ၸၢႆးဢွၼ်လႅင်းသႂ် ၸဝ်ႈၶွင် ႁၢၼ်ႉပိုၼ်ၽႄႈၶႅပ်းၵႂၢမ်းတႆး (ONPA) ဝဵင်းလိူဝ်ႇ လူႉသဵင်ႈ ယွၼ်ႉတၢင်းပဵၼ် ၼၢဝ်ၶူတ်းလိူတ်ႈ လိူဝ် (တုပ်ကွေး) ၽွင်းဢႃယု 69 ပီ။
ပူၼ်ႉမႃး မိူဝ်ႈဝၼ်းတီႈ 16/7/2023 ယၢမ်းဝၢႆးဝၼ်း 3:00 မူင်း ၸၢႆးဢွၼ်လႅင်းသႂ် (ၶိင်းမွင်ႇၸၢႆး) ၸဝ်ႈၶွင်ႁၢၼ်ႉပိုၼ် ၽႄႈ ၶႅပ်းၵႂၢမ်းတႆး (ONPA) ဝဵင်းလိူဝ်ႇ ပဵၼ်တၢင်းပဵၼ် ၼၢဝ်ၶူတ်းလိူတ်ႈလိူဝ်သေ လႆႈလူႉသဵင်ႈၵႂႃႇ တီႈႁူင်းယႃလူင် ဝဵင်းတႃႈၵုင်ႈ ။
ၸၢႆးလႅင်းပၢင်ႇ လုၵ်ႈၼွင်ႉတပေး ၽူႈၶပ်ႉၶိုင် ပိုၼ်ၽႄႈၶႅပ်းၵႂၢမ်းတႆး ႁၢၼ်ႉ (ONPA) ဝဵင်းလိူဝ်ႇ လၢတ်ႈတီႈၽူႈတွႆႇ ႁွၵ်ႈဝႃႈ – “မၢဝ်ႇၸၢႆး လႆႈလူႉသဵင်ႈၵႂႃႇၼႆႉ ယွၼ်ႉတၢင်းပဵၼ်ၼၢဝ်ၶူတ်းလိူတ်ႈလိူဝ် (တုပ်ကွေး) ။ လႆႈၵႂႃႇလူႉသဵင်ႈ တီႈႁူင်းယႃတႃႈ ၵုင်ႈ။ မိူဝ်ႇတႄႇမၼ်း မၢဝ်ႇၸၢႆးၼႆႉ ၵႂႃႇၶဝ်ႈႁူမ်ႈပၢင်ၶႅၵ်ႇ ဢူၺ်းၵေႃႉမၼ်း တီႈတႃႈၵုင်ႈသေ ၸပ်းတၢင်းပဵၼ် (တုပ်ကွေး) ။ ၵွပ်ႈၼႆလႄႈ လႆႈၶဝ်ႈယူတ်းယႃ တီႈဝဵင်းတႃႈၵုင်ႈၼၼ်ႉသေ လႆႈလူႉၵႂႃႇတီႈႁူင်းယႃ ၼၼ်ႉၶႃႈဢေႃႈ”- ဝႃႈၼႆ။
ဝၢႆးသေ ၸၢႆးဢွၼ်လႅင်းသႂ် ဢႃယု 69 ပီ ၸဝ်ႈၶွင် ႁၢၼ်ႉပိုၼ်ၽႄႈၶႅပ်းၵႂၢမ်းတႆး (OPNA) ဝဵင်းလိူဝ်ႇ လူႉသဵင်ႈတီႈႁူင်းယႃ တႃႈၵုင်ႈၼၼ်ႉယဝ်ႉ ယူႇတီႈ လုၵ်ႈလၢင်းၼၢင်းမေး ၸိူဝ်ႉၶိူဝ်းပီႈၼွင်ႉ လႆႈႁပ်ႉဢဝ်တူဝ်တၢႆ မိူဝ်းလုမ်းလႃး လူႇတၢၼ်းပၼ်တီႈ ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။ ထိုင်မႃး ဝၼ်းတီႈ 20 ၸင်ႇပူၼ်ႉၶၢပ်ႈတူဝ် ႁွပ်ႇႁူဝ်ၶဝ်ႈႁဵဝ်ႈ။ ဝၼ်းတီႈ 23 ၸင်ႇ ႁႅၼ်းလူႇတၢၼ်းယၢတ်ႇၼမ်ႉလီငၢမ်း ။
“မၢဝ်ႇၸၢႆးၼႆႉ ပဵၼ်ၵူၼ်းၼမ်ႉၸႂ်လီ မေႃၸုင်ၸၼ်ၵူၼ်းၼုမ်ႇ ၶဝ်ႈမႃးၼႂ်းၶႂၢင်ႇပၢႆးမွၼ်းတႆး ၼမ် ။ မိူၼ်ၼင်ႇ ၸၢႆးလႅင်းပၢင်ႇ၊ ၼၢင်းဢေးလႃႉ၊ ၸၢႆးလိူၼ်ၶမ်း၊ ၼၢင်းမူဝ်မူဝ်ၶမ်းဢေး၊ ၼၢင်းဢဵင်ႈၶမ်းလႄႈ ဢိၵ်ႇထႅင်ႈ တင်းၼမ်။ ၶႅပ်းၵႂၢမ်းတႆးၵမ်ႈၼမ် ဢိတ်ႇဢွၵ်ႇတီႈ ONPA ၼႆႉသေ ပိုၼ်ၽႄႈၸွတ်ႈ တူဝ်ႈပတ်းပိုၼ်ႉမိူင်းတႆး။ ၵူႈပွၵ်ႈတႄႉ တေပိုၼ်ၽႄႈပဵၼ် (မူၼ်ႉ) ၶူၺ်ႇၵႅတ်ႉသႅတ်ႉ လုၵ်ႉတီႈ မူၼ်ႉသၢႆၶႅပ်းၼၼ်ႉသေ ပဵၼ်မႃးၶႅပ်း CD – VCD ”- ဝႃႈၼႆ။
ၸၢႆးလႅင်းပၢင်ႇသိုပ်ႇလၢတ်ႈၼႄဝႃႈ – “ယၢမ်းလဵဝ် ပဵၼ်ၵၢပ်ႈဢွၼ်ႊလၢႆႊႁိူဝ်ႈႁိူင်းယဝ်ႉလႄႈ လၢၼ်ဢတ်းၽဵင်း ONPA လႆႈၵိုတ်းယင်ႉ ပိၵ်ႉဢိုတ်းၵႂႃႇ မီးၶၢဝ်းတၢင်းမွၵ်ႈ 5 ပီယဝ်ႉ။ ”- ဝႃႈ ၼႆ။
ႁၢၼ်ႉပိုၼ်ၽႄႈၶႅပ်းၵႂၢမ်းတႆး ONPA ၼႆႉ ၵူႈပွၵ်ႈ ပိုတ်ႇႁၢၼ်ႉဝႆႉ တီႈသဵၼ်ႈတၢင်း 26 ၼႂ်းၵိဝ်ႇ(သွႆး) 81/82 တီႈဝဵင်းလိူဝ်ႇ ။
ၸၢႆးဢွၼ်လႅင်းသႂ် ၸဝ်ႈၶွင်ႁၢၼ်ႉပိုၼ်ၽႄႈ ၶႅပ်းၵႂၢမ်းတႆး (ONPA) ဝဵင်းလိူဝ်ႇၼႆႉ ပဵၼ်ၵူၼ်းၸႃတိ ဝဵင်းၼမ်ႉၶမ်း တႄႇၼႃႈႁိူၼ်း ၵိုၵ်းၸွမ်း ပႃႈၼၢင်းၶမ်းထုၼ်း ၵူၼ်းဝဵင်းၼမ်ႉၶမ်း မီးလုၵ်ႈႁူမ်ႈၵၼ် 4 ၵေႃႉ – မိူၼ်ၼင်ႇ ၼၢင်းၼုမ်ႇၶမ်း၊ ၸၢႆးမဵဝ်းထႅတ်ႉ၊ ၸၢႆးမဵဝ်းလႄႈ ၸၢႆးႁၢၼ် ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ