လုမ်းတေႃးမေႃး ၸႄႈတွၼ်ႈၵဵင်းမႂ်ႇ ယိုတ်ႈၶၢဝ်းယၢမ်း ပၼ်ႁႅင်းၵၢၼ် တေႃႇဝီႇၸႃႇ

လုမ်းတေႃးမေႃး (လဝၵ) ၸႄႈတွၼ်ႈၵဵင်းမႂ်ႇ ပိုၼ်ၽၢဝ်ႇ ဢွၵ်ႇမႃးပဵၼ်တၢင်းၵၢၼ် လွင်ႈယိုတ်ႈၶၢဝ်းယၢမ်း တေႃႇဝီႇၸႃႇ (Visa) ပၼ်ႁႅင်းၵၢၼ် 4 ၸိုင်ႈမိူင်း ႁႂ်ႈယဝ်ႉၼႂ်းလိူၼ်ၵျုႊလၢႆႊၼႆႉ။

ဝၼ်းတီႈ 10/7/2023 ၼႆႉ ယူႇတီႈ သုၼ်ၶေႃႈမုလ်း ႁႅင်းၵၢၼ်ယၢၼ်မိူင်း (MIC) တႅမ်ႈတၢင်ႇဝႆႉတီႈၾဵတ်ႉပုၵ်ႈ လွင်ႈ ၶေႃႈပိုၼ်ၽၢဝ်ႇ လုမ်းတေႃးမေႃး ၸႄႈတွၼ်ႈၵဵင်းမႂ်ႇ ၸိုင်ႈထႆး လႆႈယိုတ်ႈၶၢဝ်းယၢမ်းပၼ် ႁႂ်ႈႁႅင်းၵၢၼ် 4 ၸိုင်ႈမိူင်း မိူၼ်ၼင်ႇ မိူင်း မၢၼ်ႈ၊ မိူင်းလၢဝ်း၊ မိူင်းၵမ်ႇပူးၶျႃးလႄႈ မိူင်းဝႅတ်ႉၼမ်း ၸိူဝ်းၼႆႉ တိုၵ်ႉမီးႁႅင်းၵၢၼ် ၸိူဝ်းပႆႇလႆႈတေႃႇ ဢႃယုဝီႇၸႃႇၵၼ်ယဝ်ႉ မူတ်းလႄႈ ႁႂ်ႈသိုပ်ႇၵႂႃႇၶပ်းၶိုင် တေႃႇၵၼ်ႁႂ်ႈယဝ်ႉၵွၼ်ႇ ဝၼ်းတီႈ 31 လိူၼ်ၼႆႉသဵင်ႈ ဝႃႈၼႆ။

ၼႂ်းၶေႃႈပိုၼ်ၽၢဝ်ႇ လုမ်းတေႃးမေႃး တႅမ်ႈတၢင်ႇဢွၵ်ႇမႃးဝႃႈ – “ၸွမ်းၼင်ႇ မတ်ႉတီႇၶေႃးရေႃးမေႃး (ၶေႃႈတႅပ်းတတ်းၸုမ်းၽွင်းလူင်) ဢၼ်ယၢမ်ႈလႆႈပိုၼ် ၽၢဝ်ႇဝႆႉၼၼ်ႉသေ ၾၢႆႇတင်း ၸုမ်းၽွင်းလူင်မိူင်းထႆး လႆႈယိုတ်ႈၶၢဝ်းယၢမ်းပၼ် ႁႂ်ႈႁႅင်းၵၢၼ် 4 ၸိုင်ႈမိူင်း ၵႂႃႇယိုၼ်ႈတေႃႇ ဢႃယု ဝႂ်ၶႂၢင်ႉႁဵတ်းၵၢၼ် ႁႂ်ႈယဝ်ႉ ၼႂ်းဝၼ်းတီႈ 13/2/2023 ၼႆသေတႃႉ တိုၵ်ႉမီးႁႅင်းၵၢၼ် ၸိူဝ်းဢမ်ႇပႆႇလႆႈတေႃႇဢႃယုဝီႇ ၸႃႇၸဝ်ႈၵဝ်ႇယဝ်ႉၼႆလႄႈ ႁႂ်ႈၵႂႃႇၶပ်းၶိုင် ႁႂ်ႈယဝ်ႉၵွၼ်ႇ ဝၼ်းတီႈ 31/7/2023 ၼႆႉ ၵမ်းလဵဝ်”- ဝႃႈၼႆ။

ဢိင်ၼိူဝ် လွင်ႈၼႆႉ ႁႅင်းၵၢၼ် ၸိူဝ်းၽတ်ႉသပွတ်ႇမူတ်းဢႃယုသေ ၵႂႃႇတေႃႇၽတ်ႉသပွတ်ႇၵၼ်မႃး ၵူၺ်းၵႃႈ ဢမ်ႇတၼ်းၶိုတ်း ၸွမ်းၼင်ႇ ၾၢႆႇတေႃးမေႃးၶဝ် မၵ်းမၼ်ႈဝႆႉ ၼၼ်သေ ၵွပ်ႈၼႆလႄႈ ၸင်ႇလႆႈပိုတ်ႇႁပ်ႉတေႃႇပၼ်ၶိုၼ်း ႁႅင်းၵၢၼ် ၸိူဝ်းဢမ်ႇ တၼ်းလႆႈတေႃႇဝီႇၸႃႇ ၸိူဝ်းၼၼ်ႉ ဝႃႈၼႆ။

ထွင်းၶမ်း ၽူႈၵိူဝ်းၵုမ် ႁႅင်းၵၢၼ်ယၢၼ်မိူင်း MAP လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ယူႇတီႈ လုမ်းတေႃးမေႃး ၸႄႈတွၼ်ႈ ၵဵင်းမႂ်ႇ ပိုတ်ႇႁပ်ႉတေႃႇဝီႇၸႃႇၶိုၼ်းၼႆႉ တွၼ်ႈတႃႇ ႁႅင်းၵၢၼ် ၸိူဝ်းၵႂႃႇႁဵတ်းၽတ်ႉသပွတ်ႇသေ လႆႈမႃးတူၵ်းလိုၼ်း ဢမ်ႇ တၼ်းလႆႈၵႂႃႇတွၵ်ႇဝီႇၸႃႇၵၼ်ၸိူဝ်းၼၼ်ႉ ၵွပ်ႈၼႆလႄႈ ႁႂ်ႈႁႅင်းၵၢၼ် ၸိူဝ်းၼၼ်ႉ ၵႂႃႇသိုပ်ႇတေႃႇဝီႇၸႃႇ ၵၼ်ႁႂ်ႈယဝ်ႉ ၼႂ်းလိူၼ် ၼႆႉ။ တွၼ်ႈတႃႇ ႁႅင်းၵၢၼ် ၸႄႈတွၼ်ႈၵဵင်းမႂ်ႇၼႆႉ”- ဝႃႈၼႆ။

ၵဵဝ်ႇၵပ်းလွင်ႈတေႃႇဢႃယုဝီႇၸႃႇ တႃႇႁႅင်းၵၢၼ်ယၢၼ်မိူင်းၼႆႉ ဢွၼ်တၢင်းသုတ်း တေတူၺ်းဝႂ်ၶႂၢင်ႉႁဵတ်းၵၢၼ် သင်ဝႃႈ ႁႅင်း ၵၢၼ် လႆႈၶႂၢင်ႉဝႂ်ႁဵတ်းၵၢၼ် ၼိုင်ႈပီ ဢမ်ႇၼၼ် သွင်ပီၸိုင် လွင်ႈတွၵ်ႇဝီႇၸႃႇၼႆႉၵေႃႈ မိူၼ်ၵၼ် တေဢဝ်ၸွမ်းဝႂ်ၶႂၢင်ႉႁဵတ်း ၵၢၼ်ၼၼ်ႉ ဝႃႈၵူၺ်း။

“တွၼ်ႈတႃႇ ၵႃႈတွၵ်ႇဝီႇၸႃႇႁႅင်းၵၢၼ်ၼႆႉ 2 ပီ တေသဵင်ႈ 1,900 ဝၢတ်ႇ တေႃးမေႃးၶဝ် တေတူၺ်းဝႂ်ၶႂၢင်ႉႁဵတ်းၵၢၼ် ၶဝ်ဢွၼ် တၢင်း။ သင်ဝႃႈ ဝႂ်ၶႂၢင်ႉႁဵတ်းၵၢၼ်ၶဝ် မူတ်းမိူဝ်ႈလႂ်ၵေႃႈ ဝီႇၸႃႇၶဝ်ၼၼ်ႉၵေႃႈ တေမူတ်းၸွမ်းဝႂ်ၶႂၢင်ႉႁဵတ်း ၵၢၼ် မိူဝ်ႈၼၼ်ႉယဝ်ႉ”- ထွင်းၶမ်း သိုပ်ႇလၢတ်ႈၼႄၼင်ႇၼႆ။

လုမ်းတေႃးမေႃး (လဝၵ) ၸႄႈတွၼ်ႈၵဵင်းမႂ်ႇၼႆႉ တေပိုတ်ႇပဵၼ်ၶၢဝ်းယၢမ်းႁဵတ်းၵၢၼ်လူင်ပွင်ၸိုင်ႈ တႄႇဢဝ်ယၢမ်းၵၢင်ၼႂ် 8:30 မူင်းထိုင် 4:30 မူင်းဝၢႆးဝၼ်း တေပဵၼ်ဝၼ်းၸၼ် ထိုင်ဝၼ်းသုၵ်း ၼႆယဝ်ႉ။