ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၸတ်းပၢင်ဢုပ်ႇဢူဝ်းထတ်းသၢင်ငဝ်းလၢႆးဝၢၼ်ႈမိူင်းၼႂ်း 6 လိူၼ်ပူၼ်ႉမႃးသေဢမ်ႇၵႃး မီးလွင်ႈၶိုၼ်ႈၸၼ်ႉတၼ်းႁဵင်းပၼ်ၵူၼ်းၼႂ်းၸုမ်းထႅင်ႈ။

တႄႇဢဝ်ဝၼ်းတီႈ 2 ထိုင် ဝၼ်းတီႈ 15/7/2023 ၼႆႉ  SSPP/SSA ၸတ်းပၢင်ၵုမ်ႁူဝ်ႁုပ်ႈၼႂ်းၶၢဝ်းတၢင်း 6 လိူၼ်ပူၼ်ႉမႃးၼႆႉသေထတ်းသၢင်ႈပႃးငဝ်းလၢႆးၼႂ်းမိူင်း ၼွၵ်ႈမိူင်း လိူဝ်ၼၼ်ႉ မီးလွင်ႈၶိုၼ်ႈၸၼ်ႉသိုၵ်းပၼ် ၵၼ်လၢႆၵေႃႉ လၢႆၸဝ်ႈ ၼႆယဝ်ႉ။

ၸဝ်ႈသိုၵ်းလူင် ၸၢႆးသူႉလၢတ်ႈတီႈၽူႈတွႆႇႁွၵ်ႈဝႃႈ – “ ၼႂ်းလိၵ်ႈပိုၼ်ၽၢဝ်ႇႁဝ်းၼၼ်ႉ မီးလၢႆလၢႆၶေႃႈယူႇ။မိူၼ်ၼင်ႇ တႃႇၵႄႈလိတ်ႈ ပၼ်ႁႃၸုမ်းၸၢဝ်းၶိူဝ်းၼင်ႇၵၼ်ၸိူဝ်းၼႆႉၵေႃႈ ဢုပ်ႇဢူဝ်းၵၼ်ၵႂႃႇယူႇ။ၵွပ်ႈပႆႇပဵၼ် ၼမ်ႉပဵၼ်တူဝ်မႃးလႄႈ ပႆႇၸၢင်ႈလၢတ်ႈသင်တေႉတေႉ။မိူၼ်ၸိူင်ႉၼင်ႇ ၸုမ်းပွတ်းႁွင်ႇ ပွတ်းၸၢၼ်း မိူၼ်ၼင်ႇၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼႂ်းမိူင်းတႆးၸိူဝ်းၼႆႉၵေႃႈ ၼင်ႇႁိုဝ်ပေႃးတေၵႂႃႇၸွမ်းၵၼ်လႆႈၼၼ်ႉ လူဝ်ႇဢုပ်ႇၵၼ်ထႅင်ႈၼမ်ၼမ်ယူႇ။ လွင်ႈၸိူဝ်းၼႆႉ လႆႈဢုပ်ႇၵၼ်ၵႂႃႇၼႂ်းပၢင်ၵုမ်ယူႇ။ၵူၺ်းၼႃႇ ၼႂ်းလိၵ်ႈပိုၼ်ၽၢဝ်ႇတႄႉ မၢင်မဵဝ်းၵေႃႈ ဢမ်ႇသႂ်ႇပႃး ၵွပ်ႈဝႃႈ ၶႂ်ႈမီးလွင်ႈႁဵတ်းသၢင်ႈယဝ်ႉ ၸင်ႇလၢတ်ႈဢွၵ်ႇၸိူင်ႉၼႆၶႃႈ ”- ဝႃႈၼႆ။

ၼႂ်းပၢင်ၵုမ်ပွၵ်ႈၼႆႉ ၼွၵ်ႈလိူဝ်သေ ထတ်းသၢင် ၵၢၼ်ဝၢၼ်ႈမိူင်းယဝ်ႉ မီးပႃး လွင်ႈၶိုၼ်ႈၸၼ်ႉသိုၵ်းပၼ် ၵူၼ်းၼႂ်းၸုမ်းထႅင်ႈ။

ဢိင်ၼိူဝ်လွင်ႈၼႆႉ ၸဝ်ႈသိုၵ်းလူင် ၸၢႆးသူႉလၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ၶိုၼ်ႈၸၼ်ႉတႄႉ မီးၼမ်ဢေႃႈ။ၸၼ်ႉဢွၼ်ႇတေႃႇၸၼ်ႉလူင်။ၸၼ်ႉလူင်တႄႉ တေမီး သွင်သၢမ်ၵေႃႉၵူၺ်း။မိူၼ်ၸိူင်ႉၼင်ႇ ၽူႈၼမ်းၼႂ်းၶဝ် ၊ ၽူႈၵွၼ်းတပ်ႉမႃႉၶဝ် ၊ ၽူးၵွၼ်းတပ်ႉငဝ်ႈသိုၵ်းၶဝ် ၸိူဝ်းၼၼ်ႉ ။ မိူၼ်ၼင်ႇ ၽူႈၼမ်းၼႂ်းၶဝ် ၶိုၼ်ႈၸၼ်ႉပဵၼ် ၸဝ်ႈသိုၵ်းၵႂႃႇၸိူဝ်းၼႆႉ ” – ဝႃႈၼႆ။

ၵူၼ်းၸိူဝ်းၶိုၼ်ႈၸၼ်ႉသိုၵ်းၵႂႃႇၼႆႉ မီးလၢႆလၢႆၵေႃႉ ၼႂ်းၼၼ်ႉ ပႃး ၸဝ်ႈသိုၵ်းၽူင်းၼုမ်ႇ ၽူႈၵွၼ်းတပ်ႉငဝ်ႈသိုၵ်း 989 ထုင်ႉမၢဝ်း ၊ ၸဝ်ႈသိုၵ်းပႃႉထုၼ်း ၽူႈၼမ်းၼႂ်းမၢႆ3 လႄႈ ၸဝ်ႈသိုၵ်းၸၢႆးသူႉ ၸိူဝ်းၼႆႉ လႆႈၶိုၼ်ႈပဵၼ် ၸၼ်ႉၸဝ်ႈသိုၵ်းလူင်တင်းသဵင်ႈ။

ၸဝ်ႈသိုၵ်းလူင် ၸၢႆးသူႉသိုပ်ႇလၢတ်ႈတီႈၽူႈတွႆႇႁွၵ်ႈဝႃႈ – “ ၼႂ်းပၢင်ၵုမ်ၼႆႉ တႃႇတူၺ်းထိုင်ၵူၼ်းမိူင်းမိူၼ်ၼင်ႇ မၢၵ်ႇမႅင်းၾင်လိၼ်ၼႂ်းမိူင်းတႆးၸိူဝ်းၼႆႉၵေႃႈ ဢုပ်ႇၵၼ်ယူႇ ပေႃးဝႃႈ ၵူၼ်းမိူင်းႁၼ်မႅၼ်ႈ လႅပ်ႈမီးမၢၵ်ႇမႅင်းၼႆ ႁႂ်ႈပွင်ႇၶၢဝ်ႇမႃးပၼ်တီႈၸဝ်ႈၼႃႈတီႈၶဝ် တေၵႂႃႇပူတ်းပၼ်။ယဝ်ႉၵေႃႈ တႃႇမိူင်းပေႃးတေၵတ်းယဵၼ်ၼၼ်ႉတႄႉ ယူႇတီႈၸုမ်းႁဝ်းၸုမ်းလဵဝ် တေဢမ်ႇၸၢင်ႈသၢင်ႈလႆႈၵူၺ်းလႄႈ တေဢဝ်ၵေႃႁူမ်ႈသၢင်ႈၸိုင်ႈတႆးႁဝ်းၶႃႈ ၶဝ်ႈၵႄႈဢွၼ်ႁူဝ် ႁဵတ်းသၢင်ႈၵႂႃႇပုၼ်ႈတႃႇမိူင်းတႆးပတ်းပိုၼ်ႉၼႆ ယိူင်းဢၢၼ်းဝႆႉယူႇၶႃႈ ” – ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ပႃးဝႆႉထႅင်ႈဝႃႈ ၼင်ႇႁိုဝ်လုၵ်ႈဢွၼ်ႇၵူႈၵေႃႉတေမေႃလိၵ်ႈၼၼ်ႉ လႆႈဢုပ်ႇဢူဝ်းတမ်းဝၢင်းမႁႃႇပွင်ၵၢၼ်ပၢႆးပၺ်ႇၺႃႇၵႂႃႇ လိူဝ်ၼၼ်ႉ တေသိုပ်ႇႁဵတ်းသၢင်ႈလွင်ႈပၼ်ပိုၼ်ႉႁူႉလႄႈ ၵၢၼ်ႁႄႉႁၢမ်ႈၽဵဝ်ႈမူၺ်ႉယႃႈမဝ်းၵမ်ၵႂႃႇ ၸဵမ်ၸိူဝ်းၼႆႉ။

ၼႂ်းပၢင်ၵုမ်ၼၼ်ႉ ၽူႈၼင်ႈၸိုင်ႈပၢင်ၵုမ် ၸွမ်သိုၵ်းလူင် သိူဝ်ထႅၼ်ႈ ဢွၼ်ႁူဝ်သေ မီးၽူႈၶဝ်ႈႁူမ်ႈလၢႆၵေႃႉ မိူၼ်ၼင်ႇ ၽူႈၶဝ်ႈၵေႃႇမတီႇငဝ်ႈငုၼ်း 24 ၵေႃႉ၊ ၵႅမ်ၽူႈၶဝ်ႈၵေႃႇမတီႇငဝ်ႈငုၼ်း 5 ၵေႃႉ ၊ ၸုမ်းၵၢၼ်လုမ်း 14 ၵေႃႉ ၊ ႁူမ်ႈၽူႈၶိုၼ်ႈႁွတ်ႈပၢင်ၵုမ် တင်းသဵင်ႈမီး 44 ၵေႃႉလႆႈႁူႉၼင်ႇၼႆ။