႇၼႄၸဝ်ႈသြႃႇ ၸဝ်ႈၵွၼ်းဝတ်ႉ/ၵျွင်းသေ ၸဝ်ႈသြႃႇ ႁွင်ႉ ဢဝ်ႁူဝ်ၼႃႈသၢႆသိုၵ်းမၢၼ်ႈၼၼ်ႉမႃးတီႈဝတ်ႉ။ ႁူဝ်ၼႃႈသၢႆသိုၵ်းမၢၼ်ႈၼၼ်ႉ ၵေႃႈႁွင်ႉဢဝ်ၼၢင်းထူၺ်းလႄႈ ၼၢင်းလၢဝ် မႃး သေ ႁႂ်ႈၶဝ်ၸီႉၼႄဝႃႈ ပဵၼ်သိုၵ်းၵေႃႉလႂ်ဢၼ် ၵၼ်ႉၸၼ်ၶဝ်။ သိုၵ်းမၢၼ်ႈၸိူဝ်းၵၼ်ႉၸၼ် ၼၼ်ႉ ထုၵ်ႇပေႃႉထုပ်ႉပႃႈၼႃႈ ၵူၼ်းတင်းၼမ် တီႈၼႂ်းဝတ်ႉၼၼ်ႉ။ ဝၢႆးၼၼ်ႉ သိုၵ်းမၢၼ်ႈၶဝ်လွၵ်ႇငိုတ်ႈ ၽူႈယႂ်ႇ ၵူၼ်းလူင်ၼႂ်းဝၢၼ်ႈဝႃႈ ပေႃးသူပၼ်ၶၢဝ်ႇ လွင်ႈၵၼ်ႉၸၼ်ၼႆႉ ဢွၵ်ႇတၢင်းသိုဝ်ႇၶၢဝ်ႇ တေဢဝ်မၢၵ်ႇလူင်ယိုဝ်းဝၢၼ်ႈသူၵွႆ ၼႆထႅင်ႈလူးၵွၼ်ႇ။

လိူဝ်ၼၼ်ႉ သိုၵ်းမၢၼ်ႈ ၸႂ်ႉၶိူင်ႈမိၼ်ပွႆႇမၢၵ်ႇလူင်ၵႂႃႇ ၵႃႈဝႃႈၵႃႈပဵၼ်လႄႈ ပူၼ်ႉပႅၼ်ႁဵတ်းၽိတ်း – ပႃးၸဵမ် လွင်ႈၶႃႈႁႅမ်တၢႆ ၵူၼ်းမိူင်း ႁၢမ်းပၵ်းႁၢမ်းပိူင်သေ ႁူမ်ႈၵၼ်ၵၼ်ႉၸၼ်ၼၢင်းယိင်း ၽွင်းပိုတ်ႇၼႃႈသိုၵ်း တိုၵ်းၸုမ်းသိုၵ်းၶၢင် KIA တင်း သိုၵ်း တဢၢင်း TNLA ၼႂ်းၸႄႈဝဵင်းၵူတ်ႉၶၢႆတင်း ၸႄႈဝဵင်းမူႇၸႄႈၼႆႉ တင်ႈတႄႇလိူၼ်ၵျူႊလၢႆႊ ဝူင်ႈလိုၼ်းသုတ်းထိုင်ၼႂ်းၸဝ်ႉ လိူၼ်ဢေႃႊၵတ်ႊသ် 2023 ၼႆႉ ႁဵတ်းႁႂ်ႈၵူၼ်းမိူင်း 5 ၵေႃႉ လူႉတၢႆ မၢတ်ႇၸဵပ်း 9 ၵေႃႉ။

ယဝ်ႉၵေႃႈ လွင်ႈသိုၵ်းမၢၼ်ႈ ႁႃလွၵ်းလၢႆးႁူမ်ႇတူမ်းပႅတ်ႈသၢၵ်ႈသေႇ/ လၵ်းထၢၼ် တၢင်းၽိတ်းၶဝ် ဢဝ်သိူဝ်ႈၶူဝ်း သိုၵ်းလုၵ်ႉ ၽိုၼ်ႉသႂ်ႇပၼ် တီႈတူဝ်တၢႆၵူၼ်းမိူင်း ၸိူဝ်းၼၼ်ႉထႅင်ႈသေ လၢႆးႁဵတ်းၶဝ်ၼၼ်ႉ မၼ်းပဵၼ်လွင်ႈပူၼ်ႉပႅၼ်သုၼ်ႇလႆႈၵူၼ်း ႁၢဝ်ႈႁႅင်း။

ပေႃးဢဝ်သုၼ်ႇလႆႈသုၼ်ႇပဵၼ်ၵူၼ်းမိူင်းဝႃႈၸိုင် ဢၼ်သိုၵ်းမၢၼ်ႈႁဵတ်းၼႆႉ မၼ်းပူၼ်ႉပႅၼ်သုၼ်ႇလႆႈသုၼ်ႇပဵၼ် ၵူၼ်းမိူင်း ႁၢဝ်ႈႁႅင်း လၢႆးႁဵတ်းၶဝ်ၼၼ်ႉ တင်ႈၸႂ်ပေႉၵိၼ်ၵူၼ်းမိူင်းၵူၺ်း ၶဝ်ဢမ်ႇၸႂ်ႈသိုၵ်းတႃႇၵႅတ်ႇၶႄပၼ်ၵူၼ်းမိူင်း ၶဝ်ပဵၼ်သိုၵ်း ဢၼ်ပဵၼ်ၽေးၶဵၼ်တႃႇၵူၼ်းမိူင်းၵူၺ်း ၸၢႆးႁေႃသႅင် ၵဝ်ႉငဝ်ႈသုၼ်ႇလႆႈၵူၼ်းလၢတ်ႈ။